人紅囂張 巨聲幫疏遠 吳業坤孤獨慶功

圖片來源：Instagram、Facebook、新傳媒圖片庫

歌手觀眾齊噓

《叱吒》「我最喜愛男歌手」獎，賽前奪獎呼聲最高的是陳柏宇，所以當主持森美宣佈坤哥冧莊蟬聯該獎時，不單觀眾噓爆，台前的歌手們亦紛紛變臉 ，有人甚至不滿說：「唔係啩？」 又反問坤哥今年有何作品。歌手們反應之大，除了覺得坤哥今年並無佳作、兼沒甚人氣名不符實，更有人直言：「點解唔係Jason？」公然戥賽前大熱的陳柏宇唔抵。

態度囂張 自覺跟一線大星睇齊

據知坤哥自從去年橫掃頒獎禮爆紅，電視劇升呢男主角、廣告代言接踵而至，態度變得囂張，自以為一線巨星，睇唔起昔日平起平坐的巨聲幫，更因為忙拍劇等其他工作而「不事生產」，減少了創作。以往坤哥常跟巨聲幫好友如胡鴻鈞、許廷鏗等相聚，自去年「爆紅」後，不是臨時甩底便是WhatsApp已讀不回；以往IG盡是跟巨聲幫好友的friend底合照，現在卻頻頻post跟四大天王及Eason的集郵相。

好友疏遠 自成一角

到達大會慶功典禮後，得獎歌手紛紛與在場的工作人員及其他歌手合照留念，未知坤哥是否自覺奪獎當之有愧，影大合照時竟尷尬攝到最後一行，全程無人上前祝賀，氣氛僵爆。受訪後不久，更悄悄冇癮離場。

好友們寸爆

巨聲戰友疏遠坤哥其實有跡可尋，剛過去的新城頒獎禮，一班巨星幫戥得獎的鄧小巧開心，而自動靠邊站的坤哥則擰歪面，表現貌合神離。除此以外，胡鴻鈞亦於網上開名寸爆，指坤哥「話食飯但次次得個講字，六年嚟都係單方面維繫關係」；而許廷鏗也在欣宜奪獎後，發文「找到能一齊分享喜悅的朋友要感激，找到能共患難分憂的朋友更要珍惜 ＃忘我不忘本」矛頭似直指得獎後唔識人的坤哥。

回應孤獨食粥

當昔日巨聲幫好友紛紛遠離，坤哥今年冧莊得獎也無人陪慶功，一個人孤獨食粥慶功。另邊廂，許廷鏗、胡鴻鈞卻特地跟同奪「我最喜愛」獎項的欣宜慶功，關係可想而知。事後坤哥回應被戰友排擠事件時，否認自己囂張冇朋友，稱翌日需要工作才獨自離去食粥，又指平常巨聲幫眾朋友的確少見了，但私下關係好好，又不時會互相鼓勵。

全文完