暖男王浩信

冇同陳自瑤「分居」 暖男王浩信 恨追B:我好想!

最新娛聞

廣告

33歲暖男王浩信 (Vincent) 因《不懂撒嬌的女人》中扮演Saving冧爆全城女觀眾,更被封為「暖男」,其實Vincent加入TVB九年,亦演過不少經典角色,他接受本刊訪問大談事業發展、生意投資,又分享自己是何類型的丈夫及父親,提到會否和太太陳自瑤追多個BB,王浩信重覆三次說:「我好想!我好想!我好想!」唔好想喇!坐言起行啦!

Photo:新傳媒資料庫、陳自瑤微博、王浩信微博、無綫電視截圖

工作不斷 暖男王浩信 未買到樓

《樓奴》(2015年)開始,愈做愈好,暖男王浩信 也自覺順利和幸運,因為做到好多挑戰性嘅角色而觀眾又接受,因為演員係冇得揀角色,他也希望每個角色有深度,問到幾時捱出頭可以買到樓?王浩信說:「仲未㗎,我都未買到樓,呢個最基本嘅嘢都未達到,距離目標仲有好長嘅一段距離,但的確依家比以前嘅狀態係安心好多,亦都令到屋企人安心好多,所以繼續努力啦,同我夢想嘅嘢係接近嘅,但我嘅夢想唔係用錢去衡量,譬如我依家多咗一啲同時裝有關嘅嘢(指服裝投資)、可能嚟緊又會有飲食有關嘅嘢,都係實踐緊一啲自己好鍾意嘅嘢,作為一個八十後,我都要繼續畀心機。」

 

 

一年得三日假期

一劇接一劇,外表看似好fit、好精神,但其實唔夠瞓:「成日都唔夠㗎,所以我拍咗呢三套《不懂撒嬌的女人》、《踩過界》同《溏心風暴3》之後,我同公司講真係要抖一抖,其實我係一年冇停過,呢一年加埋嘅假期得三日,但嗰三日都要準備第二日嘅劇本,所以都唔算真係放假。最辛苦係上年啱啱撞完車,拍《不懂撒嬌》,夜晚三點鐘,本身個人可能有六十幾%嘅電,突然變到得番十幾個%,drop得好緊要。《踩過界》又係好甘,係我拍咁耐戲以嚟,戲份最多嘅一套,一集起碼有廿幾場、咩都關我事,要好識得去handle點去避重就輕,因為體能真係有限,嗰時每日差唔多工作二十個鐘,拍到後段有啲情緒好崩壞嘅戲,我做完一下,已經冇力再做第二下,有一、兩場我同監製講:『我真係太攰,你畀我抖一日,我再嚟啦!再嚟多take會好啲。』去到《溏心3》已經唧都唧唔出、個人係平靜,所以我同公司講要抖番個零、兩個月,充實下自己又好,但我其實幾難停,好似我知道呢幾日有假期,我又會想pick up番跳舞、上下唱歌堂,又想報下啲演戲班,外國有啲清除你唔好演戲習慣嘅班,我都想去上。」

 

 

 

 

為演好盲俠 事前做足功課

收到《踩過界》個劇本,王浩信話好興奮,而且事前做咗好多功去演盲俠:「興奮!因為so far拍過最有挑戰性,又係林志華監製,佢同我都好多部合作,佢不斷挑戰緊我條界,我覺得難在佢將兩個幾難處理嘅身份擺埋一齊,一個係殘障人士,另外係大律師,一個正常人要考到大律師執照其實係好難,仲要係盲嘅人,點睇案例?點獲得法律知識?其實係好難,最開頭安排去盲人中心練習,練習點去用白杖、用耳朵去感受生活要面對嘅事情,譬如煮飯、切餸、睇書、點用iPhone 、過馬路點聽行人過路燈⋯⋯呢個角色有趣嘅地方就係一個盲人點判辯是非同幫弱勢社群爭取公義,我覺得呢個題材係非常之有趣,除咗盲,仲有法律方面,睇關於法律嘅戲、睇律師點上court打官司嘅知識去做準備。」而為事業,王浩信唔介意北上工作。

 

做歌手圓夢

歌手出身的王浩信在《不懂撒嬌》中拎結他自彈自唱,到底唱歌係咪佢未完成嘅心願?王說:「可以話係,可以話唔係。其實喺工作層面上,我係應該畀觀眾認定我一個身份先,我覺得我主導自己喺演藝事業,的確以演員身份去行先,但唱歌我的確係好鍾意,當然好開心不斷有主題曲唱,而且旋律都好正,所以係咪要將音樂變成其中一部分事業,我又覺得未必一定要,但有又好開心,所以我唔識好肯定咁答。」

 

 

 

為太太送驚喜

有報道指他同太太陳自瑤「分居」將軍澳,王返維景灣畔,但家住日出康城,到底是否有兩頭住家?「梗係唔係啦,維景灣畔係我阿媽嘅,但亦都啱啱賣咗嘞,所以有啲嘢我要幫佢處理,因為佢住南區,我住將軍澳,梗係我搞啦!(有冇靚女埋身?)我冇喎,真係冇!講真,我幾自閉,收工我就返屋企,平時出去嚟嚟去去去得一個地方、永遠都同嗰一個朋友,我嘅生活就係咁,我除咗工作,係唔會遇到一啲異性,譬如我去做騷,台下有觀眾,但唔會同佢哋建立啲咩㗎嘛,所以我身邊唔會有呢啲機會。」問到有冇驚喜畀老婆?王浩信話:「盡量,過時過節都會喺屋企,希望create唔同嘅scene,或者送唔同類型嘅禮物,可能係自己煮餸或者真係買一啲嘢,因為我依家喺屋企要氹嘅女人唔止一個,我阿媽、我個女、太太,仲有我姐姐(外傭)同隻狗都係女嚟。」

 

 

 

 

為5歲女添個伴 王浩信:我好想!

囡囡靖喬依家5歲,問到他是什麼類型的爸爸?會否為追個BB?王浩信笑說:「我好想!我好想!我好想!講完。哈哈!我慢慢發覺我係咩類型嘅爹哋,就係縱囉,哈!我覺得我依家個心靈都仲有好大個小朋友喺入面,我同阿囡好多溝通係好level、唔大距離嘅,所以有好多佢需要嘅嘢,我亦都好明白佢點解需要,切身處地,如果我係一個小朋友問父母要一樣嘢,我都好想佢畀我,我希望盡量令到佢開心,我明白好多父母一冇時間陪,就買嘢,我知道呢個係唔好,我亦唔算成日咁做,我可以做嘅係唔使開工就陪多啲佢。」他又說:「呢一年我的確少咗時間花喺屋企,所以我未係好qualify去答呢條問題。因為呢一年,我返屋企嘅時間係相當之少,呢樣嘢我係做得唔夠好,希望我屋企人體諒。我諗嚟緊可能花啲時間去旅行,又趁住暑假,阿囡依家大個、懂性、享受到假期,希望可以同佢哋一齊去旅行。」

 

 

 

全文完

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!