想破G.E.M.紀錄 Celine 年尾紅館騷受阻

Photo：新傳媒資料庫、譚芷昀微博、譚芷昀FB、譚芷昀IG

9歲 Celine 技驚四座

Celine 6月時以一曲〈My Heart Will Go On〉參加《全美一叮》，技驚四座成為熱話，而在日前的比賽中Celine在台上表現淡定，跟台下評判對答如流，更識做大讚客席評判Laverne Cox靚女，之後由對方按下Golden Buzzer，令Celine直接晉級入半準決賽，淡定Celine立即O嘴當場達兩分鐘。

延伸閱讀：

無綫棒打美女與野獸 李佳芯為愛抗命

藐同性做咪霸 劉佩玥 麥明詩直播開火

蕭定一傍實 Celine 老積現身祝捷

最近Celine成功晉級進入半準決賽，上星期舉行祝捷會，主角Celine一身名牌金光閃閃加一對3吋高踭鞋的熟女打扮現身，全程由蕭定一傍實做訪問，提到獲評判按下Golden Buzzer時的感受，Celine以大量英文夾雜廣東話回應，事後被網民狂插「JM式英語」、「小童連piece雅」、「好作狀」、「太老積」等一連串負評。

紅館唔批期

對於蕭定一透露年尾紅館開騷，Celine先望一望身旁的蕭定一，蕭對記者話：「我冇直接同佢講，開演唱會好唔好？」Celine認真思考數秒後答：「未咁快啦﹗」當事人唔知自己要開演唱會，但其實經理人及譚順生密鑼緊鼓張羅中，只是申請紅館一再受阻，知情人士透露：「蕭定一同Celine爸爸舊年已經度緊想幫Celine今年喺紅館開演唱會，佢哋一直視G.E.M.為目標，覺得如果成功打破到G.E.M.喺紅館開騷紀錄就好威水，不過依家紅館規例同以前唔同，唔理你咩資歷，如果第一次申請一定唔會批，好似家燕姐咁都攞唔到年尾檔期，於是蕭定一改用慈善騷方式再入紙。」

家燕姐：我都申請唔到

Celine紅爆，同時卻爆出其父兼歌唱老師譚順生一大堆是非，不但被爆虛報獎項、博士學歷受質疑，連人緣極好的薛家燕早前都對Celine父親的惡行爆seed，斥責譚順生當年要求佢捧紅Celine，為佢穿針引線到內地參加比賽，後來又自薦在家燕姐開設的藝術中心做導師，家燕姐知人善任一一答應，最後卻被對方撬客，家燕姐指摘有人「食碗面反碗底」。

對於Celine有意在紅館開騷，家燕姐接受本刊訪問對Celine有讚冇彈：「我都有留意新聞，開一場唔會有問題嘅，蕭定一話做善事㗎，唔會冇人睇﹗」記者再問有冇留意Celine被批評似唱歌機器冇感情？「我覺得佢把聲靚，咁我做人阿媽，叫我演繹番阿媽角色都冇問題，咁佢得9歲，點會唱到失戀情感？」但一提及譚順生，家燕姐立即封嘴表示「唔想再提呢個人」。

粉絲國際化三語直播吸Like

面對今年紅館夢隨時泡湯，再加上負評連連，無阻Celine在網上吸like之心情，早前Celine在FB和IG同步直播，未知是否被指中英夾雜扮ABC的指控，Celine在直播中三語廣播，以廣東話回應，但幾句過後又轉channel以普通話及英語回答，在直播中又設Q&A環節、估歌仔遊戲、又即場教摺紙。至於經常被指冇童年的Celine，被問到暑期活動，佢以廣東話回應：「同妹妹去公園玩。」Celine一曲成名而彈起，港人意見兩極化，在直播中留意畀like佔九成是外國人，來自菲律賓、哥倫比亞、加拿大，卻甚少港人網民。

練兵要緊

經常被指專注比賽，疏忽學業的Celine透露每日練兩三個鐘歌，「視乎爸爸忙唔忙，爸爸練會少少嚴」，而佢平日在fb分享照上，除了勤練歌練琴，就是去化妝扮靚、電髮，打扮熟女。除了勤練歌，為了肢體動作能有助演繹歌曲，Celine被安排跟郭富城御用舞導師學舞，可見其父花盡心思財力捧紅Celine。

Eric Kwok批似機器

Celine得到客席評判Laverne Cox青睞，不過歌唱老師麥潔文亦其指「唱不出感情」，本港著名音樂人Eric Kwok（郭偉亮）批評Celine如「唱歌機器」：「佢技巧係有，但一個年紀咁細嘅女仔，冇任何愛情經歷去唱〈How Am I Supposed to Live Without You〉，我覺得好好笑，但因為佢冇拍拖經歷，畀我嘅感覺係感動唔到人，即係好似一個唱歌好勁嘅唱歌機器、機械人咁，所以話佢係天才，或者佢唱畀佢爸爸、媽媽聽，想同佢哋講『我唔可以冇咗佢哋生存落去』﹗」

全文完