浪子

浪子回頭金不換!圈中六個浪子爹哋

最新娛聞

廣告

奇妙電視開台半個月,最多反應的節目應該係杜汶澤主持的《杜汶澤食住上》,節目請來鄭中基 (Ronald)做嘉賓,Ronald更重提當年喺飛機醉酒鬧事,一鋪賠哂佢台灣走紅幾年賺的錢!唔少網民認為人誰無過,浪子回頭十年未晚,力撐Ronald!其實娛樂圈中都有唔少生B升呢做人父後, 浪子 回頭的好老公、好爸爸,依家同大家一一回顧!

鄭中基

2000年鄭中基乘搭飛機由美國洛杉磯去台北,途中佢飲酒飲到 high晒,仲喺機上食煙大聲講野,當空姐同機艙服務員上前制止時,鄭中基激動打人,最後搞到被美國 FBI拘捕。

直到同前有線主播余思敏奉子成婚後,鄭中基專注電影事業,一改無賴性格,現時育有一仔一女的他,不時哂全家溫馨照,變身成好老公好爸爸。

彭順

導演彭順四年前被發現與嫩模Liddy李悅彤喺圓方肆無忌憚當街拖手、啜嘴、搣胸、搭膊、攬腰乜都做齊,偷食斷正,彭順被網民鬧爆兼狂插係賤男。

醜事曝光後,彭順即飛往馬來西亞箍煲,而太太李心潔最終選擇原諒老公,兩人和好如初。李心潔為老公誕下一對可愛孖仔,哥哥叫彭濟雲,弟弟則叫彭子然,一家四口樂也融融。

陳浩民

2011年被本刊爆陳浩民於橫店拍劇時藉醉狼吻陳嘉桓,對佢上下其手。

事後陳浩民喺記者會中一哭二鬧三鞠躬四道歉,臨走時還作狀發軟蹄,要將臨盆嘅太太蔣麗莎攙扶,承認錯誤痛改前非,近年陳浩民修心養性,專心賺錢養女,五年抱四,認真厲害。

馬德鐘

「馬神」馬德鐘高大有型,先後跟郭可盈、陳慧珊、佘詩曼、郭羨妮等女星傳緋聞,06年拖秘密情人Katherine遊埠偷情,當時明知佢有妻有兒,仍甘願搭上隨傳隨到,關係一直維持約兩年,至遊泰斷正、馬德鐘太太回港一段時間後才被迫斬纜。

馬太張筱蘭最終仍重投老公懷抱,近年馬神專心打理飲食生意同養馬,放假陪下仔仔游水出活動。仔仔馬在驤除了遺傳爸爸高大靚仔基因外,仲係游泳健將,在第二屆亞洲法國國際學校游泳錦標賽中,勇奪七面金牌,一家三口幸福美滿。

林文龍

林文龍一直被傳扮好仔,實質經常偷食,蒲玩多過工作,靠老婆郭可盈養成頭家,結婚多年屢傳婚變。09年5月被踢爆偷食內地女星董維嘉,被人影咗相之餘重有一段疑似林氏夫婦嘅電話錄音。

林文龍最近喺《不懂撒嬌的女人》以型佬look冧師奶,人氣回升,喺社交網站貼相放閃,大哂同老婆囡囡Family day七歲獨生女林天若靚樣,羨煞旁人。

吳啟華

吳啟華作為一代師奶殺手,入行後緋聞不絕,及後返內地發展,不時被斷正北上尋歡,07年佢同內地女星石洋子打破21年代溝共諧連理,翌年雖誕下女兒熙兒,但三年前離婚。吳啟華依家時不時大哂父女合照,慈父形象出晒嚟!

全文完

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!