胡杏兒

老公貼身侍候 胡杏兒 陀4個月慈姑椗

最新娛聞

廣告

37歲的 胡杏兒 喺母親節(5月14日)於網上發布同老公李乘德(Philip)遠赴馬爾代夫影嘅大肚寫真,加埋一張BB超聲波照片,公佈喜訊。據知陀B四個月嘅杏兒一索得男,李家上下非常緊張,老公Philip除工作以外,全部時間貼身侍候老婆,奶奶更加頻頻上門煮飯照顧杏兒,絕對係皇后式嘅安胎生活!

原文:Sunday Kiss

婚後恨做媽咪 為李家繼後香燈

胡杏兒 自從下嫁Philip後,不時喺社交媒體上載同老公嘅生活照,大晒幸福。其實結婚之後,杏兒一直恨做媽咪,加上老公屋企好傳統,所以佢都希望可以盡快添丁,繼後香燈,仲話最好一次過生3個㖭!

上傳超聲波照片 公布喜訊

雖然今年二月被影到凸肚去中環睇醫生,不過當時仲未夠三個月,時機未成熟,杏兒都唔敢咁快公開。之後每次出席活動時,杏兒都只係輕輕表示仍在努力中帶過話題。等到今年母親節呢個好日子,兩老婆同步上載超聲波照片同埋喺馬爾代夫BabyMoon度假中嘅靚相,杏兒留言:「今年的母親節太特別了,感恩上天送給我們的禮物,感覺好奇妙。李寶寶已經急不及待在我肚子裏做仰臥起坐了,寶寶再等一下,爸爸和媽媽也很期待和你見面呢!」

懷孕初期 拍打戲斷指甲

公佈喜訊後,杏兒越洋接受本刊訪問,佢表示比起懷孕初期依家身體狀況已經好好多,嗰時成日作嘔又冇乜胃口,加上仲要拍緊戲,自己同老公都非常擔心。講到陀B初期,杏兒仲喺無錫拍緊大陸古裝劇《那年花開月正圓》,硬住頭皮開工,成件事絕對係驚險十足兼搵命搏。每次同對手拍到有身體接觸的武打場面,佢都份外擔心,雖然冇用盡全力,但拍到同對手互相廝打嘅戲份時,打到指甲都斷埋,杏兒話依家諗返起都一額汗:「陀住B拍打戲都好擔心,好彩依家順利過渡。」

奶奶親自照顧 餐餐十餸一湯

話晒杏兒都係第一次陀B,所以全家上上下下都非常緊張。杏兒就話冇乜特別安胎,只係行動上比平時更小心,仲勁讚奶奶,成日煮嘢比佢食,又好照顧自己。講到飲食方面,佢就話一定會以健康為主,但係唔會特登食啲特別嘅補品。其實奶奶知道杏兒有咗BB之後,就一直親自照顧佢嘅飲食,知道佢作嘔作悶食唔落嘢,不時會煲花膠湯俾佢長胎。近月更加係頻頻上門煮飯俾杏兒食,餐餐十餸一湯想谷肥個胎。

「胡說八道會」五位靚契媽

杏兒跑出成為「胡說八道會」第一個媽媽,一班好姊妹送上祝福戥佢高興之餘,佢哋亦都順理成章做BB嘅契媽。BB未出世就已經有五個靚契媽,加埋爺爺嫲嫲等家人,嗌李寶寶做幸福嘅金叵羅真係絕不為過。

全文完

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!