謙謙先斬後奏拍床戲 楊怡 ︰我唔知！
廣告
日前羅仲謙越洋送上「老婆楊怡」巨型花牌，令全城女士都羨慕 楊怡 搵到個好老公，不過原來呢件事另有內情！去年10月 謙謙 同楊怡喺香港擺酒結婚後，未度蜜月就急急腳飛往內地拍攝網劇《無間道》。 謙謙 除了唔用替身打到飛起， 更同楊冪師妹、外號「男神收割機」的朱銳有連場愛情動作鏡頭，下下埋牙肉搏又摷又啜，相當火辣！劇集近日熱播中，老婆楊怡呷行乾醋話︰「我未睇﹗」，為氹番愛妻，唔怪得謙謙即刻送巨型花牌氹番愛妻啦！
圖片來源：新傳媒圖片庫、微博、《無間道》截圖
先斬後奏拍床戲
羅仲謙在網劇《無間道》戲分極重，有大量動作鏡頭包括槍戰、打鬥、講數、劈友，監製梁家樹禁演員用替身，受傷少不免，謙謙為此於接劇前跟楊怡商討應否接拍，最終答應演出。
之不過謙謙選擇性備案，劇中的連場親熱戲卻未有稟告楊怡，先斬後奏拍咗再算！當時謙謙接受內地傳媒訪問，佢咁答：「不用特別講，大家都是演員﹗」直到劇集於去年十二月尾出街，連宣傳海報都用謙謙同朱銳咀嘴大頭相，謙謙最後先坦白從寬，但就講得避重就輕，費事刺激到老婆啦。
激情床戲
究竟嗰幾場親熱戲有幾激，激到謙謙都唔敢備案？片段中見到謙謙上身赤裸晒肌，同朱銳又啜又摷好激烈吓喎！
花牌謝罪
雖然楊怡揚言對老公百分百信任，但女人見到自己老公同其他女人親密點都有少少嬲，仲要咁肉緊咁激烈喎！所以謙謙都好識做，即刻越洋送上以花砌成「老婆楊怡」加埋四個大花牌氹老婆，令楊怡冧到痺，仲拍埋片直播放上網，不停冧笑多謝老公，看來謙謙呢招花海謝罪尚算奏效。
楊怡：百份百信任老公
對於老公拍激情床戲一事，楊怡就話：「我未睇﹗不過應該係劇情需要好合理有呢啲鏡頭﹗我呢排忙緊舞台劇，唔可以追得咁貼，忙完之後會逐集追睇番。」有指老公拍之前冇備案，楊怡回應話唔過問老公嘅工作，自己都係演員，都拍過親熱戲，百份百支持同信任老公！
全文完
