鄭俊弘偷食前科 偷嗒索星二代苗彤

與何雁詩打得火熱

阿Fred在大台默默耕耘多年，直至13年在《星夢傳奇》後終於人氣急升，更在現時熱播的劇集《與諜同謀》同視帝羅嘉良合作。另外佢可算愛情事業兩得意，去年拍《這個冬天不太冷》時與拍檔何雁詩撻着，今年拍〈真心真意〉MV時又頻頻當着工作人員面前打情罵俏，男方更爆不時去女方豪宅過夜！

被爆有未婚妻

正當大家覺得呢一對都幾襯時，今日阿Fred就被爆原來有個已經收埋三年的富貴女友，佢更在15年喺深圳一酒店向女友求婚成功！女方一家無論生活定感情上都對阿Fred照顧周到，去旅行又請埋佢坐頭等，但男方就唔知足去偷食，搞到何雁詩做咗第三者！

去年8月偷嗒苗彤

其實阿Fred媾女史又點止咁少，佢去年8月被本刊踢爆偷嗒苗僑偉愛女苗彤！苗彤既係星二代而且樣靚高䠷身材又勁，喺加拿大名校UBC主修藝術，阿Fred當然好有興趣！去年8月一個晚上，Fred與苗彤各自帶上朋友做遮擋，以希臘女神look的苗彤先現身，而Fred則跟陳瀅一起到達，未幾Fred視察完環境，覺得安全即撇下陳瀅過枱跟苗彤對坐！兩人無視友人，不時冧笑對望，一副情意綿綿！

至11時多苗彤收到電話order要走人，Fred即送她出門口等保母車，等車時苗彤的女友人借醉狂捽Fred面珠，苗彤即時醋意大發睥到行，朋友都冇面俾！但留意番，其實當晚何雁詩亦都在場，阿Fred真識玩！

獲何雁詩力撐

當時阿Fred被爆偷嗒苗彤後，出席公開活動時自然被瘋狂追問，同場的何雁詩就大呻當晚飯局都在場，但就冇人留意自己！另外又替阿Fred解圍，話苗彤其實係大自己一年的師姐，係好好的朋友，而當晚係去一個朋友新開張的餐廳。唔通阿Fred同何雁詩當時已經互有好感？

全文完