楊明入行多年，星途麻麻，呢一兩年終於漸有起色，憑《收規華》提名最佳男配角，最近升做男二，楊明過去是非多多，曾經醉酒駕駛及刑事毀壞而惹上官非，數年前自爆婚訊，突然一句意見不合就煞停婚事，冇耐就被影到身邊女伴車輪轉，個底都幾花，楊明日前剛拍完新劇《火線下的江湖大佬》，未開新劇，早幾日楊明約咗個男同事去街，佢哋去咗土瓜灣睇電單車配件同頭盔，左揀右揀都唔多啱心水，搵咗間茶記坐低吹水吹咗成粒鐘，之後楊明揸車返咗去電視城搵好友袁偉豪食晚飯，兩條麻甩佬講唔停，話題圍繞即將去印度拍嘢，之後袁偉豪入廠拍劇，睇嚟35歲楊明終於定性﹗
