蔡楓華（Ken）復出樂壇五年，去年尾喺荃灣大會堂搞咗兩場《情歌蜜語演唱會》，有見反應不俗，阿Ken決定添食，今年5月1至2日將會喺文化中心再開兩埸《情歌蜜語演唱會（Part 2）》，日前佢喺記者會兼同歌迷會團拜嘅活動上，透露兩次演唱會全部自資，合共投資咗過百萬，「出返嚟五年開咗二、三十場騷，唔算得豐衣足食，但起碼經濟上好咗好多，生活都改善咗。」佢仲話為咗今次個唱正積極減肥，依家肚腩已經細咗，不過問到佢會唔會喺演唱會上除衫騷肌？佢就話：「紅館嗰啲先要，文化中心好高尚，唔使除衫！」Sorry，你除衫應該唔會有人想睇囉！
