香港小姐2019 Mina 楊慧敏

【香港小姐2019】Mina楊慧敏激似某日本女 優?!馮盈盈:其實佢先係校花

娛聞

廣告

今個星期一(24/6)嘅香港小姐2019選舉首輪面試中,外表較為搶眼嘅幾位候選入圍者都受到高度關注,當中蔡嘉欣嘅黑歷史甚至未選就已經被網民起埋底。至於另一位候選入圍佳麗Mina都成為咗網絡熱話,而原因竟然係佢激似一個日本女 優?!

撰文:AuntieSam|圖片:東星娛樂、Instagram、Facebook、新傳媒資料室

Mina楊慧敏激似麻倉 憂

Mina今年25歲,喺香港大學食物及營養學系畢業,即係同馮盈盈係同科同學,兩個人仲曾經一齊參加過模特兒比賽,兼且做過私影妹添。長相可愛似足㗎妹,不過絕對唔係的的骰骰個種,事關佢都有169cm高,身材非常勻稱。睇佢facebook話自己平日鍾意跳舞、唱歌、煮嘢食同做gym,見佢IG都有post下自己做運動嘅相,感覺上都幾健康吓。

今年有唔少參選者都同藝人「撞面」,包括有「翻版朱智賢」、「V面昆凌」、「各種版本池美麗」,連「女版樊少皇」都出埋嚟,真係可以話唔使等保良局個show都已經「星光熠熠」!至於Mina,就有唔少網民都話佢似日本愛情動作界嘅「國民初戀」麻倉 憂,仲將兩個人嘅相做對比……嘩,又真係有8、90%似喎!

馮盈盈:佢先係校花!

Mina面試當日一出場就同鏡頭比晒心心,仲同大家講佢係FYY同學,非常識宣傳自己。尋日FYY返TVB錄影《娛樂大家》,佢就話自己都有留意港姐面試,仲有留意到Mina:「我都有留意度同校師姐Mina(佢又話係你同學?)佢謙虛啫!佢大我一年,咁都要專稱返佢一聲『師姐』嘅。」佢續稱:「佢係大學喺風頭躉嚟架,我先係寂寂無名嗰個。佢係大學時期已經贏得大專校花嘅美譽,大家一直誤會咗我係『港大校花』,其實我只係『食營校花』!」FYY又爆Mina畢業之後做過好多唔同工作包括空姐等,覺得佢生活好多姿多采,視Mina為佢「偶像」!事實上FYY一早已經澄清過自己唔係港大校花,只係大家當時未留意到Mina啫!

問及Mina有冇請教佢選港姐嘅心得,FYY就話好多人都有搵佢,其中一個仲係選過國際小姐嘅湯洛晴:「佢都係我朋友嚟,我未選港姐之前就已經識佢,我覺得佢好有潛質。之前做嘢時遇過佢,當時我同經理人引薦過,估唔到一年後佢都真係嚟參選。」