超懷舊!經典明星相機廣告 由張國榮Konica菲林廣告說起!

最強精選

廣告

今時今日智能手機已經大幅度取締相機的功能,就算係數碼「傻瓜機」都愈來愈少人問津,回顧菲林相機面世的年代,其實都試過好受歡迎,不少相機品牌都搵明星拍硬照廣告,當中以張國榮替Konica菲林拍的廣告最令人印象難忘:

文: 東方新地

菲林相機廣告篇——繆騫人 、張國榮、劉嘉玲

數碼相機發明前,相機同菲林簡直係唇齒相依、不可分割,是但冇一樣都影唔到張相。一格菲林等於一張未沖曬的照片,足見菲林係幾咁重要。

周潤發前女友繆騫人 靚樣sell富士感光菲林

1976年第4屆香港小姐「最上鏡小姐」繆騫人,78年替富士F-II400度快速感光菲林拍硬照廣告,佢一副靚爆鏡樣,sell乜都咁掂!當年真係好多廣告商搵佢拍廣告。

「最上鏡小姐」繆騫人
「最上鏡小姐」繆騫人

張國榮身份證引你買Konica菲林

1987年張國榮替Konica菲林拍硬照廣告,將哥哥張相退地key喺張身份證度,sell買新裝「SR-V彩色菲林」,送身份證證件套一個。係哥哥fans都知佢9月12日出生,但張身份證就係8月3日,穿晒崩!

1987年張國榮Konica菲林廣告
1987年張國榮Konica菲林廣告

火紅張國榮誰能代替Konica地位

Konica(柯尼卡)係張國榮1986年演唱會贊助商,同年Konica廣告硬照中,哥哥穿上火紅色西裝手持鮮花,加上親筆簽名極之搶眼,令人想起廣告口號「柯尼卡,誰能代替你地位」(〈Monica〉歌詞),仲有經典電視廣告:

張國榮1986年演唱會得到菲林贊助,你可以想像當年菲林生意額係幾咁龐大!
張國榮1986年演唱會得到菲林贊助,你可以想像當年菲林生意額係幾咁龐大!

劉嘉玲露背誘惑 sell三菱寫真菲林

劉嘉玲1987年11月替三菱寫真菲林拍硬照廣告,嘉玲頭戴聖誕花加大露背,性感到暈!小圖中,嘉玲側邊位就係替廣告影相嘅著名寫真攝影師Kevin Orpin。

劉嘉玲露背誘惑 sell三菱寫真菲林
劉嘉玲露背誘惑 sell三菱寫真菲林

陳慧琳超人姿勢sell富士激光沖印

2002年陳慧琳除替富士拍菲林廣告外,亦拍冲呢個顏色sharp到痺嘅數碼激光沖印硬照廣告,七彩激光由Kelly手掌中發射出去,睇落成個鹹蛋女超人咁款,型呀!

2002年陳慧琳富士拍菲林廣告
2002年陳慧琳富士拍菲林廣告

傳統相機廣告——李克勤、魏駿傑、張衛健

踏入八十年代,相機嘅size變得更輕巧纖細,機仔細細、功能多多,質素亦相當唔錯,自然成為搶購目標,而相機品牌亦好鍾意搵新晉藝人拍硬照廣告。

李克勤高難度動作 調皮sell PENTAX

1989年22歲嘅李克勤,替PENTAX(賓得)PC-505全自動相機拍硬照廣告,個身同頭冇郁過,右手拎住部相機舉向前,左手起勢向後拗,屬C組難度,極之配合廣告slogan「你可知道我也有佻皮的細胞」。

22歲嘅李克勤...
22歲嘅李克勤…

魏駿傑 蛙鞋拍RICOH防水相機

1993年無線上位中的魏駿傑穿上間條背心同蛙鞋,個樣相當趣致,替RICOH(麗確)FF-8WR防水相機拍廣告,成部相機都係水滴,擺明sell防水功能,日曬雨淋都用得。

魏駿傑潛水造型sell 防水相機
魏駿傑潛水造型sell 防水相機

張衛健 同PENTAX相機鬥醒

1994年歌影視三棲發展嘅張衛健,雖然年近卅歲,個樣依然精靈醒目,替全自動相機PENTAX Zoom 90-WR拍硬照廣告時,右手拎住嘅係相機遙控器,唔講仲以為係塊朱古力。

「醒字派」張衛健嘅頭髮⋯⋯
「醒字派」張衛健嘅頭髮⋯⋯

容祖兒扮綠精靈Nikon相機sell色彩

2002年容祖兒替Nikon(藝康)F55相機拍硬照廣告時,頭髮做粉綠色highlight、戴七彩布條頸巾、綠色衫褲,成個綠精靈咁,最特別嘅係Joey隻左手成隻染成綠色,加上鮮黃色手掌、紅色指甲,造型令人印象難忘,而句「採色」slogan亦係一絕!

超懷舊!經典明星相機廣告 由張國榮Konica菲林廣告說起!

容祖兒粉綠色假髮highlight,有啲似蔡康永
容祖兒粉綠色假髮highlight,有啲似蔡康永

到了2003年,以背心短褲示人的祖兒,繼「何苦」及「相當刺激」MV後,再一次與她口中的「明星貓」小丙一起,拍攝最後一次Nikon廣告。 超懷舊!經典明星相機廣告 由張國榮Konica菲林廣告說起!

數碼相機篇——梁詠琪、BOY’Z、鄭伊健

踏入1995年,唔使用菲林、唔使限24或36張相數量、唔使沖曬嘅革命性數碼相機正式發明面世,震驚全世界!正面挑戰傳統菲林相機嘅地位,踏入千禧年質素仲足可媲美大機,而數碼相機廣告亦如雨後春筍,紛紛搵當紅藝人拍廣告或委任代言人。

梁詠琪靴中藏OLYMPUS sell機細賣點

梁詠琪2003年替OLYMPUS擁有500萬像素嘅C-50Zoom數碼相機拍硬照廣告,GiGi展露長腿,將所有人嘅目光集中,然後就會發現佢左腳對靴上有部機仔細細嘅數碼相機,完全貼合「隨意收藏」slogan。

GiGi 左腳對靴上有部機仔細細嘅數碼相機
GiGi 左腳對靴上有部機仔細細嘅數碼相機

BOY’Z跳跳紮 sell Nikon數碼相機

2003年Nikon數碼相機COOLPIX 3100,搵嚟出道唔夠一年嘅二人偶像組合BOY’Z拍硬照廣告,Steven(上)同Kenny揸住相機飛身跳起,動感十足,睇落好似軟硬天師第一隻大碟《車欠石更》嘅造型,一樣咁搶鏡!

Nikon數碼相機COOLPIX 3100係2003年嘅產品。
Nikon數碼相機COOLPIX 3100係2003年嘅產品。

鄭伊健大頭靚樣 sell Canon數碼相機

浩南哥鄭伊健亦唔輸蝕,亦替Canon IXUS數碼相機拍硬照廣告,大大頭一個靚樣,極之搶眼,喺港島區海底隧道入口,亦必定見到呢個廣告;不過,佢趴低揸機究竟影緊乜呢?
超懷舊!經典明星相機廣告 由張國榮Konica菲林廣告說起!

鄭伊健代言Canon IXUS數碼相機多年,由400去到750,合作關係一直良好。
超懷舊!經典明星相機廣告 由張國榮Konica菲林廣告說起!

你仲有冇記得邊個經典明星代言廣告?入嚟 東方新地live 傾下!