《 十八年後的終極告白》阿爸係狄龍 譚俊彥冇特別待遇
譚俊彥 老妝曝光
加入無綫後做過《天命》，即刻接住另一套主演《特技人》播出，仲有去年的《包青天之再起風雲》，呢個收成期譚俊彥都未有得抖吓享受吓，就繼續捱更抵夜日日拍新劇《十八年後的終極告白》。
擔正主角無優待、新娘潭水刑侍候
記者曾在前年劇集拍攝時曾見過譚俊彥同陳山聰喺九龍城同新娘潭開工拍外景，官仔骨骨又高大威猛，譚俊彥換完戲服將雙手擺在身後，爸爸狄龍大哥個霸氣已經出晒嚟。原來除咗霸氣同身型，佢仲學老竇嘅專業態度學到十足，被口罩惡勢力捉咗上車挾持咗去新娘潭、頭笠黑布袋三個對一個撳落水苦刑侍候，全程不知幾投入演出，個頭一次又一次被撳入黃黃灰灰嘅水，連續拍咗好多個take，一除頭套，雖然半個身仲浸喺水度，但達到導演要求，佢仲笑笑口！呢啲咪專業囉！
簽約無綫後辛苦耕耘兩年呢期劇集輪住出街，譚俊彥原來又開緊新劇，日前身在九龍城為《十八年後的終極告白》拍外景。
換晒一身老西戲服，官仔骨骨原來係被人挾持咗去新娘潭苦刑侍候，雙手仲放在背後係被索帶綁實。
劇中譚俊彥做亦正亦邪角色、陳山聰就飾演黑社會頭目，劇集開始時兄弟重逢，陳山聰企埋岸邊指使手下折磨譚俊彥。
實情之唔係演員風光背後，拍戲都要受唔少苦頭囉！譚俊彥被三個口罩黨挾實跪喺水中、蒙頭起勢撳落水，見到都牙煙。
每次撳落水五、六下、拍足五、六個shot，難得譚俊彥毫無怨言，仲笑笑口㖭！
成身濕晒、膝頭跪到入晒泥印，都話演戲係賺辛苦錢啦！
陳山聰晒肌
同場加映，仲有趕住換戲服一邊扣鈕一邊跑去埋位的黑社會大哥陳山聰，日日跑步又操弗，靚腹肌依家唔騷等幾時？
潮山聰即係潮山聰，黑社會大佬造型都走在時代尖端。
簽大台做親生仔 套套劇做男一！譚俊彥 拒靠父上位
現年38歲嘅譚俊彥唔經唔覺入行18年，雖然他是「星二代」，爸爸是資深演員狄龍 (原名譚富榮)，但有指他的知名度不及爸爸，而多年來提起譚俊彥，大家都會加上「狄龍個仔」呢四個字。之不過自前年佢簽約無綫做親生仔，套套劇都孭重飛，包括已出街嘅《天命》、《特技人》，還有《包青天之再起風雲》、《十八年後的終極告白》等！
不過，譚俊彥直言簽大台聽到不少冷言冷語，有人認為他憑什麼擔正做男主角，但他會更努力去工作，證明自己是肯做、有實力的演員，而不是靠父蔭上位⋯⋯
譚俊彥拍《特技人》受傷縫18針
譚俊彥在《特技人》有不少動作戲，例如飛車、爆破等危險場面，但他經常堅持親身上陣，連同劇嘅關楚耀都大讚佢好多戲都好搏，原來拍攝其中一場碌落山戲份，他的手掌被玻璃割傷，當場血流如注要送院治理，傷口要縫18針！
譚俊彥 《天命》做皇帝
早年主力在內地發展的譚俊彥，前年「回歸」香港，簽約無綫成為「親生仔」後，拍首部劇集《天命》已坐正做「男一」，夥拍視帝陳展鵬扮演的和珅鬥智鬥力，有觀眾認為飾演「嘉慶帝」的他穿起龍袍有帝皇風範，但也有網民則認為他太用力演出，略嫌過火！
還有兩部未出街的劇集，包括重頭劇《包青天之再起風雲》及《十八年後的終極告白》，他都是「男一」！
譚俊彥接受傳媒訪問時透露，簽約無綫成為「親生仔」後，不少人都問點解他會拍TVB劇？憑什麼可以演這些角色？公司很多人會𥄫實他，看他到底懂不懂演戲。他說：「我唔敢講我演技好，但至少我會敬業，唔會遲到，每場戲都會做到最好！」
很多人也以為譚俊彥有父蔭，工作上也較順利，容易得到厚待。但他卻情形剛好相反：「以我的嘅身份，去到邊度都唔會有特別待遇，正因為我是狄龍的兒子，反而會付出更多的努力，去證明自己都有實力。」
入行18年 多做大茄
嘅譚俊彥自2000年加入爾冬陞旗下入行，拍咗套梅䒐芳主演嘅《慌心假期》，之後拍過《男人四十》、《少年阿虎》等電影，都只係做大茄。
03年譚俊彥轉戰內地，拍過林峯主演嘅古裝劇《陸小鳳與花滿樓》，以及劉愷威主演嘅《抓住彩虹的男人》等，但大家提起佢，仍然只記得係「狄龍個仔」。
2015年，譚俊彥同內地女演員任祉妍結婚，同年誕下大女譚晴(Renee)，去年再誕細仔譚杺(Rex)，湊夠一個「好」字。
譚俊彥說太太任祉妍是舞台劇演員，受過傳統訓練，工作會給很多意見。夫妻相處少不免有爭駁，但二人會以大局為重，讓一下對方！
上月底，譚俊彥38歲正日生日，他在社交網上載和老婆仔女及爸爸狄龍合照，留言：「Thank you so much for all the birthday wishes ❤（非常感謝所有的生日祝福）」。相中嘅譚俊彥抱住大女譚晴坐喺度，老婆就捉住佢隻手，而狄龍就抱住孫仔譚杺，幸福滿滿！
2018 with ❤
Shaun Tam（@tammerz）分享的貼文 於張貼
狄龍都有幫手湊寶貝孫！
為家人回流香港
2016年譚俊彥由內地回流香港，簽約無綫做親生仔，佢話最大原因係想有更多時間陪屋企人：「我想陪多啲家人，尤其個女(譚晴)，嗰陣(2015年)佢出世冇耐，我就即刻去咗開工，覺得欠咗佢哋好多，同埋我個女喺香港出世，所以想多啲時間喺香港，呢度就算我開到幾點，我都可以攬住佢，同佢哋多咗相處時間，呢樣係大陸拍劇，就算幾多錢都賺唔到。」
