林淑敏

「大小姐」林淑敏失落女配角 獲「送水輝」送花呵番

最新娛聞

廣告

《萬千星輝頒獎典禮2017》結果於星期日出爐,其中朱晨麗爆冷贏得「最佳女配角」一獎,而網民熱捧的「大小姐」林淑敏失落獎項,遭全城鬧爆!雖然林淑敏大熱倒灶,不過就獲戰友們力撐,而好拍檔「送水輝」許家傑更加送上火紅玫瑰呵返,大小姐即時冧晒!

撰文:東方新地
圖片:東方新地、許家傑 Instagram

罕有性感造型

得到網民熱捧的林淑敏,今年憑《愛.回家之開心速遞》大小姐「龍力蓮」角逐「最佳女配角」獎,當晚佢一身高貴晚裝,罕有性感造型現身,白滑長腿一覽無遺!雖然與女配角獎擦身而過,不過頒獎禮後,除了獲網民、好友力撐,好拍擋「送水輝」許家傑更加送上紅玫瑰,留言:「在我心中你已經是最佳女主角」,即時冧晒!

朱晨麗奪「最佳女配角」 遭網民狠批

當晚獲得「最佳女配角」的朱晨麗,得知獲獎後佢表現一臉愕然,之後台上眼泛淚光發感言,除了感激高層支持外,又謂希望從內地來港的小朋友可以打出一片天。但唔少觀眾覺得朱晨麗未夠班,台上一番言論又惹來爭議,總之就唔buy佢啦!

巴辣大小姐彈出

講番獲網民力撐的「大小姐」林淑敏,其實佢多年來獲派的都是閒角,但佢亦默默做好本份,終於等到大小姐這個令人又愛又恨的角色。獲得觀眾讚賞的林淑敏,今年更首次躋身最佳女配角候選名單,而且一直有網民追捧佢成為最佳女主角、民間視后

《愛回家之開心速遞》角色眾多,其中林淑敏(大小姐)與許家傑(送水輝)呢條感情線備受觀眾喜愛!劇中大小姐自小被父親羅樂林寵壞,角色尖酸刻薄又乞人憎,但一遇到送水輝時就含羞答答,層次豐富!

林淑敏拖老公出巡

大小姐成功入屋,現在行出街無人不識,不過林淑敏繼續過其低調生活。早前本刊拍得林淑敏與老公陳中原如常到佐敦返教會做崇拜,之後十指緊扣掃街醫肚。現場所見,林淑敏對老公非常溫柔,老公亦對佢非常體貼。林淑敏與從事建築材料生意的老公於2013年行入教堂,結婚四年恩愛如昔,sweet呀!

 

林淑敏 貼地掃街醫肚

 

 

林淑敏:「出街個個都叫我大小姐」

頒獎禮前,林淑敏曾接受本刊訪問,提到《愛回家》的「大小姐」好出色、好受觀眾歡迎,佢首先多謝大家喜歡大小姐呢個角色,稱自己都有留意網民的留言,另外仲話依家行出街個個都叫我大小姐,佢好似變咗姓大咁!

林淑敏謙稱:「係個角色好啫!」

當時林淑敏表示得到大家認同重要過攞獎,都咗做咁多年,有得提名已經當攞咗獎!另外講到網民封佢為民間視后,林淑敏立即耍手擰頭,謙稱係個角色設計得好,佢只係好彩啫!雖然林淑敏今年無獎,但希望佢繼續努力,演藝事業更上一層樓!

17年密密做

林淑敏2000年參加香港小姐奪「最奪目小姐」,當年冠軍係劉蘊慧,之後便加盟無綫至今,演過無數套劇,但一直只做路人甲乙丙,2011年終憑《真相》的巴辣闊太Emily,令觀眾留下較深刻印象。近月在《愛回家之開心速遞》的大小姐一角,令林淑敏成功入屋,更首次被提名角逐今年無綫「最受歡女配角」。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!