撰文：東方新地 ｜圖片：Instagram

亞視拖足十年終頒發后冠

相信每年亞視最觸目嘅盛事係亞洲小姐競選，每個女仔參選都當然想贏得后冠，然而08年奪得亞軍嘅顏子菲（Belinda）就唔係獲選當晚可以拎后冠返屋企，皆因佢嘅后冠等足10年，到前日（29/11）先送到上手。

顏子菲表示屋企人一直都好擔心佢入咗行後嘅前途，所以佢好想可以拎個后冠返去，畀啲實質嘢屋企人睇。

等咗十年，日前終於獲亞視安排補領亞姐后冠。除咗佢，其實2011年冠軍馮雪冰都有份，當日仲有18年冠軍梁雪瑤、亞軍張右雨同季軍林孜沫在場見證！

后冠係由珠寶店贊助，不過價值相比起港姐后冠就差得遠。亞姐呢個係用水晶製成，價錢值5位數字。而港姐后冠則由880粒鑽石而製，價值400幾萬。

回顧8位亞姐出身的藝人

1.汪詩詩1999年參選

真係唔講都唔記得，原來汪詩詩曾參選1999年亞姐，可惜最終落選！當年18歲嘅佢以汪思絲之名示人，其實樣子到依家冇乜點變，都係有個豬膽鼻及雙厚唇！

汪詩詩2003年同甄子丹於多倫多結婚後，現育有一女一子，身形反而愈來愈正，完全冇晒baby fat，玲瓏曲線弗過唔少後生女！

2.陳煒 1996年冠軍

當年23歲嘅陳煒大熱當選，舉起勝利V手勢樣子同已離世嘅梅艷芳有九成似！因此，煒哥曾於劇集《美麗傳說2星願》及內地劇《梅艷芳菲》中飾演梅艷芳原型，成功演活梅艷芳一舉一動及英姿，獲得唔少觀眾一致好評，人氣高升，奠定亞視一姐地位！

愛性感 晒長腿

最難得係煒哥向來係大方之人，完全唔會吝嗇騷身材，比堅尼簡直係濕濕碎啦！

45歲女人味爆發

煒哥今年11月就踏入45歲，不過身形同樣貌都愈來愈正，難怪老中青粉絲都被迷倒！

演技愈見出色

煒哥近年由亞姐過檔TVB後，演技更上一層樓，喺唔少大台劇亮相，演出深受好評，經常都俾人話搶鏡過啲後生女主角！

3.姚嘉妮 1998年季軍

回到那些年，姚嘉妮1998年參加亞洲小姐獲得季軍，之後成為亞視旗下藝人，至2001年轉投無綫。

那些年泳衣照出土

姚嘉妮出道後星途平平，不過勝在樣貌身材出眾，年輕時拍唔少性感照，其中更唔介意拍含雪條意淫相，可以話係含雪條女星始祖！

《都市閒情》長腿吸睛

無綫節目《都市閒情》觀眾多為家庭主婦，但近年竟多咗唔少年輕觀眾，就係為咗睇一眾索女主持！除了大家都好熟悉的彭慧中外，姚嘉妮亦吸引唔少男觀眾追捧！

激罕性感照重溫

姚嘉妮早年曾為本刊拍過一輯性感照，漁網絲褲肉搏男模，依家睇番都覺得大膽……

肉搏男模

4.伍詠薇 1989年最上鏡小姐

當年只得20歲嘅伍詠薇參選亞姐，被視為該屆大熱，結果於準決賽奪「最上鏡小姐」，並於決賽打入前五名，可惜最後落選。其後加入亞視拍劇，直到1994年約滿後離開轉投TVB。查實伍姑娘後生時真係卜卜脆，皮膚白雪雪仲有少少肉地，真係嗒得杯落！

半百so what?

伍姑娘後生咁索，就算依家年近半百一樣keep得非常好，每次現身都咁明豔照人～

5.萬綺雯 1989年亞軍

萬綺雯(蚊蚊) 當年以半個馬鼻輸俾冠軍翁虹，屈居亞軍！之後加入亞視成為藝員，代表作肯定係劇集《我和殭屍有個約會》中演馬小玲，除將角色演得活靈活現，招牌長腿更係深入民心！

蚊蚊雖然已45歲，但外形卻比出道時睇落更年輕，除了長腿一樣咁誘人外，一臉稚氣樣子更冧盡唔少網民！

萬綺雯離開無綫前最後一部作品《致命復活》，演出令人難忘！

6.羅霖 1991年冠軍

羅霖26歲當選冠軍後，即辭去空姐一職入行！不過代表作反而係轉投TVB後，於《真情》演雙雙而紅極一時。到1996年嫁予富商劉坤銘後育有三子，2012年正式宣布與丈夫離婚。

真係唔似53歲？

53歲美魔女羅霖可算係亞姐中變形變得最驚人嘅一位！睇佢出道時方包面，到依家V字面，刀削下巴愈變愈尖，變臉之謎甚囂塵上。不過佢否認整容，僅表示因出任代言人而打過蛋白溶脂針，又稱沒打過下巴。除臉容變得輪廓分明，身材亦越發玲瓏浮凸，原屬紙板身形嘅佢，忽然波濤胸湧更係耐人尋味！

羅霖亦有份演出早前大熱劇《宮心計2深宮計》。

7.楊恭如 1995年冠軍

大美人楊恭如1995年贏得冠軍及「最上鏡小姐」等四項大獎，更被喻為最索亞姐，翌年參與陳可辛大製作《甜蜜蜜》，同影后張曼玉及黎明做對手戲。

楊恭如近年主力在國內發展，現年44歲嘅佢瓜子臉愈來愈明顯，鼻子變得更高，拍得住楊怡招牌木偶鼻！

大家睇番呢兩張楊恭如嘅近照，有冇發覺有咩唔同呢？

8.吳綺莉 1990年冠軍

吳綺莉18歲當選亞姐冠軍時，兩邊腮骨又闊又大，不過甜美笑容搭夠，當年都算嬌俏可人！

今年就45歲嘅吳綺莉，雙眼反而比以前變得更明亮，腮骨亦變得細小很多，最奇怪係上圍亦升了幾cup一樣，愈老愈索！