陳小春

加碼再拍真人騷 陳小春父子狙擊朱茵母女

最新娛聞

廣告

一年一度,新一輯《爸爸去哪兒6》又開拍,今年湊仔公名單有邊個?內地男演員包貝爾、楊爍、耿樂、仲有范爺范冰冰細佬范丞丞做實習爸爸,卡士歷年最弱對香港觀眾來說好陌生,唯一熟悉面孔係陳小春同5歲囝囝Jasper!

又係陳小春?對!六年來第一次有父子兵冧莊,皆因暖男Jasper上季一鳴驚人成為最受歡迎星二代,今次酬勞再大幅度提升,由2,500萬人仔加碼變3,500萬人仔,湖南衛視為了與暑期推出的《想想辦法吧!爸爸》正面對撼,以小春父子狙擊朱茵母女,真人騷大戰一觸即發!

撰文:東方新地|圖片:新傳媒圖片庫、陳小春IG應采兒IG

陳小春 趁Jasper升小之前最後一擊

出世至四歲一直收收埋埋唔畀見樣,陳小春和應采兒兩公婆去年中突然讓兒子Jasper萌樣曝光,睇在人仔份上兩父子參演《爸爸去哪兒5》。Jasper憑cutie外形加上暖男性格,人氣在同輯星二代中一直領先、又帶挈父母工作量同叫價直線上升,節目尾段,粉絲網民紛紛大嘆不捨。直到上周,第六輯劇組在寧夏開錄現場相流出,小春同Jasper父子竟然亦在陣中,湖南衛視順應民意史上第一次翻炒父子檔。

據知情人士透露,酬勞加碼為賺人仔以外,應采兒確實認為去年的拍攝經歷對兩父子都係一個難得體驗:「以前主要係采兒留港湊仔,小春大部分時間都為工作周圍飛,冇乜時間喺屋企更加冇乜時間同Jasper相處。舊年錄完一季《爸爸》,兩父子感情大增、小春學識同個仔相處,Jasper更加變得獨立咗、生性咗,仲有好多節目畫面唔止感動觀眾同網民,亦都畀采兒睇到呢對父子另一面,佢覺得唔係搵錢咁簡單,呢個 經歷有錢就買唔到。再加上Jasper開學就升小學,雖然係讀國際學校,但都唔想成日請假拍嘢,暑假唔拍等幾時?」

據知,小春父子今次身負重任,因為優酷製作的《想想辦法吧!爸爸》邀請了朱茵與阿Paul帶住囡囡黃鶯出鏡,《爸爸6》即重金禮聘小春父子冧莊上戰場,兩個親子真人騷準備在暑假硬撼鬥搶點擊率。

Happy birthday to my Super Jasper 😘 還好你爸媽都是演員、扮成什麼都不成問題🤣
應釆兒(@yingcaier)分享的貼文 於 張貼

為父子慶生

幫完囝囝慶生,又輪到老公小春51歲牛一,應采兒又係悉心準備大蛋糕為小春慶祝,順手farewell。

父子出發

其實早於個多月前已傳出小春、Jasper父子冧莊《爸爸6》,不過消息有待證實,直到上周二(10日),小春收拾大篋準備出門、Jasper新相就講明係恤個靚髮出發,曲線默認。

外景曝光

父子呢頭出發,嗰頭網上就流出《爸爸》寧夏外景現場相,果然見到小春同Jasper同其他爸爸一齊錄影。

就讀國際學校的Jasper今年6月正式畢業,小春兩公婆認為開學升小之前的暑假冧莊拍多季正好適合。

#畢業啦##叻仔#💯
@Jordan(@jordan_chan_36)分享的貼文 於 張貼

囝囝變獨立

Jasper出世以來,小春負責搵家用、采兒就減低工作量湊仔為主,肯拍《爸爸6》,除咗錢,亦因為采兒覺得本來黐身、柔弱的Jasper被節目鍛鍊得獨立又硬淨,與爸爸之間感情亦因此大增。

應釆兒(@yingcaier)分享的貼文 張貼

長賺長有

拍完上季《爸爸》,除咗2,500萬人仔袋袋平安,惡爸爸被小暖男融化甚至在節目中落淚畫面亦感人肺腑,令一 家三口尤其係Jasper人氣爆燈。

趁住暑假錄完第一輯,湖南衛視循例再食住氣勢拍埋電影版、賀歲版,小春一家三口一概有份參演。

應釆兒(@yingcaier)分享的貼文 張貼

Jasper性格可愛又有喜感大受歡迎,帶挈埋父母成為內地真人騷搶手組合,先後參演《來吧兄弟》、《約吧大明星》及《三個院子》多個綜藝節目。

小春同應采兒同時又被多間廣告商睇中人氣邀請代言,先後夫妻上陣賣過電視同鉑金飾物廣告。

@Jordan(@jordan_chan_36)分享的貼文 張貼

@Jordan(@jordan_chan_36)分享的貼文 張貼

破例接真人騷 朱茵 阿Paul 捧女袋千萬

內地真人騷《爸爸去哪兒》拍了五季深受觀眾歡迎,參與拍攝的明星二代全部都人氣急升,去年陳小春帶住兒子Jasper參加演出後,Jasper即成為內地炙手可熱童星,可想而知這類真人騷的入屋程度有幾勁。早前朱茵阿Paul亦解除防線,破天荒讓女兒參與由優酷製作的《想想辦法吧!爸爸》,節目名雖然只提及爸爸,但實際上卻是全家出動,朱茵才是最關鍵人物,因為參與的五位明星媽媽為了放鬆而组團外遊, 五位明星爸爸就負責帶住仔女長途跋涉去搵媽媽。

早前朱茵一家三口在北京機場出現,由於劇組要分兩隊拍攝,朱茵與其餘四位媽媽同行,爸爸亦要帶住仔女開始進行拍攝,當日朱茵到機場送別兩父女,年紀小小嘅黃鶯知道要暫別媽咪,攬實朱茵喊到收唔到聲,搞到眼腫腫鼻紅紅,十分慘慘豬,朱茵亦忍唔住跪地抱實囡囡喊,最後一家三口更擁作一團。

其實朱茵收到演出邀請後都好掙扎,思前想後先肯應承,據知情者透露,「咁多年嚟朱茵同阿Paul都堅持唔畀個女公開露面,想保護佢唔受傷害,等佢可以過普通人嘅生活,但個女開始長大,始終都要喺香港生活,避來避去都唔係辦法,佢兩公婆亦慢慢諗通,希望順其自然畀佢見多啲世面。前年朱茵孖住蔡少芬參演《偶像來了》及《王牌對王牌》等內地綜藝節目,人氣返晒嚟,工作亦接踵而來,咁啱年初內地製作人想搵香港明星家庭拍《想想辦法吧!爸爸》,幾經辛苦先游說到朱茵出嚟傾,對方好有誠意,因為要全家出動,又係Debbie(黃鶯)第一次公開出鏡,所以酬勞過千萬人仔,不過都辛苦㗎!阿Paul未試過自己對住個女咁多日,要連續24日帶住囡囡穿州過省搵阿媽,對於兩父女都係一個考驗。朱茵覺得呢個係一個好好嘅鍛鍊機會,有錢搵亦幫到阿Paul喺內地嘅知名度,最後亦應承咗,不過因為囡囡嚟緊就要考小學,暑假亦要開始準備,所以拍攝時間唔可以太長,劇組亦應承一個月內放人。」

極速與童黨混熟

黃鶯除了五官像朱茵長得標緻,亦遺傳了父親的藝術細胞,自小喜歡唱歌跳舞,由於出世後頭幾年都由朱茵全力照顧,為了不想女兒有公主病,朱茵賞罰分明絕不盲目溺愛,而黃鶯懂事自理能力又高,前年趁女兒已入讀幼稚園,朱茵開始全面復出,要工作的日子就把女兒交由外婆照顧。本刊記者曾多次目擊黃鶯跟隨朱茵阿Paul外出,只見她乖巧又聽話,而且待人亦非常有禮貌。

節目在上月中開鏡,先後在雲南及成都等地進行拍攝,阿Paul拖住囡囡穿梭多個地方,不時被野生捕獲,平時Rock到爆的阿Paul對住個女冇晒火,全天候慈父上身,形象反差非常之大。從網民放上網的照片中可見,黃鶯已忘記與母親分別的離愁,即使沒有朱茵在身旁,與其他小朋友亦打成一片玩得好開心,而阿Paul則帶女洪郎賣土耳奇雪糕又學插花,做盡以往絕不會公開做的事。猶記得25年前黃家駒在日本上綜藝節目上意外出事,Beyond其餘三子此後對參與綜藝節目都非常避忌,看來有女兒作伴,阿Paul已成功克服陰影。

學插花

賣雪糕

夫妻檔搵人仔

阿Paul父女上陣千里尋妻,反觀以朱茵為首的太太團就舒服得多,見她去完沙漠騎駱駝,又穿民俗服飾與民同樂,其中一日更與洪天明老婆周家蔚去大型超市掃玩具,不用湊女絕對是優差。其實生女後的朱茵復出後只放眼大中華,近年與阿Paul一齊簽內地經理人搵人仔,當年《西遊記》的紫霞仙子在國內依然有市場,拍劇拍電影之餘,仲代言唔少產品,去年更以天價酬勞為國內代言一種傳銷商品女性洗陰棒,為搵人仔接了不少前所未接的工作,包括今次全家亮相真人騷。

去到雲南站,朱茵穿上當地的民俗服飾拍攝,更與當地居民一起跳民族舞。

朱茵近年主力拍劇拍電影參加綜藝節目,阿Paul就繼續搞音樂開騷,論工作量與受歡迎程度,朱茵遠勝阿Paul。不過阿Paul為頭家亦發奮圖強,知情者透露:「為咗個女同頭家,阿Paul講嘢慎言咗,再唔會好似以前咁衝動,依家有內地經理人幫手,佢同朱茵都接落唔少job夫妻檔一齊上,咁樣個價高好多,喺內地知名度好重要,等個真人騷出埋街,阿Paul兩父女都會人氣爆升,到時肯定會有其他騷爭住搵佢哋做。朱茵今次捧女之餘,最大得著應該係捧埋個老公,絕對唔會計錯數!」一家三口殺入內地,錢途無限。

雖然自小被朱茵阿Paul禁曝光,但黃鶯很快便適應面對鏡頭,除了與其他明星二代已混熟,拍攝時要她落手落腳煮麵亦好幫得手,完全冇公主病。

洪氏一家

今次拍《想想辦法吧!爸爸》除了有香港人熟識的朱茵阿Paul一家三口外,還有洪天明與周家蔚一家四口。洪天明要長時間一拖二,帶住5歲大仔洪大仁及3歲細仔洪竟琋去搵阿媽。

家庭樂

趁住真人騷未開拍,早前朱茵與阿Paul帶住囡囡外出享受家庭樂,雖然當日落大雨,但有媽咪朱茵擔遮擋雨,黃鶯笑住上嗲哋車好開心。

女兒奴

一家三口在九龍城廣場飲完茶,再由阿Paul帶囡囡去室內遊樂場玩,對住可愛又跳脫的黃鶯,阿Paul明顯無力招架,畀阿女氹到心花怒放,笑瞇瞇做其私人攝影師。

婆婆身教

唔止朱茵阿Paul教女有方,就連朱茵媽咪都以身教湊孫,早前黃鶯由婆婆接放學後去公園玩,見到有小男孩跌倒受傷,黃鶯驚到攬實婆婆腳,後來在婆婆鼓勵下上前問候小男孩,非常有愛。

親力親為

自女兒黃鶯出世後,朱茵把家庭放在第一位,家中大小事務都盡量親力親為,早前她駕車到寓所附近買生果,即使有外傭跟車,但她依然親自落車親手揀,之後才返上車等,遇上本刊記者,更大方揮手打招呼。

接放學

雖然前年開始復出,但朱茵仍非常著緊女兒的校園生活,不用開工時她堅持去學校接放學,閒時又會與女兒一起砌puzzle、跳舞及唱歌,難怪黃鶯最黐媽咪。

朱茵與阿Paul為培育女兒花了不少時間與心機,阿Paul為囡囡的改變也不少,一家三口曾被本刊記者影到暢遊廸士尼。對於黃鶯想有個妹妹,已46歲的朱茵表示隨緣,不會強求。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!