吳廷燁

《無間道》「張Sir」吳廷燁 57歲寡佬買豆腐過年

最新娛聞

廣告

同梁朝偉係老死的吳廷燁,在電影《無間道》拍住偉仔及劉德華演高級督察,在電視版《無間道》一樣孭重飛,是劇中骨幹人物,穿梭於社團法律顧問羅嘉良同黑警羅仲謙之間,近日劇集殺入結局篇,長期在內地工作的吳廷燁亦返港宣傳。57歲單身寡佬,吳廷燁由之前的半山寓所,搬入黃大仙鳳德邨公屋居住,出入坐小巴,更一連兩日一個人在寓所附近街市買豆腐做晚餐,又到九龍城買平價衫,慳家樸素!

撰文:東方新地
圖片:新傳媒圖片庫

吳廷燁 唔想嘥錢

老死係影帝梁朝偉,吳廷燁在圈中人緣甚廣,拍住一班兄弟張耀揚、鄭浩南、吳毅將等,在內地有唔少工作,不過,近年吳廷燁冇再租住之前半山寓所,反而搬入鳳德邨公屋。據知情人士透露:「壽仔(吳廷燁暱稱)呢幾年都主力喺內地做嘢,好少時間喺香港,唔想嘥錢,所以都冇再租屋住,搬咗返去黃大仙鳳德村公屋,唔使返內地工作,就會返屋企陪老人家。」

齋睇唔買

日前,吳廷燁一個人到九龍城逛街,唔知係太低調定唔想畀人認到,當日打扮由頭包到落腳,戴帽又戴口罩,旁人根本不會察覺他就是近日在電視劇《無間道》熱爆人物張Sir,寡佬生活似乎唔太講究衣著,吳廷燁唔行名店,反而揀在九龍城買出入口店平衫,近期天氣時凍時熱,見他不停在一間平民服裝店揀大褸外套,但揀了一大輪,似乎都冇收穫,齋睇冇買的他就行去等小巴,傍晚五時多正值放工時間,迫滿人等車,他足足等了一個小時,等了幾班車才成功上到小巴,搭車返到鳳德邨公屋樓下,吳廷燁上樓前先行去附近的街市買餸,見佢相當熟路直接去豆腐檔買了兩磚合共八元的豆腐,吳廷燁更唔行正門走捷徑兜去屋邨後門撳密碼入內返上樓。

單身的約定

吳廷燁同梁朝偉丶周星馳及吳鎮宇同是無綫第11期藝員訓練班出身,雖然發展不及三位影帝,工作總算長做長有。除了近日熱播的電視劇《無間道》,他在網劇《PTU機動部隊》亦有參演一角,雖然外形剛烈,但吳廷燁性格隨和,因此圈中人緣甚廣,同大班同期的圈中好友經常有聚會,當中唔少得當年在亞視年代與他是熒幕情侶的張文慈。張文慈更曾經公開表示:「如果第時大家都未結婚,可以考慮一齊!」吳廷燁亦表示對張有好感!據知情者透露:「Pinky(張文慈)同壽仔好friend,以前拍劇,收工梗送Pinky返屋企,但因為大家都唔主動,又驚冇咗呢個朋友,所以冇行多一步,但佢哋依家仲keep住聯絡,好關心大家!」

張文慈:唔想失去呢個朋友!

記:本刊記者 張:張文慈

記:你同吳廷燁有冇拍過拖?
張:真係冇,不過講都冇人信,連我啲朋友都唔信,話冇可能。
記:你哋演情侶好合襯又深入民心?
張:可能係,我同佢真係拍過好多部劇, 都係做情侶。
記:同佢仲有冇聯絡?
張:大概一年見一次!我哋都有common friend,不過,成日話約,但因為大家都忙,始終好耐先約到,上次見佢都成年之前嘞!同埋雯女(鄧萃雯)同蚊蚊(萬綺雯)一齊。
記:嗰時日日對住,收工又送你返屋企,又互有好感,其實點解冇開始嘅?
張:我諗係我哋太好朋友,當時因為唔想失去呢個朋友,所以都唔敢行多一步。

記:佢話對你有好感!同佢仲有冇發展可能?
張: 嘩!我冇諗!我哋係有聯絡,會問候大家近況!但大家都忙,好多時都約唔到!
記:有冇見過佢屋企人?
張:咁就冇!但我知佢有個高齡嘅媽媽,佢為咗照顧媽媽,都唔拍拖!依家好少有咁孝順嘅男人,佢仲會喺屋企煮飯畀媽媽食!有一次我想約佢,佢都話唔得,因為要喺屋企煮飯!佢真係好孝順!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!

關鍵詞
無間道