撇女二人世界 郭富城 降呢冧老婆
撰文：東方新地｜圖片：新傳媒圖片庫、郭富城IG、方媛IG、微博
郭富城 回鄉再擺酒
上年娶完老婆又做埋老竇，郭富城半年內升呢做人夫兼人父，完全被方媛收服變愛妻號，行動勝於一切，雖然上年四月已經在半島酒店大排筵席完婚，女兒Chant九月亦出咗世，不過城城就非常細心，為氹老婆及畀足面外家，今年六月底城城陪老婆方媛飛家鄉安徽蕪湖南陵縣補擺喜酒，更放下天王身段，一身樸實簡約打扮完全融入老婆家鄉拜會鄉親父老，只見城城表現興𡚒不停舉杯親切招呼親友，就算被在場親友狂影，亦毫無架子舉V笑晒開心到四萬咁口，郭天王有幾錫老婆可想而知。
事實上，工作檔期排得緊密的城城，知道老婆怕悶亦唔反對城嫂限量地工作。三月方媛產後首度復工出席美髮產品活動，城城更派出經理人小美全程傍實老婆，相當細心。據知情者透露：「城城始終工作太忙，怕Moka (方媛) 湊女辛苦，專登接埋岳父岳母嚟香港住，喺寓所樓下租多個單位，方便佢哋照顧個女又可以湊孫，佢知道老婆仲好大癮想做嘢，亦唔反對城嫂間中做吓Model，只要唔太辛苦唔影響湊女就得！」
分享湊女喜悅
一向低調的城城，過去極少談論家人，但自從有咗小公主Chant，城城完全被女兒融化，每次出活動，都會開心分享湊女喜悅，他就形容女兒大眼睛似自己：「抱住囡囡，就好似湊住迷你版嘅自己一樣，感覺好微妙，呢一刻家庭好圓滿。」日前城城出席活動，提到囡囡快將一歲，城城表示向公司申請假期陪女慶祝。以往工作狂的城城，現在工作完畢，即歸心似箭趕返家陪囡囡玩。
密做追仔
天王變住家男，十月就53歲的城城亦想盡快一家三口變四口，開行Turbo追多個仔湊個好字，不用開工就爭取時間努力造人。據知情者透露：「佢寧願自己辛苦啲，點忙都要攝時間陪老婆去玩，四月結婚一周年，佢雖然拍緊戲，都專登請假，陪咗老婆去杜拜旅行慶祝，一嚟趁機享受吓二人世界，加上去旅行心情特別放鬆希望可以快啲造人成功，依家有個女，佢都想快啲追多個仔！自從佢做咗爸爸，佢發覺有咗小朋友有種特別幸福嘅感覺，一家人湊住BB嗰份開心真係難以形容，特別佢媽咪湊孫不知幾咁開心！始終老人家都想有男孫繼後香燈，所以城城都有啲心急想老婆快啲陀B，了咗媽媽嘅心願！」
巡迴造人
快將展開100場「舞林密碼」世界巡迴演唱會，城城已計劃盡量帶埋老婆出埠做騷順便環遊世界造人，廿四孝好老公日前不用開工，就撇甩囡囡陪老婆外出二人世界撐枱腳，兩公婆到灣仔歎辣蟹，離開時城城手上仲攞住大袋外賣，唔知係咪打包返去畀媽媽及岳父岳母享用，行去攞車期間，城城更十指緊扣拖實老婆行，幸福閃爆真係好燦眼！
城城揸機街拍
@mokafy 分享的貼文 於 張貼
做咗幸福人夫，城城同老婆拍拖遇上記者亦唔再避忌，拎住大袋外賣上車的他，同老婆好有默契大方任影。
唔使老婆操勞
城城上到車，先放好外賣再放好自己個背囊，然後準備開車，完全唔使坐喺隔籬嘅老婆操勞一刻。
名店掃貨
自從娶咗老婆，不時會見到城城陪老婆方媛行名店，之前又影到城城陪老婆買鞋，錫老婆錫到燶！
北京宣傳
有妻有女的城城，早前聯同發哥去北京宣傳電影《無雙》，但仍一有時間就回港陪老婆同囡囡。
今年三月城嫂產後復工出席活動，城城經理人小美全程傍實。
愛妻號
同內地嫩模方媛拍拖兩年去年成婚，郭富城對細22年的方媛一直錫到燶。
回鄉攞酒
六月底專登返老婆位於安徽蕪湖南陵縣的家鄉補擺喜酒，穿著Polo恤的城城打扮簡約貼地，完全放下天王身段招呼方媛內地親友，大方任影還舉V字手勢，十分風騷！
陪買宵夜
擺完酒當晚，城城深宵再被網友捕獲，陪老婆方媛去便利店買雞腳宵夜。
帶見法王
去年10月，城城帶埋產女坐完月的老婆方媛，出席薩迦赤津法王為香港新塔澤堪中心舉行的開光及灌頂儀式。
包場睇戲
15年同方媛拍拖不久，城城已在上海包場同女友睇戲，天王變浪漫暖男。
晒唔停
成為天王嫂的方媛飛上枝頭，由𡃁模變闊太生活無憂，得老公城城愛錫的她不時在社交網晒幸福。
遊艇出海
今時唔同往日的方媛，除了帶挈父母入住城城大坑豪宅外，坐遊艇出海都係等閒事，早前方媛就開心po出坐遊艇出海照，雖然未有影埋老公城城，但見她舉V晒勝利手勢，就知城嫂幾幸福。
露小手
農曆新年方媛放出抱住女兒的照片，雖然女兒只露出一隻小手臂，已經夠閃。
晒幸福肥
有城城陪返家鄉補擺喜酒，方媛返港即開心大晒幸福，留言話食肥咗要健身減肥。
抱女放閃
今年母親節，又大晒抱女背影，仲留言話「囡囡已經識叫媽媽了！」
@mokafy 分享的貼文 於 張貼
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
