李偉健與圈外女友結婚 結束15年愛情長跑！
撰文：東方新地｜圖片：Instagram、微博
李偉健與圈外女友結婚
現年39歲嘅李偉健昨日與圈外女友阿寶正式結束15年愛情長跑，終於拉埋天窗！二人於銅鑼灣筵開22圍大宴親朋，兄弟團由《愛》劇嘅演員李霖恩、周嘉洛、阮政峰及新郎哥以前從事漫畫嘅舊同事組成。
婚宴中，有唔少親朋戚友到場祝賀，當中當然唔少得《愛》劇嘅一班演員啦！「大小姐」林淑敏、「送水輝」許家傑及阮政峰幫手做司儀搞氣氛，而胡渭康與鄭世豪則上台表演，個個出心出力！
劇中演Terry舅父嘅KC歐瑞偉仲帶埋老婆去飲呢餐，而陳榮峻同吳香倫亦一齊到賀！
李偉健於圈中人緣極好，呂慧儀仲帶埋囝囝「蟹籽」去飲，而其他賓客仲有劉丹、單立文都帶埋太太去飲，仲有湯盈盈、樊奕敏、羅樂林、姚瑩瑩等，相當熱鬧！
藝人吳雲甫因忙於工作，畀低人情就走，佢表示識新郎哥咁耐都係呢個女朋友，仲大爆對方好驚女朋友，昨日就最威，因本身諗住打個招呼擺低禮就走，但李偉健話捉埋老婆出嚟影相，笑言應該係佢識對方咁多年唯一一次直接指令老婆，認真搞笑！
李偉健於婚宴中上台向太太發表愛的宣言，情深款款同愛妻講：「我愛你！有10蚊畀9蚊你！要你幸福快樂！」，令新娘子一度感動到講唔到說話，仲喊咗出嚟。
李偉健提到婚宴最難忘係同太太出場時，胡渭康唱《為你鍾情》首歌嘅嗰一刻，而太太亦好鍾意鄭世豪唱《聽你說願意》。
李偉健透露自己嘅求婚經過時，稱將之前兩人去旅行時拍攝嘅短片加入花同戒指嘅卡通特效，令女友知道佢有意求婚，最終成功結束呢段愛情長跑，至於現時心情就既開心又疲累。不過娶到個好老婆，幾赲都抵啦！再次恭喜「Terry」小登科！
延伸閱讀：
Terry黐實51歲胡渭康 靠大叔擴闊朋友圈
《愛‧回家開心速遞》Terry李偉健同KC歐瑞偉譜出忘年大叔似層層曖昧關係就話係劇情需要，又食正日劇《大叔的愛》熱潮，實情Terry戲裡有大叔緣，戲外單身多年亦一樣嚮往與同性朋友畫至愛水彩漫畫消磨時間。最近在Terry個人社交網，他與同劇演員、51歲胡渭康曝光率突然激增，據知情人士透露，未婚又冇另一半阻手阻腳，Terry與同樣愛好健身又貪靚的胡渭康特別傾得埋，自然投緣。
Terry李偉健遲起步知名度又一般，有得同資深藝人發展友誼，Terry特別殷勤又肉緊，知情者說：「就嚟40歲先憑處境劇叫做有人識，Terry知道keep住個勢對事業發展幫助好大。」
續指：「日日喺電視台趕劇冇得擴展交友圈，所以同胡渭康一拍即合後，Terry都好識做，噓寒問暖、一齊食一齊玩又約埋一齊健身，始終胡渭康入行三十幾年、識咗幾輩圈中人，呢啲忘年朋友真係交得過！」能成為密友總帶著愛，唔同年代都可以打破隔膜。
《愛回家》Terry化身IT狗題材超貼地
之前《愛回家》講到做咩職位都失敗嘅Terry被舅父KC安排加入IT部。
好彩Terry有自知之明，一早講定自己只係識開機同關機，畀足心理準備Ivan。
Ivan就向Terry講解部門日常運作，點知Terry講咗句大眾對IT人嘅誤解：「我以為IT部好得閒添，日日都有好多時間打機！」
之後Ivan就介紹三位同事，分別叫Keyboard、CPU、Mouse，全部都同電腦有關。而佢哋都無同Terry打招呼，只係閃閃縮縮咁望咗Terry一眼。
Terry好唔識做咁問：「佢哋個個著衫Style都差唔多，係唔係制服，我係咪都要跟住著？」，令幾位同事即刻喺手機到鬧爆Terry！
Ivan教Terry整電腦口訣：「Check吓啲制，再Reboot部機就搞掂，唔使同人解釋點樣整返，如果整唔掂就講啲懶係深奧嘅IT術語，拎部電腦返IT部搞就得喇！」
Terry真係做到好成績，成功幫熊若水整返部手提電腦。為咗更加融入IT部，佢決定唔再著華麗嘅西裝，轉為著格仔恤衫、成為活脫脫嘅毒男，仲改咗自己個名做Wi-Fi。
之後更搞笑嘅係，一向熱愛演戲嘅Terry竟然講講吓嘢話唔慣面對面同人講咁耐嘢，真係唔只外表改變，性格都改埋。
有次威龍百貨畀黑客入侵，令到沉默寡言嘅IT部同事終於大開金口講嘢！
之後Ivan仲化身「IT狗」，帶領一眾下屬同黑客決一死戰，之後仲出現咗Matrix一幕！
IT部日以繼夜咁工作終於成功清除到所有病毒！
其實今集《愛回家》係想道出IT部嘅辛酸！因為現實世界裡面做IT嘅人就被叫人IT狗，上至修理電腦，下至換燈膽都會叫IT人幫手搞掂。Ivan講咗句：「我哋唔好咁快就否定自己嘅專業，總有地方需要我哋。記住，我哋係IT人，唔係IT狗！」
網民睇完呢集之後，都即劇大讚Terry演技，希望佢真係搵到啱自己嘅職業，更有網民表示自己係IT狗，題材貼地寫實又有共嗚！
