江若琳婚紗相曝光 江若琳：著住件婚紗都幾感動

撰文:東方新地 |圖片:新傳媒圖片,江若琳IG

江若琳婚紗相曝光！

江若琳第3度為婚紗店代言，以往的拍檔是王浩信和蕭正楠，今次終於由真命天子蕭潤邦（Oscar）成為拍檔，難怪Elanne份外興奮。Elanne說：「入行多年，拍戲、廣告，其實我都穿過10多次婚紗，以前沒有什麼感覺，只覺得是戲服一件，今次拍檔是未來老公，終於覺得原來著住件婚紗都幾感動，以及會好期待睇相。」

我只不過是江若琳❣️（@elannek930）分享的貼文 於 PDT 2018 年 6月 月 4 日 下午 11:12 張貼

今次拍攝地點在香港，問到Elanne和Oscar之後仲會否去外國再影婚紗相？二人話一定會：「我們喜歡去旅行，所以今年每去一個地方，都會影相，有些好生活化、有些好正式，想有多些不同照片留念。」

江若琳 由細到大似白紙

30歲江若琳入行近11年，問佢覺得自己發展點？佢話：「我覺得OK，幾滿意，可能大家眼中覺得好坎坷，成日都起起跌跌，但我又覺得都算幾好，同埋我覺得個天要我經歷咁多嘢，可能係因為我由細到大太似一張白紙，唔知呢個世途係點，如果唔係我呢十年間遇到咁多嘢，我唔會咁快去成 長、咁知足。我依家係好知足、好隨遇而安，如果我嘅路一路順暢，我可能有更好嘅發展，但我唔會開心，因為唔係我覺得好快樂嘅生活模式。」

講到同前經理人公司嘅合約官司，江若琳表示：「仲未了結，都keep住處理緊。因為我係處於被告嘅狀態，我係好被動嘅一方，互交緊啲文件，你都知司法程序好漫長。都使咗幾多錢嘅，無辦法啦，佢要嚟嘅，仲可以頂咪繼續頂落去，依家我仲可以有呢個魄力去頂得住，可能佢成為我嘅動力㖭，要處理呢件事，咪努力啲做嘢。」蕭潤邦補充：「但冇影響佢繼續行嘅路或者我哋要結婚、生仔。」江若琳續說：「工作一路都好正常，好多謝客戶朋友一路畀好多工作機會我，可以繼續做我鍾意做嘅嘢。」

開到佢本身係咪睇得開嘅人？江若琳苦笑謂：「唔係呀，係訓練出嚟，我絕對唔係睇得開嘅人，所以我曾經有段時間病得好緊要，突然間啲衝擊湧埋嚟，我擋都擋唔切。我未遇到佢(蕭潤邦)或者未經歷咁多嘢之前，我係唔開心，原來我係好強迫去話畀自己聽我 係好堅強、好硬淨，可以頂得住所有嘅風浪，但我其實係好脆弱、好冇安全感嘅人。」

拒絕妥協

江若琳直言：「有律師團隊問過我，點解我遇到咁多嘢都唔放棄，我話就係因為我遇到咁多唔公平嘅嘢，我更加唔想放棄，因為我要證明畀所有睇錯我嘅人，話畀佢哋聽，你哋曾經睇錯我，如果我默默咁離開，咪即係對咁唔公平嘅世界妥協囉。我係比較硬頸嘅，都幾戇居。」

江若琳又剖白過去面對負面新聞時嘅感受：「每一次嘅新聞都係封面、大大鑊，完全瞓唔到，每日等天光等啲報紙、雜誌出，最慘畀人屈，出到嚟又唔喊得，因為公司會叫唔好喊、唔好講錯嘢，每日都好似驚弓之鳥，依家點解咁開心，因為我鍾意講乜就講乜。」

講到有次記者喺塊鏡影到佢走光，上晒即時新聞，原來對江若琳嚟講只係好小事：「我畀人影咗走光係唔開心，但對於我嚟講已經係好小事，因為佢未至於破壞我嘅人格或者聲譽，我係好有原則同底線嘅人，我試過有啲封面一張相都冇、生安白造，畀人監生砌生豬肉，我試過問個記者點解咁寫，佢話因為個故事好睇， 純粹為賣書。」

蕭潤邦 望生意發展快過加租

蕭潤邦離開咗娛樂圈後，同期出道嘅周柏豪、陳柏宇都發展理想，問佢有咩感覺？佢話：「最緊要搵到自己開心嘅路，我覺得飲食好適合我，同埋千祈唔好比較，因為你永遠唔會見到人哋嘅努力，好似我依家有員工問『點解佢成日唔做嘢，你升佢？』我覺得唔需要去監管人做得好定唔好，最緊要做好自己，人生一定有好多機會。」

講到點解做飲食？蕭潤邦答：「我阿爸以前做廠，所以我一路都想做生意，做完歌手嗰段時間，我去咗上海，做模特兒工作，我以為自己好高，但去到上海casting，發現我係最瘦最矮嗰個，我就諗咁落去都係死路一條，開始留意有冇乜嘢可以帶返香港做，我住嘅地方樓下賣緊生煎包，我每日落去食，我問自己點解咁鍾意食，原來香港冇咁嘅形式賣生煎包，嗰時冇乜錢，喺旺角搵咗個一百呎嘅地方做立食，所以我成日都講，上海畀咗兩樣嘢我，一個係生煎包，一個就係佢。」

問佢事業有咩展望？蕭潤邦表示：「其實每個做飲食或者零售嘅人，得同一個方向，就係掙扎，除非買咗個舖，否則發展、生意永遠主宰喺個租金度，如果墨守成規做三、五年，佢一加租，間舖就執得嘞，所以我希望我嘅發展快過加租，就可以避過租金嘅災難。」

睇翻江若琳初出道07年曾推出寫真集《Paradise Of Colour》。

當時的江若琳20歲未滿，真係又pure又true！

江若琳 親力親為宣傳

去年四月至公開戀情，發po表示「找到對的人」，江若琳同生煎皇發展迅速，今年1月選擇在Oscar生日當日公布埋婚訊，又鐵定今年12月23日在紅磡筵開40席舉行盛大婚禮。雖然仲係未婚夫妻身份，不過江若琳呢個「生煎皇后」身份已經走都走唔甩，兩口子今年初開始籌備的中式麵店4月26日(上周四)正式開張，店名仲打正旗號叫「堅信號正宗上海生煎皇后麵館」，換言之有生煎皇子之稱的Oscar打埋本又出動埋金漆招牌力撐江若琳做皇后！

Oscar：打本如買戲飛！

據悉Oscar生意愈做愈大，又一向性格大男人，無論開新舖定結婚，Oscar都堅持包辦全部使費。Oscar接受本刊電話訪問時就謙虛表示同江若琳無分彼此：「就好似情侶去買飛睇戲一樣，唔通要計邊個負責買飛咩？我哋都就嚟結婚係一家人，唔係咁計囉！最重要係佢做呢間舖唔係講玩，真係全心全意參與飲食生意。至於結婚，我覺得中國人傳統社會都係咁，男人負責搵場地，女人會包辦細節，最緊要真係畀到佢一個夢想婚禮。大家都係唔好太集中講錢！」

放閃升級

現時要拍戲、登台又要兼顧新舖，未婚妻忙到無暇分身，Oscar話見到都心痛：「見佢咁辛苦，有時要出門登台，我都盡量放低生意想陪喺佢身邊。佢對我嚟講係一個小朋友，出遠門會擔心，見到佢以前好似鐵漢咁好危險嘅工作都接都會肉赤，我哋都鍾意小朋友，結婚後就真係攞正牌造人，都叫咗佢危險嘢、要去太遠時間同太長嘅工作婚後都唔好接！」簡單嚟講，即係唔使做等老公養啦！

近日江若琳仲同蕭潤邦飛到馬爾代夫預支蜜月。

兩人仲喺各自IG不停花式放閃！