陳敏之

生招牌懶理股東糾紛 陳敏之湊仔忙送禮勤

最新娛聞

廣告

一年容易又中秋,又係手作曲奇餅店老闆娘陳敏之變身送禮勤幫自家餅店增加曝光之際。今年同往年又有些不同,有份投資的曲奇餅店早前被入稟高等法院申請清盤,連日登上港聞版。陳敏之淡淡定接受本刊電話訪問,表示事件全屬股東間的財務糾紛,公司正常運作、送禮勤繼續出動,仲話上咗寶貴一課,繼續對進攻商界有熱誠又有動力,繼餅店後,又正在物色新舖、又有新搞作籌備緊!

撰文:東方新地|圖片:新傳媒圖片、Instagram

陳敏之 心情未受影響

陳敏之嫁得富貴,老公係燈具公司老闆,兩年前又生埋寶貝仔雷子樂,榮升靚媽,不過婚後陳敏之並唔甘心做幸福少奶奶,餵緊人奶已經復出拍攝《溏心風暴3》,兩年來一邊湊仔一邊拍劇,仲一邊積極參與旗下曲奇餅店工作,身兼多職。呢期幫無綫拍緊兩線劇集《鐵探》同《解決師》,又要忙住餅店中秋宣傳工作,難得萬能媽媽敏之一樣抽到時間陪阿仔,日前就被 本刊發現抱住囝囝,由司機接載到九龍城歎墨魚丸粉。

年尾囝囝就滿三歲,敏之接受本刊電話訪問時自爆係九龍城墨魚丸粉名店忠粉,當日接埋囝囝放學去朝聖:「阿仔一歲開始返playgroup,今年仲返緊兩間,我同佢都好鍾意食嗰間嘅墨魚丸粉,老闆娘又好錫佢,成日會請一碗仔畀子樂食!」至於開業三年的曲奇餅店近日都算係多事之秋,前排因為廣州分店招聘內地專才廣告搞到有網友不滿,月初再被前股東入稟高等法院申請清盤。據悉股東多擴張又極速,餅店因此有股東對於公司生意方針有異議,致搞出退股入稟風波,不過敏之只屬眾多股東之一,既然事不關己,自然仔照湊、劇照拍,繼續安守本份做好餅店生招牌,趁住中秋,梗係變身送禮勤,老友同事拍劇拍檔人人有份永不落空!

狂送月光寶盒

雖然有股東糾紛搞到曲奇餅店被申請清盤,不過敏之就話對公司生意全無影響,臨近中秋,餅店仲大手筆搵專人設計月光寶盒月餅禮盒,生招牌陳敏之更人人有份,周圍送畀拍檔老友,除咗下列咁多位仲有唐詩詠、胡杏兒等有份收禮。

𝕊 ℍ 𝔸 ℝ 𝕆 ℕ ℂ ℍ 𝔸 ℕ 陳 敏 之(@sharonchanmanchi)分享的貼文 張貼

閨密嚴淑明、黃潼

Louis Yuen 阮兆祥(@yuenlouis)分享的貼文 張貼

《溏心》舅父仔阮兆祥

𝕊 ℍ 𝔸 ℝ 𝕆 ℕ ℂ ℍ 𝔸 ℕ 陳 敏 之(@sharonchanmanchi)分享的貼文 張貼

《解決師》男朋友唐文龍

𝕊 ℍ 𝔸 ℝ 𝕆 ℕ ℂ ℍ 𝔸 ℕ 陳 敏 之(@sharonchanmanchi)分享的貼文 張貼

《富貴門》老竇許紹雄

陳敏之:唔會怕咗做生意!

記者:有冇因為舖頭最近糾紛影響心情?

陳敏之:完全冇!之前都對外回應過,係其中一個股東問題,一定搞得掂,總之間舖頭就係好健康正常運作咁,我唔想講太多,因為始終股東 中我係高知名度,件事搞到上報紙,都係因為我。

記者:官司依家去到咩階段?

陳敏之:其他股東搞緊,因為唔係我問題,所以交咗畀佢哋處理,係處理中,好快搞得掂。

記者:會唔會怕咗做生意?下次搵股東要小心啲?

陳敏之:梗係唔會!唔係我錯,又唔係其他股東有問題,係其中一個人個別情況。我覺得大家都上咗一課,學到啲嘢,下次做生意有啲問題就會更小心處理、更加要搞得清楚。

記者:要拍劇要湊仔又要顧生意會唔會兼顧唔到?

陳敏之:唔會,對於做生意呢樣嘢我都仲係好有興趣。其實餅店以外我都搵緊 舖位搞緊其他嘢,等遲啲落實先至通知大家。今次精簡啲、拍檔人數少啲,希望繼續喺商場學吓嘢!

同場加映:《溏心3》同唐文龍激戰

加入無綫17年,39歲陳敏之曾於11年憑《怒火街頭》演「索腿天后」奪「最佳女配角」,今年再下一城,憑《親親我好媽 》有份競逐視后,而產後復出的《溏心3 》,近日更引起網民熱話,成為全劇焦點!首被安排加入《溏心3》演出,敏之唔介意做被非議的小三角色,要勾引人夫唐文龍﹐做咗人妻人母,大膽程度更勝做女嗰陣。據知情者透露:「自從舊嗰班花旦走晒,眼見阿田定欣已經上晒位,自己喺TVB已經17年,敏之覺得呢個都係好時機要突圍而出,所以有機拍《溏心3》,佢真係好搏,知道有好多情慾戲,好似同唐文龍有床戲要除剩個bra,又要被摸胸,連場激咀場面,但因為知個角色好大發揮,佢都豁出去投入去做,最緊要做到出嚟有話題夠份量夠noise去爭獎!」

冇同老公備案

不過話晒老公係圈外人,未必能接受老婆演出咁大膽,敏之事 前更冇同老公備案,就係唔想有太多顧慮。好友爆料:「最初佢都擔心老公會介意,所以事前佢都冇同老公講個角色有咁多情慾戲,依家拍完,佢先同老公講番,仲叫老公如果真係頂唔順就唔好睇!重產後兩個月,陳敏之即接拍《溏心3 》,最唔捨得當然係寶貝仔雷子樂。據知情者透露:「啱啱知道有咗就接到呢個劇本,雖然知道生完要即刻開工,但係敏之覺得難得拍到《溏心3 》呢個劇,而且個角色仲咁有發揮,佢好快就決定接拍,但話晒個仔啱啱出世冇耐,佢真係好唔捨得,加上嗰時仲餵緊人奶,開工仲已經冇覺好瞓仲要泵奶,然後搵工人送返屋企,好彩有媽咪幫佢照顧個仔,佢先至放心。」正因為產後不久就要同唐文龍埋身激戰﹐她更一度擔心會滲奶。敏之笑說:「唐文龍胸肌太勁啦!壓落嚟個心口抖唔到氣,嗰時我又谷緊奶﹐拍時幾驚會滲奶!」

未試過演得咁盡

陳敏之喺《溏心3》晚晚同唐文龍肉搏,敏之老公同唔嬲咩?敏之接受本刊記者訪問時直言老公冇睇到激情戲,敏之都勸佢唔好睇,笑言怕睇到會爆血管而非呷醋!

:喺《溏心3》入面,你個角色好大回響,有冇信心攞奬?
:真係冇諗過獎嘅問題,自己亦都冇乜大信心,反而係個角色得到大家關注,自己好開心。
:最初接到劇本,係咪已經知道有咁多情慾戲?
:都知嘅!但當然冇咁細緻,家豪哥好細心同我分析個角色,呢個角色係好有發揮,我未試過演出可以演得咁盡,唔單止係講情慾戲,本身個角色係有好多內心戲!鋪排帶出好多訊息!個ending大家更加唔會估到!

:係咪一睇到劇本就決定接?
:我一路都好鍾意睇《溏心風暴》,冇諗過自己會有機會演出,今次係一個新加入嘅角色,好難得有一個咁多發揮嘅角色畀我,所以都好快決定接!嗰時唯一係擔心自己啱啱生完BB,狀態夠唔夠好。
:係咪個角色都好難演?
陳:一嚟係,加上自己啱啱生完BB ,都好擔心個狀態可唔可以適應到,好彩到開拍嘅時候,自己已經坐完月,身體狀態恢復得好好,咁知道要做呢個角色,自己亦有keep fit,好彩依家出嚟效果都唔錯,唔覺自己肥!

敏之:老公冇睇,好彩老爺奶奶開通!

:咁多情慾戲,老公有冇睇?
:佢有追《溏心3》嚟睇,不過嗰啲戲(情慾戲)佢都盡量避開唔睇,老公冇睇到激情戲,我都勸佢唔好睇,怕睇到會爆血管而唔係呷醋!咁啱呢兩集,佢都出咗街,咁我都怕尷尬嘅,都唔想一齊睇,都有叫佢不如出街啦!我媽咪有講笑話:『你因住畀你老爺奶奶鬧呀!』咁我就話老爺奶奶好開通㗎,好明白事理,知道我做緊戲,佢哋唔會鬧嘅!
:拍之前係咪冇同老公備案?
:我哋都一齊十幾年,佢好支持我嘅工作,其實大家好有默契,唔會專登講拍啲乜嘢,好似有時啲衫性感啲,亦唔會專登講,佢覺得有唔妥就會開聲!咁佢都知道係演戲,唔係真實嘅我!

:同唐文龍拍時有冇尷尬?
:一般觀眾以為床上戲好容易拍,又問會唔會尬呀!首先投入咗角色完全唔會尷尬,同埋你哋見到浴室嘅戲好凍,大家著好少衫,大家會諗點樣先拍得靚,我哋前面有好多攝影師、好多人圍住,其實唔係好似外間諗到得兩個人嘅事!其實每場戲我哋都會事先傾好先拍,因為要做到恰到好處唔可以過火,自己都好努力去揣摩角色,加上啲情慾戲都係擺到好後先拍,大家已經熟絡咗,咁我哋都好專業,唔會尷尬!
:嗰時BB啱啱出世,會不會覺得犧牲咗湊B嘅時間?
:始終做咗呢行咁耐,我都習慣咗,一拍劇就會好忙,不過因為嗰時自己餵緊人奶,係會辛苦啲,因為每幾個小時就要泵一次奶,好彩監製導演同啲演員都好體諒我,而且泵完奶個人係比較攰!雖然嗰時每日只係瞓得三個鐘,但大家一齊拍戲好開心,完全唔覺辛苦!

《性在有情》 同樣大膽

事實上,近期陳敏之接拍劇集,角色大都非常大膽,人妻婚後完全冇底線同顧慮。同張兆輝合作嘅《性在有情》,要做性治療師嘅角色,為此約見真正嘅性治療師攞資料,劇中亦有多場床戲。努力沒有白費,陳敏之憑《溏心3》提名無綫頒獎禮的「最佳女配角」,又憑《親親我好媽》角逐女主角,好友透露: 「《 溏心3 》係台慶重頭劇,隨時係頒獎禮大贏家,敏之個角色楚楚可憐又多發揮,敏之最想呢個角色攞獎。」

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!