英皇與天下一合作開拍十部港產電影 推動香港電影業

編輯：東方新地 圖片：東方新地相庫

集香港電影業精英團隊 共創港產電影新動力

有見及此，英皇電影與天下一電影製作有限公司宣佈攜手合作，雙方公司將於兩年內合作製作及發行共十部港產電影，希望在這個非常時期，為香港電影注入新動力！

十部電影當中主要於香港本地取景以及聘用本地電影工作人員，以確保今次合作能夠為香港電影業界帶來實際支持，亦達到繼續拓展本地電影業市場及發掘電影人才之效。同時，該十部影片涵蓋驚慄、懸疑、愛情、喜劇等不同片種，望能為觀眾提供多元化的選擇。

雙方已正式簽訂協議及正密鑼緊鼓進行籌備工作，積極與不同的業界單位聯繫，當中包括資深而富有經驗的演員及新演員，幕前幕後精英電影製作團隊，希望今次合作可以於下半年度開始拍攝製作，好讓電影從業員能盡快回工作崗位。

對於是次合作，天下一電影方面表示：「希望藉着今次合作，可以發掘更多有質素劇本拍攝製作。天下一一向注重培育香港電影幕前幕後的新一代，希望為香港電影帶來新力量新方向，打造香港電影全新格局。」

英皇電影方面亦表示：「眼見香港電影業因為疫情停擺，電影工作者因為停工而經濟狀況陷入水深火熱之中，面臨嚴重人才流失的問題，感到十分惋惜。今次英皇電影跟天下一電影不謀而合，以實際行動支持香港電影，期望協助本地電影業盡快復甦。」

是次英皇電影和天下一電影攜手合作，希望團結業界力量，繼續展現香港電影魅力！

而英皇藝人都表示支持，望與業界同步走出艱難時期。

英皇藝人上下一心 大表支持

蔡卓妍阿Sa得知英皇與天下一合作十部電影，她謂：「疫情下，好多行業，包括電影業，好多人都要停工！希望呢個合作可以令到人人有工開！帶動成個電影業， 保持到每年香港嘅電影拍攝同上映嘅數量，同時又可以推動本地電影，盡快可以重回軌道。」

鍾欣潼對此回應時謂：「好開心公司同天下一合作推動本地電影，在疫情下，香港好多行業，包括電影業都好慘，今次合作可以令到電影業同業有開工，同時又可以推動本地電影，希望香港同電影業盡快復甦！」

今年獲英皇電影「疫市」加簽合約的陽光型男楊天宇謂：「我覺得今次英皇同天下一的合作對香港業界係有一定的幫助，不論係台前或幕後。同時亦都可以滿足到觀眾嘅慾望，因為無論係咩時候我相信觀眾睇電影嘅慾望都唔會減低嘅。因為我自己性格較外向，所以陽光青春及搏擊類的，較刺激的題材都會是希望拍到的題材。其實天下一亦有同自己年齡相近的演員，希望籍此機會可以交流交流。」

李靖筠：「當然好開心可以同唔同嘅公司合作啦！希望擦出新嘅火花，至於想拍啲咩戲，我仲係一個好Green嘅演員，所以我自己係唔想咁快去規限自己，咩種類嘅戲都好想做。 」

陳家樂：「咁當然係好事啦，兩間公司聯手去創作十套港產片去幫返香港市場，係非常之好嘅，呢個時勢好多台前幕後嘅工作人員，都的確係有好大嘅影響，我自己本身都有幕後嘅朋友，呢段時間都要轉行做其他唔同嘅工種，其實人才流失真係會㗎，依家有呢十套電影，希望可以幫返多啲人去做香港電影，去保持產量同質素。我自己希望嚟緊可以拍多啲喜劇，因為喜劇可以令人開心啲，依家香港都需要一啲好開心嘅能量，希望可以透過電影入面俾到開心嘅氣氛香港人。」

湯怡：「公司同天下一合作梗係覺得非常之好啦！因為我相信近期行業一定受到影響，如果電影界嘅話，一來產量少咗，演員嘅機會相對又少咗。疫情關係，大家都選擇留喺屋企，戲院又閂埋，困咗幾個月之後，到戲院重開返，大家都會想有啲選擇，同有啲娛樂。至於想拍咩類型嘅電影？我相信我會選擇喜劇，因為近呢幾個月，我相信大家嘅心情唔會特別開心，所以希望拍番啲有正能量，令香港人會覺得輕鬆嘅電影。」

衛詩雅：「好開心有呢個消息，因為我覺得兩間公司合作首先會有唔一樣嘅火花，二來就係如果開十套咁多，我覺得無論對演員或者電影工作人員都係一個好好嘅消息，因為起碼有工開，確實呢幾個月來，好多電影都停晒，大家都好擔憂，所以好支持呢個計劃。當然如果減片酬可以幫到，絕對係願意減片酬啦！同埋依家積極搵多啲好劇本，拎返公司，睇吓公司有無興趣，絕對支持！」

家怡：「知道呢個消息當然係好開心，好支持啦！好開心知道佢哋有呢個行動，希望快啲多啲人可以開工，同埋希望可以拍多啲唔同題材嘅戲，除咗商業片之外亦都會拍一些藝術性質的戲，透過電影故事帶出各種訊息俾觀眾。」