趙希洛

趙希洛演Mean精彈出 石油大王千金起底

最新娛聞

廣告

07年參選港姐入行的趙希洛,發展機會跟同屆的黃智雯及王君馨差一大截,多年來在無綫只演閒角,更有「御用癲婆」之稱,不過,希洛在新劇《棟仁的時光》演巴辣mean精被網民like爆成功彈出,搶盡同劇演員風頭。

演技大獲好評,趙希洛隨即被大起底,劇中要假裝有錢人,現實中就正正有個富爸爸,父親趙崇康是澳洲石油大王兼大律師,身家以億計,母親梁小玲是昔日無綫資深演員,家住8千萬梅道,屋企有司機,趙希洛名副其實隱形女筍盤。

不過多年來密冚家底,趙希洛唔想人知屋企富貴,本刊更發現其日常生活離不開去街市買餸及到寓所附近跑步放狗,生活平實貼地,難怪瞞足十年石油千金身份至今才曝光。

撰文:東方新地|圖片:新傳媒圖片庫、趙希洛IG

趙希洛 獲網民勁讚

趙希洛兩年前擔正女二在《超能老豆》演賢妻良母已經被網民like爆,近日憑《棟仁的時光》巴辣兼刻薄高層阿嫲,演技出晒位被網民追捧彈出,隨即被迅速起底,原來趙希洛父親趙崇康大有來頭,有指他在澳洲經營石油生意,是當地華裔富豪兼大律師,在澳洲有唔少物業,現仍掛兩間上市公司職銜,包括市值四千多億的中國海洋石油任職非執行董事及天大藥業董事,在國內人脈亦廣,是隱形富豪,媽媽梁小玲則是前無綫藝員。不過,家底豐厚的趙希洛,從不show off,一直密冚富家千金身份。據知情者透露:「咁耐以嚟,Candice(趙希洛)好少提屋企,有時同事載佢,問佢住喺邊,佢會話住喺中上環附近,叫人喺金鐘港鐵站放低佢就得,真係冇乜人去過佢屋企,而且佢唔會成身名牌,就算用名牌袋,都係萬幾二萬嘅款,隨時啲OL都用得貴過佢。」

父母反對入行

選港姐出身,但原來父母一直反對趙希洛入行,07年以碩士身份參選港姐,都是瞞著父母先斬後奏。她接受本刊記者訪問時坦言:「我拗唔贏佢哋,當時未滿十八歲,我攞住張form想報讀澳洲嘅演藝學院,但爸爸媽媽唔贊成,話一定要完成大學課程先,我就去咗英國讀Law,當年返嚟參加選美,都係瞞住佢哋,但其實我唔係想做港姐,只係鍾意演戲,當時覺得參加選美可以有機會接觸呢個圈拍戲,所以之後有機會讀訓練班,已經覺得好開心!」

愛女心切

父母反對原因其實是出於愛女心切,怕女兒捱更抵夜太辛苦,加上認為娛樂圈工作不在個人掌握之內。「佢哋覺得呢行好講運氣,好多嘢唔係自己控制到,就算係最靚最有演技,都未必一定有機會,而且佢哋覺得呢行成日要捱更抵夜好辛苦,但我太鍾意演戲嘞!亦因為咁堅持到依家。」雖然放棄做律師,但趙希洛承認讀法律課程的確令她擴闊視野。「我都好多謝爸爸媽媽,讀Law嗰幾年係學咗好多嘢,就算睇合約都識得點樣同人傾,冇白讀到嘅!」

唔評價演技

捱足十年,事業終於轉入直路,問他父母對她是否支持多咗,趙希洛表示:「我哋唔會專登講呢個話題!而且媽咪唔會評價我嘅演出,因為佢唔係讀Drama,佢以前係做《歡樂今宵》,做開綜藝節目,我就係演劇集,同媽咪行嘅路唔同。不過我好好彩,好多Auntie見到我演出後有好嘅feedback,都不停鼓勵我。」當提到被起底是石油大王千金,趙希洛即時封嘴:「屋企嘢唔講嘞!真係想Focus喺番工作度,花咗十年時間,自己好努力,亦希望人哋可以睇到我好用心去做。」

生活貼地

家底豐厚,不過趙希洛並不嬌生慣養,代步的寶馬亦只是三十多萬的平實款式,日前,她到鑽石山出席完《棟仁的時光》宣傳活動,一個人去停車場攞車,收工竟然唔係去行名店或者約人high tea,趙希洛卻揸車去九龍城街市買餸,唔怕污糟在街市穿梭買完牛肉又去魚檔揀魚,攞住幾袋餸再揸車返家,生活相當貼地。而另一日,趙希洛不用開工,就一個人去寓所附近放狗,話晒係港姐出身,keep fit是常識,放狗之餘亦乘機做運動,只見她企埋石壆拉筋,之後就拖住狗仔一齊在寶雲道來回跑了兩圈,才拖住愛狗慢步離開。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!