姊妹幫口催婚 鄧麗欣台灣置業等嫁王子

撰文：東方新地 圖片：新傳媒圖片、Instagram

鄧麗欣 台灣置業等嫁王子

16年同方力申分手,單身兩年的Stephy 雖然傳出過同排球隊教練小牛撻著,又傳過同方力申復合,終於去年初遇上真愛,得好友應采兒牽線同台灣棒棒堂成員王子發展姊弟戀,無懼六年年齡差距異地分隔,拍拖兩個月,已經愛得癡纏同飛蘇梅島為王子慶生定情。

陪足兩日慶生

完全畀王子溫柔溶化的Stephy 亦一改以往低調作風,同王子拍拖以來就不停放閃,兩人在IG不時留言傳情,上年10月Stephy 35歲生日,她更選擇飛到台灣搞飲品店開幕,趁機會男友,王子還為她大搞神秘生日會。據知情者透露:「自從同王子拍拖之後, Stephy 簡直好似初戀感覺返晒嚟!因為王子性格溫柔又夠浪漫,成日會講甜言蜜語氹佢,係女仔都鍾意畀人錫畀人呵護啦!上年Stephy 生日,王子連環送驚喜幫Stephy連續兩日慶生,除咗約齊大班朋友一齊慶祝,又安排一日過二人世界,諗得咁周到咁細心, Stephy 點會唔冧吖!」

講到明計劃將飲品店發大嚟搞,近期Stephy 便密飛當地睇樓睇舖,據Stephy 好友透露:「信義區係旗艦店,佢一早計劃喺台灣唔同地方再開分店,呢排就密密喺嗰邊睇舖,已經計劃喺男友南港住所附近開第二間店,佢對嗰邊啲樓都好有興趣,睇舖之餘都有睇樓,佢真係想喺嗰邊落地生根!」

即興註冊都得

好姊妹吳雨霏及楊愛瑾都先後成為人妻人母, 35歲Stephy 亦開到口隨時閃婚:「唔需要安排太多,順其自然,可以即興去做登記都得!」原來恨嫁Stephy 還經常安排男友跟好姊妹聯誼,等王子感染家庭歡樂氣氛,而且王子極喜歡小朋友。據知情者透露:「Kary 同Miki見親王子,都會幫口催佢哋快啲拉埋天窗,又話要有仔趁嫩生,佢哋咁落力,都係想好姊妹感情快啲修成正果!」甘為男友移船就磡,又有好姊妹幫拖,Stephy 閃嫁有跡可尋!

姊妹幫口催婚

媒人應采兒,亦有為蜜運中的Stephy同王子撥行大葵扇,如果兩人戀情修成正果,呢封媒人利是肯定走唔甩。

同遊歐洲

今年九月,二人分別獲邀出席米蘭及法國時裝周,是兩人公開戀情後首次同場現身,更趁機孖住歐遊。

拍拖未夠一年,Stephy 同王子早已見晒家長,又同雙方朋友打成一片,據悉好姊妹楊愛瑾及吳雨霏,分別都有和 Stephy 及王子飯敘,每次見到王子都有幫口催婚!

神秘生日會

飲品店開幕揀正在 10月 14日生日前夕,Stephy 攞正牌飛台灣過生日,男友更為她連續兩天慶生,單係一個生日蛋糕已令Stephy冧爆,留言連蠟燭款式都讚埋,認真甜到入心!

王子比心心

同王子拍拖後,Stephy 亦變身王子品牌代言一樣,不停狂谷男友出品的服裝、產品,就連電影煞科,亦要提吓王子先安樂,比老闆王子更賣力宣傳!

帶挈處男歐遊 鄧麗欣厚禮冧王子

今時今日，一個鐘機程往返台灣香港又算得係咩異地戀?有心又夠癡纏，就可以好似 Stephy 同王子呢對一樣，幾忙都實攝到位會一會。雖然脫離方力申後演技戲路大躍進,戲接戲檔期排到密麻麻,Stephy 一樣有能耐製造機會同王子見面，8 月中，王子飛到香港陪過七夕，之後 Stephy 被傳媒影到人肉速遞上王子寓所;到九月踏進巴黎時裝周，一樣無阻牛郎織女飛去歐洲拍番一個星期拖!

姐姐帶挈升呢

出道18年，Stephy形象正面，尤其近年戲路擴闊更被提名金像影后，所以一向深受各大時裝品牌喜愛，年年巴黎、米蘭時裝節一定被奉為上賓受邀到當地睇騷參與活動。據知情人士透露，今年撞正公布新戀情，亦都一手促成新歡掹車邊有得去歐洲睇埋一份:「 王子知名度喺台灣同內地雖然唔錯,但係始終拍劇都係偶像劇、台客本土味濃，除咗當地年青品牌，真係未試過同咩國際大牌有合作。今年被 Stephy 認愛真係幫咗佢人氣唔少，而且 Stephy成日會買禮物畀王子，又幫手出吓主意轉吓形象洗甩陣台客除，今次有得去法國都係Stephy提議同幫手拉攏，身邊朋友都覺得今次 Stephy 拍拖完全唔同以前咁內向，專登放閃似係想幫王子一把!」王子靠女友升呢， Stephy 重拾戀愛感覺，各取所需，難怪一拍即合。

首度七夕

雖然相差五年又分隔異地，不過 Stephy對呢份情明顯投入大量心神與時間，戲接戲一樣可以成日見，今年 8月更於七夕當天共度放閃。

讚完靚仔讚可愛

去巴黎順度拍拖，王子不停晒「女友視角」畫面，還將雞尾酒誤當水果茶，Stephy留言讚完王子「帥哥」，再讚男友「可愛」，想閃盲人對眼咩?

衝出亞洲好風騷

綜藝節目男團出身的王子出道 12年活動範圍都只限於東南亞及中國內地，今年初一搭上Stephy即時知名度大增，29歲仔亦因此首次踏足歐洲。

17歲出道，王子一頭招牌「棒棒堂」頭娘味濃，棒棒堂熱潮過後事業亦停滯不前，近日終於因為新戀情有突破。

狂晒名牌

衝出歐洲的王子，在IG不停晒名牌上身，Chok到爆!

同遊凱旋門

Stephy為陪首次歐遊的王子，化身自由行 去凱旋門觀光,再各自po相上IG。

豪遊三地

身為時裝周常客，Stephy早於上月起飛展開歐洲三國之旅，風騷放上機場起行照時，王子亦第一時間按讚。

鄧麗欣高調哂愛

幾個月前鄧麗欣（Stephy）於個人社交網分享一張攝於紐約嘅街景相，唔好以為係張平平無奇嘅相，其實仔細睇之下就會發現成張相嘅重點原來喺條街名度！皆因Stephy所影嘅除咗係大廈外，仲有街道名「Prince St」，唔通Stephy睹名思人？

Stephy更留言指：「天大地大 人來人往 彼此 走上了同一條道路上 不早不晚 不慌不忙 就在我抬頭的一剎那。」似乎係想暗示自己喺對的時間遇到對的人！

網民紛紛留言

有網民就為街道名「Prince St」作出幾個解讀，例如有網友就解讀成「王子街」、「Prince和st（Stephy）」、「Prince&Stephy Tang」等。

罕有高調示愛嘅Stephy就不斷被網友指佢公開示愛好sweet，亦有留言祝佢幸福，似乎唔少人都為Stephy搵到現實中嘅白馬王子 而感到高興！

男友秒速回應

不過，另一重點係王子喺Stephy po相後，瞬間已經秒速like咗個post，仲留言話：「C W L」有網友睇到都即刻話二人太閃！

「C W L」點解？

但見到王子留言嘅「C W L」，唔少網友紛紛留言求「C W L」嘅意思，有網友就話：「網絡上寫說是在說自己的名字」眾說紛揉，小編都好想知係點解呀！

另一邊廂，王子於個人社交網晒咗一張半裸騷肌相，網民除咗大讚佢身形靚爆，有腹肌又有胸肌外，仲有人留言話佢已經有女朋友，唔好咁暴露啦！

早前，Stephy喺出席活動時，默認同前棒棒堂成員王子低調發展中。其後，Stephy嘅「老豆」杜汶澤於個人社交網上載與王子嘅合照，留話表示「我鐘意」！