馮德倫罕有發布閃光彈 舒淇甜蜜發相回禮 粉絲:「等了好多年啦!」

撰文 : 東方新地 | 圖片 : Instagram

馮德倫罕有發布閃光彈 舒淇甜蜜發相回禮

馮德倫Instagram一向都發布黑白主題嘅相，而日前罕有Po出同老婆舒淇合照。從相中見到馮德倫負責揸機自拍，而舒淇就喺後面，用一張疑似係餐牌嘅紙遮住半塊臉，兩人對眼都好似甜到有蜜糖流出嚟咁!

有好多網民都馬上留言，畀晒心心Emoji，仲叫佢哋Post多啲合照添!

老婆舒淇應該都覺得好Sweet喇! 所以都喺自己Instagram到「回禮」。

二人戴上鴨嘴帽，著住綠色情侶衛衣，雖然兩個人無身體接觸，不過都令到粉絲們大叫:「等了好多年啦!」

回顧二人當時宣佈結婚

2016年，當時40歲的舒淇與42歲的馮德倫(Stephen)在9月3日宣布結婚，並向傳媒發出結婚啟事，震驚整個娛樂圈！兩人在布拉格為新片《俠盜聯盟》開工，更即興拍下多張甜蜜婚照，隨即在網上瘋傳，在各大平台洗版，人人都替佢哋高興！婚訊傳出後未有現身的Stephen日前在網上大晒婚戒，而且兩人打算築新婚愛巢，睇中淺水灣一個近二千呎的豪宅！

當年大家都不斷見到舒淇同Stephen的婚紗相，舒淇表示婚紗係H&M 2014年送俾佢的，而頭紗係在一家婚紗店隨意挑選。而新郎另一套西裝同舒淇粉紅色裙，係臨拍照前兩天在街邊買，認真隨意！舒淇更表示婚照由台灣知名攝影師林炳存操刀，對方一周前收到舒淇柯打，即掉低手上工作陪一對新人飛去布拉格拍攝！

二人更發表結婚啟事，跟大家分享喜悅！文中提到，今次結婚雖然係好突然，但其實只想簡簡單單辦婚事，所以唔會有結婚派對，而Stephen笑言係毫無反顧娶舒淇，決定相互糾纏一輩子，所以「我們結婚了」！簡單幾句，已令人好感動！最後，舒淇同Stephen補充多句，目前尚未懷孕，想先享受二人世界！

兩人宣布結婚後，男主角Stephen一直未有現身，不過在微博上水，上載咗兩張在布拉格的開工照並留言︰「謝謝媒體和朋友們的祝福。正在森林裏趕拍戲。Thank you all so much！」相中見到戴上黑超的Stephen型爆咁倚着一棵樹，手持對講機似係落緊Order，不過亮點其實係佢手上的婚戒！

舒淇同Stephen既已成為夫妻，當然要搵愛巢齊齊過新婚生活啦！其實佢哋拍拖期間，女方家住港島南區南灣，而男方則住在貝沙灣，距離唔算遠，所以不時到對方家中共聚甜蜜時光！不過兩公婆就當然要有自己愛巢，據知當時舒淇對淺水灣情有獨鍾，已經睇中該區一個近二千呎的豪宅！

二人台灣愛巢大到蕩失路?

舒淇同老公馮德倫自2016年宣佈婚訊之後，據知佢除咗喺淺水灣睇中咗一層豪宅之外，仲喺台灣內湖區以新台幣7000萬（約1700萬港幣）高價買咗一個二千幾呎嘅單位。

平時佢哋兩公婆因工作需要都會周圍飛，好少會長時間停留係一個地方，所以舒淇喺香港、台灣、泰國、北京等地都擁有自己嘅物業，簡直係四海為家。早喺多年前，舒淇喺台灣豪宅地段內湖區買咗二千幾呎層樓，新婚之後首次返台灣嘅舒淇，又忍唔住喺同一地段豪擲7000萬新台幣買多一個單位。

根據內地媒體公開嘅照片，大廈外觀雖然非常奢華，但新居內部裝修就行歐洲簡約風，以白色為主色，既寬敞溫馨。另外仲有空中花園、小型高爾夫球場等娛樂設施，交通又方便，更重要嘅係保安系統完善，私隱度極高，連羅志祥、梁文音等藝人都有喺嗰到置業。