馮盈盈犯三宗罪被掟入雪櫃 神隱近兩個月終於上水：從春天的幸福中醒來

馮盈盈失踪近兩個月終蒲頭

自從上個月傳馮盈盈因三宗罪被雪藏的消息後，她不單止絕跡電視框，就連一向活躍分享自己的社交平台亦水靜河飛！終於繼2月2日大年初二向網友恭喜發財之後，3月26日正式上水，在IG分享靚靚側面，寫道：「從春天的幸福中醒來」，久等多時的粉絲亦紹紹留言表示「等你好耐」、「我好掛住妳」、「開心到成個人醒左跟住感動到想喊」，似乎TVB已經將雪櫃中的馮盈盈解放出來！

睇返之前馮盈盈被雪藏的報道：

現年27歲馮盈盈近來不但大騷或劇集都未見其蹤影，有指其有份主演的《逆天奇案》落實開拍續集，但馮盈盈慘被out﹗有指馮盈盈唔聽話，犯下三宗罪﹗

第一宗罪，為公開戀情同公司意見不一

之前馮盈盈和醫生男友分手後，被指撻著大隻主播鄭衍峰，馮盈盈想公開戀情，有指遭公司禁止，但馮盈盈仍不時孖男友高調放閃，與無綫就此事鬧分歧，令關係一度僵持，其後馮盈盈同鄭衍峰分手，事件才淡化下來﹗

第二宗罪，玩虛擬幣有違內地禁例

馮盈盈最近踩入NFT市場，推出自家設計的水晶手鏈，並以虛擬貨幣「以太幣」交易，由於虛擬貨幣的相關活動在內地屬非法金融活動，一律禁止﹗無綫與內地有緊密的合作，又相當重視內地市場，所以馮盈盈此舉相當踩界，會觸及禁地﹗

第三宗罪，為保助手唔聽無綫話

馮盈盈2020年開始聘請私人助手，有指其助手經常陪伴出席活動時，便趁機集郵及貪小便宜去搲著數，有指無綫方面為顧及馮盈盈形象，勸她辭去該助手以免影響其名聲，但馮盈盈卻當耳邊風，屢勸不聽﹗馮盈盈兩年前剛請助手時出手闊綽，帶助手去名店揀聖誕禮物﹗

拍檔陳展鵬回應：女仔休息多啲，唔係好易殘

陳展鵬出席《鐵拳英雄》宣傳時被問到劇中拍檔馮盈盈被飛出《逆天奇案》續集一事，陳展鵬坦言有聽過呢個消息，因為好多人打來向他求證，陳展鵬接受傳媒訪問時表示未收到劇組通知，笑言被飛出局可能是自己，其後卻話：「依家疫情咁嚴重，係咪真係按原定計劃開拍都未知﹗」提到馮盈盈近來被消失，陳展鵬句句精彩話：「之前太忙，想休息咋，之前睇親劇集都見到佢，綜藝、廣告都見到佢，女仔要休息多啲㗎，唔係好易殘㗎﹗」

無綫力捧22歲宋宛穎取代FYY

有傳無綫對馮盈盈的多番唔聽話感到很不滿，大大削減其工作，並怒掟她入雪櫃﹗並且力捧其師妹、應屆港姐冠軍宋宛穎取代她，近日有份主持「冬奧」的宋宛穎，被讚口齒伶俐，對答大方，無論身材、樣貌、學歷及口才都表不俗，最重要夠聽話，絕對有能力取代師姐馮盈盈﹗

重溫：《逆天奇案》谷胸博盡演出 被狠批演技浮誇、扮鬼妹好作狀

馮盈盈在《逆天奇案》比女主角林夏薇更「搶鏡」，不過被網民批演技浮誇又作狀，得兩個表情一劇到底，連講英文都造作過人，指她瘋狂加入R音扮鬼妹仔，聽到好礙耳，令觀眾眼耳同告受罪，馮盈盈有自己一番解釋﹗

馮盈盈《逆天奇案》一號表情冏樣睇到厭

馮盈盈飾演的Ana是一名黑客，為查「殺虎案」協助陳展鵬破案，馮盈盈低胸短打性感打扮去埋魏豐集團副主席陳少邦身，結局篇戲份全集中在她身上，早前一集全集幾乎她個人騷，可惜被網民狠批為表現自己，而用力過度，批評她演技未夠班，面部表情太過浮誇，連眼神都浮張過人，但來來去去得兩個表情，一係八字眉冏樣一係擘對大眼，觀眾睇到厭。

馮盈盈被批「佢個人就係浮誇」

網民狠批馮盈盈「太作狀」、「演中學舞台劇咩對眼係咁擘大做乜？」、「好假又造作﹗」、「點解差過反黑路人甲咁多」、「博表現玩突出，反而適得其反」、「睇陳展鵬好入戲，一配馮盈盈突然變咗兩個世界嘅人，立即投入唔到」。

網民批馮盈盈拖累陳展鵬

馮盈盈二號表情碌大對眼最浮誇

馮盈盈被批說話含糊不清

馮盈盈唔止演技被批評，網民更指她咬字不清，太多懶音，為演飾外國返來的女子，講英文便瘋狂加入R音，有網民指「唔係下下加R音就係外國人，好造作﹗」、「廣東話又唔正，講英文又刻意拉長個尾音同大聲，同後期配音又唔夾口型」、「演啞妹可能會好啲」、「一聽到佢把聲就想熄電視」、「點解佢演戲都係做番自己，聲大大拉高八度，嘈到死以為睇緊《後生仔》」

網民：大大聲R音講英文

馮盈盈被質疑講錯對白

《逆天奇案》香港和大馬同步播放，有網民對馮盈盈講對白與字幕不符感到好奇怪，更質疑她講錯對白，馮盈盈在其中一集話：「想當年我行走『漿湖』」而字幕是出現「想當年我行走江湖」，有大馬網民留言問馮盈盈係講錯對白，更指是「配音惹的禍」、「在電視聽到時感到怪怪的」、「我以為我聽錯﹗」不過有網民解釋「行走漿湖」是港人說法，不過同樣被質疑指馮盈盈外國返來，應該不懂地道說法，總之大家對馮盈盈表現有很多不同意見﹗

馮盈盈親回網民負評

被網民力數三大宗罪，更指聽到佢把聲便想熄電視，馮盈盈自有一番解釋，她指本身角色係「令人討厭」，佢話：「個角色係唔好討好，介入陳展鵬同林夏薇，抵鬧啦， 所以換個角度睇，被觀眾鬧係意味住成功啦﹗」