高Ling高海寧為賺人仔內地拍戲雙腿滿佈瘀痕

拍到雙腿瘀晒

高海寧在無綫拼搏十二年，終於爬上女一之位，今年更是她的收成期。在港發圍的同時，高Ling挾著內地劇《三十而已》在內地同樣人氣急升。現身處北京的她，原來被《三十而已》的製作人睇中，為她度身訂造角色，在網絡電影《Tan Tan害我分了手》擔正女主角，同台灣型男張書豪飾演一對。高Ling見事業有新發展自然會份外投入，早前向來有豆腐Ling之稱的她，為拍攝一場攀石戲，明知自己有畏高都堅持親身上陣，最後搞到雙腿滿佈瘀痕，相當可憐，睇嚟人仔都唔係咁易賺！

高Ling高海寧為賺人仔內地拍戲雙腿滿佈瘀痕 — 北京天氣寒冷，包到冚的高Ling完成隔離正式出關。

內地爆紅笑住去執金

其實咁多年都靠自己的高Ling為了供兩層樓養全家，賺少啲都唔掂，眼見國內遍地黃金，當然笑住去執金。08年參加港姐入行的高 Ling，由最初以34D身材為焦點，到近年專注拍劇磨練演技，終獲無綫力捧脫離「花瓶」之列，今年密集式劇接劇，由六月起先後播出的《殺手》、《迷網》、《反黑路人甲》及《 C9特工》，觀眾幾乎發夢都見到高Ling。

高 Ling拒做花瓶終於做出好成績，在內地及香港的人氣都極速提升，成為無綫當家花旦。

在無綫十二年終於捱出頭來，高Ling今年曝光率超高，劇接劇演活多個角色，演技大有進步，在內地劇《三十而已》的客串更受到關注。

甩拖後醒覺獨力孭樓養家

全球疫情雖然仍未受到控制，不過高 Ling成功打入內地市場，不想錯過任何一個良機，毅然冒疫北上，知情人士透露：「高 Ling咁多年都專注拍劇，終於有機會返內地，佢對眼發晒光，同鄧智偉分手後，高 Ling覺得自己浪費咗好多時間，所以佢今年加緊搏命，開完 turbo拍晒香港嘅劇，難得無綫肯放佢返大陸三個月拍劇，唔止會拍劇，仲會有好多商演同綜藝節目，食到呢條水高 Ling有排做，就算去同返都要隔離，佢都覺得值得。」

與音樂才子鄧智偉地下情五年，今年初爆分手，高 Ling此後工作第一，早前鄧智偉爆出桃色糾紛，高Ling未有因被對方背叛而踩多腳，器量盡現。

高Ling先後開通多個國內社交網而且非常活躍，不時在抖音做直播，最近又轉玩大熱的小紅書，帳戶一開通已有近十萬粉絲。

近年鮮有騷D cup身材的高Ling，卻在社交網中穿上性感 Bra Top倒奶教做運動，又狂扭籮柚大跳蛇舞。

高 Ling愈戰愈勇，北上發展潛力無限，近月她先後開通了多個國內社交網，頻頻上載視頻與網民互動，倒奶教做運動又跳蛇舞，全力吸粉。知情者說：「高 Ling係孝順女，屋企以前環境麻麻，所以佢好早就出嚟做嘢孭起頭家，除咗要養父母同內地嘅婆婆，兩個讀緊書嘅細佬都要供書教學，聽講佢除咗五年前上車做業主買咗油塘層樓，早前佢仲買多間樓畀父母揸手，一個人獨力供樓養咁多人，唔怪得佢搏晒命搵錢。」與鄧智偉拍拖多年從來冇嘢過手，高 Ling賺的錢全部有血有汗，值得欣賞！