【如果這樣生活】黎諾懿講港式普通話成全集焦點 網民：古天樂有接班人！

撰文：東方新地｜圖片：電視截圖

TVB新綜藝節目《如果這樣生活》

話說，TVB搵嚟9位藝員分別走訪日本、台灣、內地多處拍攝全新綜藝節目《如果這樣生活》，目的係透過受訪者分享自己嘅故事而睇睇其他人另一種嘅生活態度，以表達生活其實可以有好多選擇，一切只取決於自己嘅態度！

黎諾懿狂講港式普通話

第一集中，黎諾懿就去到雲南大理探訪一位寧願放棄米芝蓮廚師職位而隱居嘅法籍大廚。點知黎諾懿喺節目中所講嘅第一句普通話：「司機，你懂去蟠曲村嗎？」，就將「司機」講成「c知」，而「村」字又講成「春」，簡直將經典港式普通話完美表現出嚟！

黎諾懿同司機嘅對話，因港式口吻及港式普通話而意外首成節目笑點！不過，最令人意外嘅係法籍大廚Gil嘅普通話似乎都好似比主持黎諾懿仲要好及標準！當然，Gil嘅普通話都帶有自己微微外國人嘅口音嘅～

二人去到農田採蠶豆時，亦笑彈不斷，黎諾懿再以港式普通話講：「狠田，味道狠像預本的狠龜的白細的Yumi！」，睇字幕先知原來佢話：「很甜，味道很像日本很甜白色的玉米！」，唔知幸Gil當時又係咪真係聽得明黎諾懿嘅港式普通話呢？

不過見Gil佢聽完後：「呀～～」咗一聲，之後再合上雙眼，唔通係喺度諗緊黎諾懿講咩？但好快，Gil就話：「對，對，對。」，之後馬上轉topic話：「可以生吃好。」

第一集播完後，唔少網民都喺網上提到黎諾懿嘅港式普通話勁搶鏡，有網民仲話：「大笑咗出聲」，亦有網民叫大家唔好笑人。