許家傑

捱足9年配角生涯 許家傑終入圍《萬千星輝》候選名單

最新娛聞

廣告

《萬星千輝頒獎典禮2018》早前公布入圍名單,基本上說得出的視帝視后級名字都有入圍,不過今年倒是有一個名字讓人感到驚喜,因為過往一直都未試過登榜。

撰文:東方新地、Anna|圖片來源:instagram、劇照

許家傑入圍《萬千星輝》候選名單

現年35歲的許家傑於2009年參加香港先生選舉,一開始並不矚目,但比賽中期後來居上,成為一匹黑馬兼冠軍,他燦爛的笑容和酒窩,還有高超的拉丁舞水準,那時候也算是讓人印象深刻。

2010年開始他便有參與劇集的拍攝,只可惜一直做的都是配角角色,許多現在提起來還會有印象的劇集,例如《花花世界花家姐》、《點解阿sir係阿sir》、《On Call 36小時》、《EU超時任務》、《使徒行者2》等,都有他的出現,但回想起來卻也留意不到他的存在。

直到《愛回家之開心速遞》「送水輝」這個角色,他才真正被留意起來,和大小姐的感情線也一直被看好,甚至是每集愛回家最受期待的,因為這個角色,許家傑的人氣漸漸上升。

如今逐漸得到賞識,許家傑終於能在《兄弟》和《機場特警》擔任比較重要的角色,相信將來也會慢慢踏上男主角之路。

許家傑 選港男為過癮

首先提番許家傑喺09年選香港先生得冠軍,嗰屆好多人淨係記得佢同吳雲甫(Owen),點解外間話佢係黑馬?許家傑笑言:「因為比我大隻嘅有好多,我唔係特別sharp,只不過係高,但唔算大隻,好似Owen(吳雲甫)大隻好多,好有陽光、model嘅感覺。」參選時覺唔覺得自己係黑馬?「完全唔覺,完全無諗過贏定輸,但我好enjoy個過程。睇得出有啲人係好想入行而去選,但我係為咗過癮、好玩,由細到大,我都係鍾意玩嘅人,打機鍾意打爆機為止,玩一樣嘢要玩到盡,選香港先生我當係我人生一個遊戲,應該玩盡佢。」

至於點解參選?許家傑解釋:「我自細係坐唔定、三分鐘熱度嘅人,想搵嘢挑戰自己,知自己坐唔定,專登搵份最悶嘅工嚟做,做核數,我鍾意數學嘅,日日要坐十個鐘,我覺得係訓練自己嘅好方法,但一到廿五歲,我覺得唔係辦法,feel到二十年後,甚至到退休,都係奉獻畀對你無意思嘅數字……」但做核數收入穩定啲?「我份人唔係使好多錢,我又唔係要住豪宅、養番狗,我覺得人最重要,反而要自己開心,人生只可以活一次吖嘛。」

講到許家傑前一屆港男朱允崇喺娛圈消失咗,後一屆翟威廉,選完亞洲先生,約滿亞視,再參選香港先生,問佢當選後係即刻有機會定係要等?許家傑憶述:「當時公司同我講『放心做、係會有前景嘅』,我又真係信,當時我廿五歲,覺得做五年或者十年,就算出番去無壞㗎!」

入行屋企人支持定反對?許家傑指:「我選港男嗰時,我阿哥係非常之反對,佢問我:『你好人好姐,做咩要選港男?』我答想挑戰吓自己,佢話:『你講嘢呀!』因為佢覺得我係發明星夢。嗰個月,我不停做Gym、去活動、記者會,我住北區,每日返TVB,來回車程要三個鐘,佢見到我每朝七點起身練嘢、學走台咁辛苦,持續咗一個月,到選嗰時,佢WhatsApp我話:『畀心機、加油呀!』兩兄弟好少講咁肉麻嘅嘢,我以為佢無理我,其實唔係囉,會feel到佢真係好support我。阿哥同我好唔一樣,佢係模範人生咁,讀大學、搵工、結婚、生仔、買樓,但對於我嚟講,我覺得咁樣好悶。」

向監製搲撈

許家傑入行後都做過好多角色,問佢有無試過一個事業低潮、樽頸位?甚至零收入?佢話:「講真我從來無諗過放棄,我第二套劇《紫禁驚雷》,係一套古裝,嗰時真係諗過放棄或者呢個行業啱唔啱自己?我角色係滿清貴族,講我好巴閉咁鬧一班漢人,但我鬧唔到,NG咗十次,個導演話:『算嘞,我take其他人反應,你唔使講嘞!』嗰次我好難受,點解明明練咗咁多次都做唔到,想搵窿捐、逃避,但都無放棄,因為我好嚮往做呢行,鍾意喺舞台上表現自己,我點解知,因為我跳拉丁舞嗰時已經發覺。」

「但呢啲嘢好快,一傳十、十傳百,嗰次之後,大家都覺得我唔識做戲,無嘢畀我做,到再有新嘅港男,開始無人留意我,因為無曝光,無出面嘅工作,拍咗嘅劇又未出,嗰段時間,我兼職教跳舞,但教咗兩、三個月,夾唔到我開工時間,教唔到,嗰時寧願自己食少啲、買少啲嘢,控制生活費,只要承認自己係窮,就無咩好輸,開始爭取好多嘢,主動問每個監製畀角色,監製答:『呢套無角色㗎喎!』我話:『唔緊要,我要搵食。我真係好想做,好想留喺呢行。』」

「唔係個個監製肯理我,得兩、三個理,但就因為嗰兩、三個,到依家都一路用我。譬如林志華監製,一路搵我拍《飛虎》、《飛虎II》、《以和為貴》、《兄弟》……佢第一次用我係《飛虎》,我做蒙面嘅飛虎隊,企後面、行動就有份,永遠無得見樣,夏天著住套衫拍,過程係痛苦,可能佢見我幾肯捱,建立咗個關係。」

演員的使命

09年到依家,有無遇到好幫到自己嘅前輩?許家傑表示:「一定要提嘅係周志坤老師(曾任《舞動奇迹》評委、已故拉丁舞大師),佢係我拉丁舞老師嘅老師,我選港男隻舞,佢有份幫我排,本身我以為自己跳得好勁、好好睇,但原來上鏡咁係唔好睇,佢幫我改過隻舞,出嚟效果係好好多。五、六年前,佢極力向湖南衛視推薦我去參加《舞動奇蹟》,話:『呢個男仔真係識跳舞,一定會令個節目好睇。』其實嗰段時間都好艱苦,劇又無人識,就因為去《舞動奇蹟》呢個job,令我生活紓緩咗,可以繼續喺呢行維生。」

最初點解會學拉丁舞?「我讀書嗰時體育嘅必修科,有打波、有跳舞,我以為跳舞係K-Pop、好型,就報咗,去到先知原來係拉丁舞,點知一跳覺得好過癮,兩個人跳舞嘅互動係好開心,仲令我學識咗點去接觸異性,因為以前我比較怕醜、深閨,所以由二十歲一路學到依家。」

有無諗過離開無綫,去國內發展?「有諗過嘅,酬勞、待遇係國內吸引啲嘅,但我覺得香港始終係我屋企,我覺得作為一個香港人,係應該有社會責任,我好尊重古天樂,因為佢話:『依家香港電影唔得,應該大家畀心機去做,而唔係北上搵錢。』錢帶唔走,我夢想係拍一套可以改變人嘅電影,譬如韓國有套《無聲吶喊》,孔劉做主角,講兒童性侵,呢套電影之後,件案成功翻案,我覺得呢啲係好勁嘅電影,我好想畀一啲嘢人哋,先唔好講咁大嘅目標,就算依家我拍《愛·回家之開心速遞》,起碼觀眾睇到會覺得開心、好笑。」

問許家傑「送水輝」呢個角色,係咪為佢帶嚟一切?「唔係,我反而多謝之前畀大大小小、有名無名角色畀我嘅人,『送水輝』係一個運氣,但我之後點行,係我之前一路有無畀心機去做。Ken哥鄭則士教:『運氣可以令人注意你或者上位,但你可以留得到幾耐,絕對係
你自己本身有無料!』如果早啲畀我做呢個角色,唔會持久,因為嗰時我都唔識做戲。呢八、九年,好多行行企企嘅角色,令我可以喺側邊睇到好多主角做戲。」

同「大小姐」林淑敏合作無間,默契係點得嚟?「我哋都係好感恩、好珍惜機會嘅人,我哋都覺得呢個角色係好重要,大家都好想做好件事,一收到劇本,就約出嚟對,就算大家通告唔同,等對方收工,留低時睇對方做戲,檢討點做好啲。處境劇最好嘅嘢係一路拍一路出街,觀眾睇到鍾意,我哋愈有信心做。」

心態上,拍八點同拍九點半嘅劇有無分別?「一開始有,一開始真係覺得,處境劇比較即興、粗糙啲。因為大家都知一個禮拜要拍五日,時間好短、好急促,所以拍嘅嘢唔會咁細緻,但係原來唔係,入到去拍發現,處境劇要更加專注,同做到一步到位,拍戲劇就算有咩問題,機位都可以就,但處境劇唔會就,好睇就好睇,唔好睇就真係好唔好睇,處境劇要喺短時間拍好多場戲,個鍛鍊真係好好。」

依家出街應該好多人認得?「開心嘅,有人認得自己係好窩心,但其實我唔係好享受,我個

人比較隨意,唔使返工就唔化妝、戴頂帽,著背心、短褲,依家有少少所謂嘅包袱,去到邊都要保持官仔骨骨嘅形象。」

而講到佢身形好fit,問佢點keep?許家傑就話:「我入行四、五年嗰時,冇乜工開,就算有劇拍,一個禮拜都係開兩、三日工,其他時間完全得閒,嗰時見好多人有時間去咗玩、蒲,我問自己仲係咪想留喺呢行繼續發展,咁啱嗰時張家輝拍咗《激戰》,覺得其實男人操大隻咗之後,真係好唔同,就定咗個目標畀自己。幾攰都好,一味操,操到人哋都睇到自己有唔同,咁就成功嘞!嗰時開始就習慣咗操。」

女友完全信任

問許家傑點解公開有圈外女友?點解唔揀圈內?佢話:「我無話要揀圈內定圈外,反而溝唔溝通到係好緊要,心靈上嘅溝通對我嚟講係重要啲,只不過咁啱係圈外。我平時比較少講感情,因為我覺得公還公、私還私,做好自己嘅工作,無緋聞亦係因為唔想因為花邊新聞而多曝光,嗰啲唔係我工作範圍。」

最後問到佢三十四歲,有無結婚時間表?「都有㗎,好老實,我係比較傳統嘅男仔,我會希望唔好餓死老婆瘟臭屋,即係希望事業方面再穩定啲,有自己嘅家嘅時候,先去結婚。」呢行好多誘惑,女朋友有無擔心?「呢個就係心靈上嘅溝通,第一就係信任同尊重,好多時我話今晚要開OT,佢係完全信任我,唔會過問。呢個就係點解大家keep到咁耐嘅原因,因為我哋工作時間好長,如果唔信大家,不如就唔好一齊,所以大家嘅默契、溝通,係好清楚。」

許家傑感激家人支持,且從來沒加諸經濟壓力,「呢個亦係我咁夠膽留喺呢行追夢嘅原因,到依家經濟穩定啲,媽咪都仲話:『唔急㗎,你買到樓、自己養妻活兒,先再畀錢我啦。』」

26歲毅然放棄穩定文職工作選港男,最終以黑馬姿態跑出,由平淡人生瞬間成藝人。他笑言沒背景也可得冠軍,證明比賽沒造馬。

許家傑堅持每日花至少半小時操肌維持身形,常言道「機會是留給有準備的人」,壯實麒麟臂、力的表現,令觀眾對「送水輝」一角留下印象,由客串一集,變成固定人氣角色。

對女性觀眾而言,「送水輝」另一煞食之處在於招牌燦爛笑容及深長酒窩。問到現時可會多了女士主動示好,「冇乜,我真係工作為上。」

處境劇要確保存貨,演員幾乎每天開工,透露現時約保持足夠播放個多月的劇集,以避免「打風落雨、或者有人病開唔到工。」《愛‧回家之開心速遞》中,大小姐同送水輝大玩《我的少女時代》同《天若有情》造型同情節,浪漫又爆笑。

與「大小姐」林淑敏的熒幕情侶形象深入民心,不時拍廣告、出活動搵真銀,就連無綫自家的廣告套餐也找來兩人作推廣,足見人氣!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!