JW揮低一姐菊梓喬 金牌監製回巢撐 新劇擔正女一拍敖嘉年
廣告
上月先啱啱簽約加盟星夢娛樂的JW 王灝兒，唔夠一個月已經搶閘，成功揮低在無綫四年的一姐菊梓喬，在十月中開拍的新劇擔正女一，男主角是以部頭約形式回巢無綫的敖嘉年，為隆重其事，無綫高層杜之克，更親自出面，力邀18年已經榮休的金牌監製潘嘉德回歸操刀！可見JW極受無綫器重。
撰文：東方新地｜圖片：新傳媒資料庫、JW、敖嘉年ig
加盟星夢娛樂一個月已經搶閘
同卓悅太子爺男友葉韋彤（Tarzan）拍拖三年多的JW王灝兒，近年生活富泰逼人，好多人都以為佢好事近，但JW上月突然宣布加盟星夢娛樂，全力在事業再衝刺，當日JW加盟記者會，無綫便出動星夢群星力撐，HANA菊梓喬、胡鴻鈞、鄭俊弘、連詩雅、譚嘉儀、戴祖儀、伍富橋、林穎彤及劉子碩等齊齊現身支持。
唱重頭劇《陀槍師姐2021》的主題曲
簽約冇耐，JW已率先被安排主唱重頭劇《陀槍師姐2021》的主題曲，已經執到好籌，原來被力捧何止唱主題曲。
簽約時已講明想拍劇的JW，絕對唔係客串咁簡單，演戲經驗唔算多的她，已落實在十月中開拍，由已經榮休的金牌監製潘嘉德回巢操刀的新劇擔正女一，潘嘉德受訪時坦言，他也是近日才接到無綫邀請，無綫更叫佢不要推搪，他表示暫時好多嘢仍在構思中，亦只見過公司同事一次。
金牌監製潘嘉德出山撐JW
金牌監製潘嘉德出山認真唔講得笑，由他編劇、導演和監製的經典作品多不勝數，像《刑事偵緝檔案》系列、《鑑證實錄》系列、《衝上雲霄》、《昏前昏後》、《女人唔易做》、《On Call 36小時》系列等，而今次出山作由JW擔正，絕對充滿話題性，事關連一姐菊梓喬以及吳若希、連詩雅，都未真正做過劇集女一。
