30歲JW被拖婚硬攻歌影視 加簽經理人合約雙線發展
撰文、圖片：東方新地
JW被億萬男友拖婚硬攻歌影視 加簽經理人合約接劇拍
JW加入星夢後氣勢如虹，除了年底在頒獎禮搶獎，更有意拍電影，近日指自己已加簽經理人合約，歌視同時發展。至今JW已有兩套劇完成拍攝，分別是《逆天奇案》及《欺詐劇團》，等待播映。原本有傳JW會在《欺詐劇團》擔正女一，無綫為捧她更巴閉搵金牌監製潘嘉德回巢操刀，不過當提及男女主角人選，監製德哥卻直言：「對燈發誓，我冇份揀主角！」最終JW只擔任劇中配角，主角落實為蔣家旻。但睇嚟備受無綫力捧的JW，將來有機會可以跳過監製揀蟀一環。
同卓悅太子爺葉韋彤（Tarzan）拍拖四年打得火熱的JW（王灝兒），近年可謂優哉游哉，經常做跟得女友陪男友出入馬場及生意應酬，不時在社交網分享同男友的家庭生活放閃，以為她快嫁人上岸，但原來JW太子爺男友仍然享受單身，至今未有結婚計劃，想升呢富貴人妻冇著落的JW，惟有寄情工作。據知情者透露：「同Tarzan（葉韋彤）拍拖之後，呢幾年JW已經冇乜事業心，寧願爭取時間陪男友，Tarzan出去生意應酬JW亦跟到實，為咗冧Tarzan又學整嘢食同陪打乒乓波，仲行埋奶奶政策，成日傍實未來奶奶出入，成個新抱仔咁款，明眼人都睇出佢有顆恨嫁嘅心，不過Tarzan就唔係咁諗，寧願同JW過吓同居生活先，搞到長期倚賴男友嘅JW，耐咗都覺得冇乜安全感，呢排仲好積極話要再衝事業㖭！」
雞仔聲難入咪、外形條件限制多
八月初JW宣布加盟星夢娛樂，入無綫不止為再攻樂壇，更踩過界入埋電視圈。將於十月中開拍的新劇《欺詐劇團（暫名）》，已落實由JW擔正女一，男主角是以部頭約回巢的敖嘉年，據知該劇演員名單還有鄭丹瑞、蔣家旻、張秀文、星夢新人劉子碩及上屆冠軍港姐黃嘉雯。不過對於毫無演出經驗的JW，外形條件限制多，今次擔正亦令劇集拍攝加大難度。有幕後爆料：「JW冇演戲經驗，又得嗰五呎高身材矮小，外形已經輸蝕，想搵男主角襯佢都唔容易，而且佢講嘢同唱歌好唔同，講嘢把雞仔聲好難入咪，如果真係拍戲，有好多嘢都要改進，無綫夾硬捧佢上都算好博，所以今次開劇捧佢，公司都諗咗好多方案！」
金牌監製潘嘉德無份揀主角 未與各演員會面
為幫 JW上位，無綫除替 JW度身訂造角色，更不惜搵兩年前已經榮休的金牌監製潘嘉德回巢為新劇操刀，由於潘嘉德在無綫四十多年創作過不少經典劇集，有他助陣自然令劇集如虎添翼。不過可靠消息透露，今次潘嘉德神回歸拍攝新劇《欺詐劇團（暫名）》，只擔任監製一職，劇本由無綫旗下編劇創作，接到邀請的德哥，更冇份參與揀劇中男女主角，至今亦未與各演員會面，對於外傳男女主角已落實，兼籌備得如火如荼，向來事事要求高的德哥難免不悅，近日同友人傾起回巢拍劇便忍唔住狂呻。據知情人士透露：「德哥兩年前榮休，想專注做其他嘢，年初執導舞台劇《今晚打老虎》反應仲好好，今次佢返無綫幫手，都係因為出身 TVB，始終有一份情意結，但接受邀請之後，先知道好多嘢自己冇份參與，有好多嘢反而喺外間傳番去佢耳邊，感覺好唔受尊重，梗係會唔開心啦！」
潘嘉德親回應：同以前監製好唔同
就傳聞向潘嘉德求證，他最初大耍太極表示：「自己都係最近先接到邀請，未了解成件事，今次合作形式係同以前監製好唔同，工作量冇咁大，公司考慮到我都半退休，好錫住我！」但提到有傳劇中男女主角他冇份揀，德哥亦未有隱瞞：「我只係被邀請嘅其中一人，一套劇被邀請參與有成百幾人，可能隨時唔止㖭！我只係其中一個，我唔係TVB員工，對燈發誓！我冇份揀主角！你等TVB公布新消息啦！」加入無綫兩個月，JW已獲高層萬千寵愛，有金牌監製加持，話唔定可以腐朽化神奇！
金牌監製經典多
金牌監製潘嘉德，在電視業全盛時期拍過不少經典神劇，除了是收視保證，亦捧紅過不少藝人。
