廉政狙擊

廉政狙擊大結局率先睇|胡定欣終極大暴走!黃智賢一家齊遭殃

最新娛聞

廣告

由邵氏兄弟及優酷出品、樂易玲擔任總製片人的《廉政狙擊》,本周踏入結局周,周六晚8點半至10點半,更會在翡翠台播出一連兩小時大結局,據知屆時除了再有大型冧樓場面,由頭帶到落尾的「廉政MVP」屠敏(胡定欣飾),更會展開終極大暴走,實行「以暴制暴」!

廉政狙擊 屠敏大暴走搞到上新聞!
屠敏大暴走搞到上新聞!(圖片來源:TVB提供)

《廉政狙擊》屠敏 VS 卓廷光終極對決

《廉政狙擊》結局篇中,原本睿智又冷靜的屠敏(胡定欣飾),因一再遭到卓廷光玩弄及陷害,而步向瘋狂,不但不按牌章出牌令自己眾叛親離,更終極大暴走綁架卓太(羅霖飾)及卓日升(高鈞賢飾),來「餌誘」卓廷光(黃智賢飾)及卓以凡(吳卓羲飾),並指示手下向趕到現場的二人拳打腳踢,實行「以暴易暴」。

廉政狙擊 單睇劇照同拍攝花絮,已令人十分期待定欣本周六晚的精彩Solo戲份。
單睇劇照同拍攝花絮,已令人十分期待定欣本周六晚的精彩Solo戲份。(圖片來源:TVB提供)
廉政狙擊
(圖片來源:TVB提供)

胡定欣大暴走玩完綁架玩揼跛腳

開行Turbo復仇的屠敏更出其不意玩全港直播,將卓廷光罪行公諸於世的同時,亦攬炒將自己綁架、毆打及虐待卓家的暴行同步公開,當中最震撼眼球一幕,是屠敏拿著超大型鐵鎚欲打跛卓廷光雙腳,似有同歸於盡攬炒之嫌!

廉政狙擊 所有打戲場面做足安全措施,大家睇吓阿Ben個肚,墊咗嘢架。
所有打戲場面做足安全措施,大家睇吓阿Ben個肚,墊咗嘢架。(圖片來源:TVB提供)
廉政狙擊
(圖片來源:TVB提供)

吳卓羲被追問做過幾多次警察

劇組公開了大結局相關場口拍攝花絮,片段所見「好戲鐵三角」定欣、智賢(Ben)及卓羲埋位時雖然七情上面,但鏡頭以外三人其實相當輕鬆,定欣除了與Ben有說有笑,聆聽導演指示時更一度開心至手舞足蹈,與鏡頭前的「霸氣屠敏」判若兩人;在大結局中與定欣一樣無限爆Seed的Ben,未埋位前不但偶爾唱歌減壓,更追問卓羲到底當過多少次警察,場面搞笑。

廉政狙擊 雖然要拍咁Tense嘅場口,但定欣、Ben同卓羲鏡頭以外都表現輕鬆,不斷有講有笑。
雖然要拍咁Tense嘅場口,但定欣、Ben同卓羲鏡頭以外都表現輕鬆,不斷有講有笑。(圖片來源:TVB提供)
廉政狙擊 未埋位前大家有講有笑,Ben仲偶爾唱歌減壓。
未埋位前大家有講有笑,Ben仲偶爾唱歌減壓。(圖片來源:TVB提供)

黃宗澤料身處冧樓現場

而在大結局孭起相當重戲份的定欣,除了要長時間在歇斯底里的情緒下演戲外,還要不斷應付「動作」場面,包括掹槍指人、被脅持及不斷來回跑等,難得定欣一嗌Cut後依然笑容燦爛,相當專業又捱得。至於黃宗澤則身處綠幕面前不斷重覆做著跌倒動作,估計與結局的冧樓事件有關。

廉政狙擊 一嗌cut機,定欣同阿Ben就可以完全抽離,真係一秒入戲表表者。
一嗌cut機,定欣同阿Ben就可以完全抽離,真係一秒入戲表表者。(圖片來源:TVB提供)
廉政狙擊
(圖片來源:TVB提供)
廉政狙擊 而黃宗澤喺綠幕面前做出連串跌倒動作。
而黃宗澤喺綠幕面前做出連串跌倒動作。(圖片來源:TVB提供)

高鈞賢畀成桶水兜頭淋超震撼

同場的羅霖及高鈞賢Matthew則相對辛苦,劇中因被強行灌藥、以致身體肌肉不受控制的Matthew,除了要挑戰演技全程keep住抽搐,更遭定欣手下整桶水兜頭淋;雖然只是數秒左右的鏡頭,但仍感受到角色及Matthew現場承受的痛苦。在劇組公開的製作花絮片,工作人員淋完Matthew後即第一時間致歉,Matthew則邊滴水邊表示沒事,畫面震撼。

廉政狙擊 高鈞賢畀咁大桶水兜頭淋,都咪話唔辛苦。
高鈞賢畀咁大桶水兜頭淋,都咪話唔辛苦。(圖片來源:TVB提供)
廉政狙擊
(圖片來源:TVB提供)

高鈞賢要全程keep住抽搐反白眼

事後Matthew透露相關鏡頭是一take過完成:「我叫啲工作人員唔好就住,嗰場戲我畀人灌完水、仲要畀塊濕晒嘅麻布疊住塊臉,係幾辛苦嘅,但我個角色做得衰嘢多,都應該有報應。」Matthew續指由於因應角色要不停反白眼及抽搐,故此遭到同場工作人員取笑。

廉政狙擊 工作人員都對高鈞賢大表同情。
工作人員都對高鈞賢大表同情。(圖片來源:TVB提供)
廉政狙擊
(圖片來源:TVB提供)

羅霖為求逼真被真麻繩綁手

至於羅霖則整場戲由頭喊到落尾,她坦言拍攝時真實心情亦是乸住乸住:「呢場戲差唔多係由朝拍到晚、拍足全日,我同Matthew畀人用麻繩綁咗喺張櫈度,為咗逼真,我哋有叫工作人員綁緊啲,所以都會痛。其實Matthew畀人用水淋嗰幕,我喺隔籬齋睇都好心痛,同埋見到屠敏拎住大鎚揼落廷光度嗰吓,我真係想衝埋去救佢。嗰場戲我都有唔少反應要做,我個心真係全日都乸住,幕後見到我都話我喊得好辛苦。」

廉政狙擊 羅霖喊足全日喊到心都乸埋。
羅霖喊足全日喊到心都乸埋。(圖片來源:TVB提供)

羅霖情緒激動焗到成頭汗

觀乎花絮片,羅霖在相關場口哭至全身是汗,足見情緒相當繃緊。羅霖又大讚定欣演技十分出色:「佢好入戲,當佢用支槍指住我時,佢好大力撞埋嚟,我成個額頭瘀咗,拍完佢都有道歉。因為演戲如果就住嚟做,效果係唔好嘅,咁樣反而要NG。」談到拍出來效果滿臉滿頸是汗,羅霖笑言:「嗰度係比較焗,所以有一半係汗,一半係劇組噴嘅水,同埋因為情緒要好激動,所以出得更加多汗。」

廉政狙擊 羅霖話身上有一半係真汗水。
羅霖話身上有一半係真汗水。(圖片來源:TVB提供)

仲有其他大結局精彩劇照率先睇:

睇埋《廉政狙擊》結局篇預告:

卓廷光同警廉政商黑都有勾結,睇屠敏最後點樣靠暴力反擊!

《廉政狙擊》第一集的塌樓劇情如何影響全劇角色發展?

《廉政狙擊》是胡定欣離巢TVB並加入邵氏後的首部作品,劇中飾演要裝義肢的「屠敏」原來係為咗復仇⋯⋯按此看詳情

《廉政狙擊》傅嘉莉為何要求加戲?

傅嘉莉在無綫播出的劇集《廉政狙擊》中,飾演美艷女子尹在詩,周旋於兩大商業巨鱷之間,劇中有一幕被傅天耀及卓廷光連環摸pat的戲份,原來是⋯⋯按此看詳情

撰文:東方新地圖片來源:TVB提供資料或影片來源:YouTube@TVB (official)