歐瑞偉

搏命搵銀養家 歐瑞偉隔絕飛來蜢

最新娛聞

廣告

近期憑《愛·回家》KC一角大受歡迎的56歲歐瑞偉,去年在電視劇《同盟》演出鮑起靜保鑣易先生,因為有型又打得,加上外形keep到十年如一日,被網民激讚封為「中佬男神」。但原來除咗外形keep住保鮮,歐瑞偉同大馬花旦老婆Wendy(李愛玲)結婚23年,婚姻亦同樣保鮮,大仔已經22歲,細女亦19歲,但多年來歐瑞偉只專心工作搵錢,同外表一樣正派,將所有飛來蜢隔絕,只為畀老婆十足安全感,曾經因金融風暴陷入財困,做武師要由五層樓跳下賺錢搞到周身傷,即使近期爆紅他亦處之泰然,捱過高低起跌33年,拼搏只為想給家人更優質的生活。

撰文:東方新地|圖片:新傳媒圖片庫、歐瑞偉IG

歐瑞偉 五個月閃婚

要數近年最好戲配角王,肯定是在多套劇集演出都搶晒鏡的歐瑞偉,憑《愛·回家》系列KC一角大受歡迎的他,之前因為要拍劇集《天命》暫別《愛回家之開心速遞》劇組,好多觀眾都唔捨得,近日KC終於回歸,同Terry李偉健再次發展甥舅情,HeHe的演出生鬼搞笑再次被網民激讚。做龍虎武師出身的歐瑞偉,讀書時已經是體操高手,85年拍《飛虎奇兵》當武師,第一次要由五層樓跳下,身手膽識都媲美《同盟》的易先生。雖然近年較為人熟悉的演出均是做配角,但其實歐瑞偉出道已經做男一,85年加入無綫藝員訓練班,正式轉型成為演員,86年已擔正在《神劍魔刀》做第一男主角,因為外形正氣,亦因此經常演大俠,95年歐瑞偉在劉家輝引薦下轉到大馬發展,首次自導自演《O記實錄之梟雄》,亦因此邂逅太太Wendy李愛玲。

唔講唔知,原來歐瑞偉太太Wendy婚前是馬來西亞一線花旦,曾經拍過幾十套馬來西亞電視電影,當年因為電影試鏡而認識歐瑞偉,拍拖五個月就閃婚,全因被男方孝順顧家感動。據知情者透露:「Wendy試鏡嗰部戲,就係歐瑞偉做導演,試鏡嗰日喺酒店等咗佢六個鐘,Wendy覺得佢專登耍大牌,對佢印象唔好,反而係拍戲一齊相處之後,先至改觀,當時歐瑞偉一得閒就會打長途電話返香港關心爸爸媽媽,Wendy覺得佢好孝順,就係咁畀歐瑞偉吸引到!」

放棄一切來港

Wendy甘為老公放棄如日中天的演藝事業,翌年兒子Nicolas出世,Wendy一直相夫教子,歐瑞偉亦留大馬發展,後來因97年金融風暴,大馬經濟萎縮,歐瑞偉陷入財困被迫要返香港從頭做起,Wendy亦隨老公來香港生活,一住就十多年,能娶得如此賢妻,歐瑞偉曾公開感激老婆為他放棄一切。

老婆好放心

外表正氣的歐瑞偉,在香港、大馬及內地不停工作賺錢,當然有遇過飛來蜢埋身,不過,對老婆一條心的他,認為男人最重要是有承擔,對引誘不為所動。據知情人士透露:「喺呢行咁多年點會冇試過有女想黐埋去吖?不過,歐瑞偉份人同外表一樣忠厚老實,佢好重視家人,對家人好有承擔,唔會因為一時快感去破壞自己嘅大好家庭,所以佢唔會畀飛來蜢黐埋身,只要感覺到有乜風吹草動,佢已經即刻落晒閘,隔絕晒啲飛來蜢!就算佢北上拍嘢,老婆都好放心,唔介意留喺香港獨力照顧啲仔女,反而係歐瑞偉好掛住屋企人,佢寧願搵少啲,選擇留喺香港拍劇,就算捱完夜,都可以返屋企見到家人,佢已經好開心!」

供女兒出國升學

為給家人更優質生活,歐瑞偉除了做演員,亦有繼續做替身來增加收入,雖然仔女開始大,但他亦希望能儲多些錢為兒女鋪路,年底更會供細女去外國升學。據知情者透露:「佢細女讀書好叻,佢覺得旣然個女咁好學又有天份,自己幾辛苦都會畀佢讀落去,而且佢同老婆都好緊張一對仔女,成日話要儲多啲錢留畀仔女傍身,真係廿四孝爸爸!」

有身手有演技兼且重情重義,歐瑞偉果然是名副其實的「中佬男神」!

大媽包圍

演《愛• 回家》KC入晒屋,歐瑞偉除咗劇接劇,亦多咗好多活動演出,早前就同劇中有HeHe戲的李偉健Terry為晚宴做嘉賓,形象正派的他一出場已經大受女士歡迎,行去邊都畀女圍。

送花畀老婆

表演期間KC落台派花畀觀眾,他專登行去送花畀低調到場的太太,體貼表現令太太甜入心。

同李偉健Terry在《愛回家之開心速遞》演HeHe搞笑出位,兩人亦因此多咗唔少粉絲。

好戲之人

即使只係做配角,歐瑞偉對每個演出都咁認真,近年在多個劇集演出搶晒戲,被網民激讚。

在《愛·回家》系列演搞笑生鬼的KC,近期同Terry李偉健一段甥舅HeHe情,更生鬼惹笑。

歐瑞偉(@au_siu_wai)分享的貼文 張貼

在《同盟》演身手不凡專一護主的保鑣易先生,為保護主人令小姐最終慘死,令觀眾大為感動。易先生一角更成功打入無綫《萬千星輝頒獎禮》「最佳男配角」最後五強。

歐瑞偉(@au_siu_wai)分享的貼文 張貼

歐瑞偉(@au_siu_wai)分享的貼文 張貼

在《城寨英雄》演亦正亦邪的楊竹鑾,表面是砵仔糕店老闆,鋤強扶弱的絕世高手,卻原來一直深藏不露,是劇中大奸角,歐瑞偉更為爆肌演出狂操!

供女出國讀書

曾經是大馬一線花旦的歐太Wendy,即使退出娛樂圈廿多年,當日零化妝外貌仍然清秀,女兒就遺傳了父母優良基因,輪廓標致又有氣質!兩母女感情好到行街不時笑住傾偈。

生活平實

老公歐瑞偉為人低調,歐太和女兒亦打扮樸素,兩人出入亦只係坐港鐵,生活平實。

陪搞手續

眨吓眼,19歲女兒已經升讀大一,早前,歐太親自陪同女兒去辦理出國升學手續,對女兒事事緊張的Wendy,同職員了解詳情全程問得好仔細。

見證畢業

性格低調的歐瑞偉,極少出現一對仔女的校內活動,不過去年女兒中學畢業,他同老婆都出席支持愛女。

紅到內地

歐瑞偉在多套劇表現突出,成功吸納大班女粉絲,在內地一樣愛歡迎,更為他搞影迷會,不時來港聚會。

上船登台

同是80年代出道的歐瑞偉吳岱融,可以話係識於微時,難得兩人同樣演技突出有運行,早前更一齊上郵輪演出。

兩位賢內助都有上船陪老公,鍾淑慧同Wendy原來一早相識,難得重逢特別開心。

最近歐瑞偉仲同吳岱融再合作,一齊拍攝新劇《牛下女高音》!

歐瑞偉(@au_siu_wai)分享的貼文 張貼

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!