激親坐月老婆 Bob買300萬Benz耍冧

Bob出po激親老婆

阿Bob細仔今年八月出世，早前仔仔滿月，一家人在家慶祝，三個囡囡對多咗個細佬更表現非常開心！早前阿Bob就表示，因為在家呻攰，激親坐緊月餵緊人奶、仲要照顧屋企三個囡囡的Bob嫂。阿Bob就話出po只係攪吓笑，事前亦有知會太太！佢直言：「知道太太壓力大！聽完佢呻，佢舒服咗！我都安心咗！」

Bob攰爆都要陪囡囡

正所謂行動最實際！日前晨咁早阿Bob就帶三個囡囡去北角Ryzu跳彈床，因為前一晚才從泰國返港，阿Bob帶住一對熊貓眼出發，老婆就留在家坐月兼照顧個多月大的細仔，同行仲有另一家人。阿Bob同一眾小朋友玩到不亦樂乎，本來攰到眼都睜唔都即刻生猛晒，。之後阿Bob又同三個囡囡影埋合照，玩足兩小時先盡興離開。

Bob 300萬Benz贈老婆

吸金力強的阿Bob，辛苦賺錢最大動力是希望畀家人最好的生活環境，15年就租住3千呎加多利山獨立屋，亦請了司機買了七人車接載太太及女兒。近日阿Bob再豪擲3百萬買了一架頂級的Benz Jeep，問佢係咪買來奬勵老婆辛苦生仔？阿Bob表示：「呢部可以話係我同太太嘅Dream Car，係佢陀住BB嘅時候決定買嘅，都可以當做奬勵吓佢！」

Bob：「擔起頭家，冇話咁容易冧嘅！」

阿Bob接受本刊訪問時，提到攰到爆都陪囡囡去玩，阿Bob回應：「咁擔起頭家，係經濟支柱，冇話咁容易冧嘅！咁疲累同有情緒嘅時候，會同太太分享吓工作上嘅嘢，互相鼓勵！」另外又話太太最想就係佢陪仔女：「我乜都畀晒佢，要奬勵佢隨時可以自己買乜都得，但其實佢唔係追求物質嘅人，最希望都係我有多啲時間陪啲仔女！」

全文完