王敏奕被女Rapper怒罵「臭X」被指多次拆散舊愛戀情？
原文：娛聞樂｜圖片：新傳媒、Instagram
26歲王敏奕 《女人俱樂部》入屋
1992年出世的王敏奕今年26歲，擁有標緻五官，清純外表夠煞食，14歲時已經做模特兒出道，做模特兒期間拍過唔少廣告。之後慢慢進軍幕前，近年都拍過唔少電影。不過比較為人認知的應該都係2014年《女人俱樂部》！
王敏奕演最索女飛虎
TVB今年4月播出與邵氏及優酷合拍的《飛虎之潛行極戰》，演員陣容鼎盛，包括有苗僑偉、黃宗澤、吳卓羲、張兆輝及王敏德多位猛男主演，而王敏奕就係飛虎隊唯一一個女隊員。今次王敏奕放下一貫斯文靚女的形象，親身上陣拍攝大量動作場面，叻女！
女神心早有所屬
可惜過女神心早有所屬，與曾志偉大仔曾國祥拍拖四年幾，人前人後sweet到爆。雖然近年曾國祥專注在台灣發展，兩口子聚少離多，不過感情穩定，志偉哥都當佢係新抱仔㗎啦！
王敏奕被女Rapper怒罵「臭X」被指多次拆散舊愛戀情？
不過日前本土rapper「火炭麗琪」突然在網上爆seed，喺IG Story鬧爆王敏奕係「臭雞」，指佢「又拆散舊愛的戀情」、「你條八婆自己做過咩心照」等，最誇張係詛咒王敏奕生性病！火炭麗琪係為呢位「前男友」出頭，定係為呢位「前男友」的女友出頭呢？咁就無從得知啦。
經理人唔回應
有傳媒就以上事件聯絡王敏奕經理人，對方指王敏奕並唔認識火炭麗琪呢個人，故唔打算作出任何回應。
延伸閱讀：
傳黃宗澤攝位速食王敏奕
去年王敏奕參與網劇《飛虎極戰》，與Bosco合作做飛虎隊內的一對情侶，遇上情場老手，入世未深的王敏奕自然難以抵抗！據知兩人拍足四個月日見夜見，一拍即合，劇組人員見佢哋好到一杯嘢飲share，放工仲成日約埋去Bosco間蠔吧飲酒擦蠔。男友不在身邊，女仔芳心最脆弱之時，就最容易被人乘虛而入啦！
上男方保母車換衫
當時兩人在西貢市拍劇，拍完後王敏奕好自然走上Bosco架保母車換衫，男方就好識做咁企在車外護花。親密到咁？
交換口水冇問題
王敏奕與Bosco戲裡戲外不時打情罵俏，不時黐到實，仲會同飲一杯飲品，嘢食你一啖我一啖，交換口水完全唔覺有問題喎！
王敏奕醉爆街頭
去年本刊拍得王敏奕搵好姊妹陳瀅及糖妹陪散心，當晚三人到Bosco位於九龍城的蠔吧，在一樓的VIP房內擦蠔食牛扒狂飲紅酒白酒，至凌晨一時許，踢住拖鞋披頭散髮的王敏奕在姊妹兩邊扶實下離開。現場所見，王敏奕腳步浮浮企唔穩，手袋都要姊妹幫手拎住，不時自言自語，手機跌埋落地都冇意識執。
Bosco鬼祟閃人
就在三人在蠔吧門口商討去處期間，Bosco突然以光速跑落樓，跳上早已在門口等候的保母車，王敏奕見Bosco上車後，不時望向其方向，最終要陳瀅糖妹拉走佢。眼見糖妹及陳瀅在街頭照顧飲醉的王敏奕，Bosco竟然扮唔識扮路過，連一句問候都冇，咁唔正常有啲嘢喎！
當晚王敏奕的心情明顯非常差，醉哭街頭不特止，仲好唔想返屋企，好不容易才拉到佢去陳瀅座駕停泊的錶位，都要擾攘一大輪先成功上車。糖妹正想關門離開之時，王敏奕失控怒吼：「唔好打畀佢！唔好搵佢呀！」王敏奕似乎為感情事賣醉，好姊妹陳瀅與糖妹為睇實佢，所以非常清醒。
王敏奕 狂蜂浪蝶獻殷勤
事業起飛，王敏奕身邊亦出現唔少狂蜂浪蝶， 令曾國祥大為緊張。據Venus身邊友人透露，因為之前傳出同曾國祥分手，就有唔少男士趁機攝位想追求Venus：「近期Venus工作多咗，連社交圈子都擴闊埋，工作上成日會接觸到好多事業型嘅男士，身邊多咗唔少狂蜂浪蝶主動向佢獻殷勤，Venus又純又省鏡，呢啲好女仔圈中已經買少見少，啲仔梗係吼實佢啦！」
豪宅氹女友
見女友多仔埋身，曾國祥亦怕貨比貨不敢怠慢，就算唔肯定落嚟落實娶女友，亦不時製造驚喜為求箍住搶手女友，今年初就同女友一齊搬入貝沙灣一個千幾呎的望海單位。
據知情者透露：「上年Derek大部分時間喺台灣做嘢，掉低女友喺香港，搞到Venus冇晒安全感，兩個仲一度冷戰，Venus搬返去媽咪度住咗一輪，之後同Bosco傳出緋聞，Derek收到風都開始緊張，前排特登陪女友周圍睇樓，揀貝沙灣呢個新竇，就係想畀女友住得舒服啲，嗰度望到海又有會所，活動空間好多，就算做運動都唔使專登去外邊，Derek想女友多啲留喺屋企，仲一得閒就會揸車接送Venus，監控女友嘅行蹤，唔要畀啲狂蜂浪蝶有機會埋到女友身。」
隔絕觀音兵
早前王敏奕接受訪問，就承認近日多咗唔少工作：「上年佢 (指男友曾國祥) 開始忙，自己就比較得閒，反而依家自己多咗好多工作，同佢各有各忙，大家可以一齊搏殺吓先！」事業起飛又青春無敵，王敏奕亦唔再心急想嫁。
