胡杏兒囝囝眨眼半歲大 Cute爆擺甫士晒萌樣
撰文：東方新地｜圖片：Instagram
胡杏兒囝囝Brendan六個月大
胡杏兒近日就同半歲大的囝囝Brendan影相留念，相中見到眼仔碌碌的Brendan已經識望住鏡頭，兼擘大個口扮驚訝，相當鬼馬！另外，更睇到佢隻手仔肥嘟嘟，相當可愛！杏兒透露六個月大的Brendan，現在身高70cm，仲有成廿磅重，果然重手。但大家唔使擔心，因為杏兒話據醫生所講，廿磅重的Brendan依然屬很健康。
胡杏兒老公唔執輸
而杏兒老公李乘德（Philip）亦都唔執輸，同樣上載另一張寶貝仔的照片。相中見到Brendan坐喺度，有啲頭髮豎起，笑得開心之餘，個樣仲好趣緻！李乘德更表示Brendan好好湊，成長過程好順利，除咗瞓得食得同屙得外，又唔怕陌生人，去抱佢仲會笑㖭！
胡杏兒老公 恨追多一個
之前，杏兒夫婦喺九龍塘一會所為Brendan搞百日宴，杏兒老公貼咗張相，並喺Instagram留言話：「Hopefully we will have the chance to carry two real babies one day (好希望有一日我哋有機會抱兩個真嘅BB！)」睇嚟佢哋真係心急追B喎！
當晚無論場地選址、回禮嘅小曲奇、場地嘅氣球布置等等、全部由杏兒全權策劃及精心安排。睇真啲佈置同主題仲係森林動物，好cute喎！
杏兒化身Pink Lady
杏兒幫主角囝囝打扮成黑白小紳士，同爹哋襯埋父子裝，杏兒自己就一身迷人Pink Lady現身，勁搶眼。
囝囝瞓不停
囝囝扭眼瞓，杏兒就四圍招呼朋友，預咗囝囝未必撐足全場，杏兒預備了多個大型BB紙版，畀來賓任影唔嬲，又安排即影即服務，安排夠晒貼心﹗
胡說八道會都有去
杏兒幫囝囝擺百日宴，胡說八道會班契媽又點可以錯過？平時其實聚會、上門已經見唔少契仔，估唔到胡定欣同姚子羚為咗撐場，都係收工趕番嚟，胡定欣仲係偷走、個頭仲係《包青天再起風雲》個古裝look添！呢啲咪誠意囉！
經濟百日宴
第一次做媽媽第一次搞百日宴，一向貼地務實的杏兒都係選擇中價私人會所，而不是為場面選擇五星級大酒店。地點位於九龍塘，方便男家沙頭角親友，地點又夠私隱唔怕被傳媒粉絲打擾。而酒菜和人數，最低消費係約16圍酒每圍六千大元包酒水，夠晒實惠！
