重溫藍潔瑛「靚絕五台山」風采 八、九十年代靚相！

撰文：東方新地｜圖片：東方新地

重溫藍潔瑛「靚絕五台山」風采

｜84年 迷人美人胚

84年21歲嘅藍潔瑛天一生一副美人胚子，加埋呢個迷人又迷惑嘅眼神，係男女都畀佢電到暈。

｜84年 新人上封面

藍潔瑛83年8月畢業無綫藝員訓練班，84年獲力捧，一年內共拍咗七套劇，同年9月就以超級新人姿態做某娛樂周刊封面人物，人氣高企。

｜84年 拍劇著婚紗

藍潔瑛終其一生從未結婚，但84年喺第二次擔正女主角嘅劇集《家有嬌妻》就著婚紗下嫁梁朝偉，並憑驚艷演出而成名。

｜84年 偕同學賀歲

84年無綫搵嚟83年第十二期藝員訓練班畢業學員拍賀年相，左起藍潔瑛孖住麥皓為、陶大宇、曾華倩古裝上陣，佢個笑容仲甜過手上粒糖蓮子。

｜85年 吳啟華傳緋聞

藍潔瑛入行以嚟緋聞不絕， 85年同訓練班同學吳啟華合作《六指琴魔》時，就盛傳男方對佢著迷並管接管送， 87年兩人大方合照毫不避嫌。

｜86年 靚絕五台山

86年未滿23歲嘅藍潔瑛簡直美若天仙，係男人都畀佢冧到癲，難怪有「靚絕五台山」美譽！

｜86年 劉德華續弦

84年劇集《寶芝林》劉德華演嘅林世榮因不解溫柔掛住練武，令女友藍潔瑛移情別戀，86年第二次合作喺古裝劇《真命天子》續弦共譜人仙戀。

｜86年 繑實鄧萃雯

85年鄧萃雯一出道就做女一，身為師姐嘅藍潔瑛非但冇視佢為威脅， 86年合照時仲繑實梳咗個爆笑梯形髮形嘅雯女隻手以示支持，二人並成為閨蜜。

｜86年 畀偉仔搶鏡

梁朝偉86年作新嘗試電咗一頭鬈髮，突破又吸睛，旁邊眉清目秀嘅藍潔瑛，同一臉稚氣嘅鄧萃雯慘被搶去風頭。

｜90年 罕見短髮look

藍潔瑛一向以長頭髮示人，呢個 短髮look極之罕見，加上全身白色服裝，感覺份外清新清爽又清秀。

｜93年 激罕行性感

93年未滿三十歲嘅藍潔瑛，替某娛樂周刊影咗從影以嚟最性感嘅靚相，呢張甩帶跌膊相，極具誘惑魅力！

電視代表作：《大時代》

藍潔瑛電視代表作絕對係92年嘅神劇《大時代》，劇中演重情重義、心力交瘁、一生坎坷嘅羅慧玲(玲姐)一角， 同劉松仁、鄭少秋上演愛恨情仇，係藍潔瑛最喜愛嘅角色之一。

電影代表作：《西遊記之月光寶盒》

藍潔瑛電影代表作係95年兩集《西遊記》(第壹百零壹回之月光寶盒 /大結局之仙履奇緣)，片中演對周星馳演嘅至尊寶，愛得死心塌地嘅「蜘蛛精」春三十娘，率性又美艷。

藍潔瑛一生

藍潔瑛83年投考第12期無綫電視藝員訓練班，跟她同期的還有劉嘉玲、吳君如、劉青雲、曾華倩等。藍潔瑛長得標緻，當年備受力捧，她先在《K-100》、《430穿梭機》做過主持，其後更獲安排演出多套劇集。

84年尾，無綫卻和藍潔瑛改簽5年長約，她嫌長要求無綫縮短到2年，爭持期間遭公司雪藏半年。

86年尾，藍潔瑛曾經因嫌合約期太長及拍劇集外景遲到等問題，無綫高層將她第二次雪藏，不再安排工作。藍潔瑛在87年初約滿離巢。

90年代，藍潔瑛跟梅艷芳、劉嘉玲、曾華倩、上山詩鈉、吳君如、羅美薇、邱淑貞及張曼玉感情要好，被黃霑稱為「九龍女」。

《義不容情》演技 令觀眾刮目相看

一年後藍潔瑛重返無綫，於重頭劇《義不容情》中飾演「梅芬芳」一角，改變了觀眾一向對她的靚女花旦印象，縱然她只參演頭幾集，卻令觀眾留下深刻印象！

《義》劇中，藍潔瑛只有三幕戲，由於她完美演出了絕望的感覺，故令人相當深刻，因而成功晉身演技派。

92年，藍潔瑛演出無綫25周年台慶劇《大時代》，跟鄭少秋、邵仲衡和陶大宇等合作，這劇至今仍被指為經典作品。

早前無綫重播《大時代》，一眾演員再次被炒熱，尤其女主角之一的藍潔瑛連續兩集以校服look出場，成網民話題！

電影方面，在周星馳電影《西遊記第壹百零壹回之月光寶盒》中飾演「蜘蛛精」春三十娘一角稱得上是代表作，但其後她逐漸淡出娛樂圈。

藍潔瑛入行後第一個緋聞男友，就是1984年和梁朝偉合作《家有嬌妻》時，被指戲假情真；1985年和吳啟華合作《六指琴魔》，吳啟華管接管送，兩人傳出緋聞。

拍拖三年的男友 自殺身亡

86年與她拍拖三年的編劇男友鄧啟揚突然在寓所內開煤氣自殺身亡，對她的打擊極大，竟步男友後塵開煤氣自殺，幸最後獲救，多年後她重提此事，自言對愛情很執着，一拍拖便不顧後果。

傳和鄭家成拍拖

而藍潔瑛愛得最轟烈的一段情，就是和富豪鄭裕彤二子鄭家成拍拖，當年在男方熱烈追求下，火速墮入愛河，藍潔瑛不避嫌搬入鄭氏家族旗下的酒店物業居住，衣着行頭亦變得富貴逼人。然而這段情發展並非一帆風順，當年藍潔瑛被指是拆散鄭家成和鄺美雲之間的第三者，令她飽受外間不少壓力，極力否認自己是第三者：「我又唔係偷人老公，我接受鄭家成係喺鄺美雲同佢分手之後，我絕對無錯。」可惜這段情最後經不起考驗，分手收場。

經歷兩段愛情重創後，往後數年曾先後與爾冬陞、富家子兼賽車手陸淦、劉少君等交往。而在拍《西遊記之月光寶盒》時，她和周星馳經常撐枱腳而傳緋聞。不過藍潔瑛最後公開承認的男友，就是一位金髮外籍男友，兩人雙雙出席梅艷芳生日會，但最後有指男方不辭而別返加國，二人戀情無疾而終。

2004年時，藍潔瑛拍瘦身廣告期間，與年輕她十多年的廣告商高層鄧建明拍拖，可是男方卻否認；至06年，藍潔瑛宣布破產，未幾有傳她搭上年屆68歲的退休律師曾權威，對方幫她交租兼支付生活費，更有傳曾權威曾向藍潔瑛求婚，但卻遭男方否認，而藍潔瑛亦不承認和他拍拖。

藍潔瑛還曾被本刊拍到滿頭白髮在路邊抽菸、眼神空洞，多年來鮮少與圈內人聯絡。近年來藍潔瑛飽受情緒病困擾，需要靠綜緩及友人接濟過日子。

藍潔瑛一度由赤柱豪宅搬到偏僻村屋居住，期間又鬧出情緒問題，之後搬到赤柱馬坑邨，她平日會去附近的教會聽道理及在商場逛街，偶然會被街坊認出。