袁偉豪「薯片風波」有後續 DJ阿檸做證人
撰文：東方新地｜圖片：Facebook、新傳媒
「行內人」睇《復仇者聯盟3》睇到火起
事緣有位幕後的宣傳人員，睇完《復仇者聯盟3》後喺FB同大家分享，本來有得睇特別場當然好開心，但就被一位TVB男藝人破壞好心情！「一位自以為天王巨星的TVB男artist，從好多TVB前輩口中都聽過呢位上位中的小生態度非常差」，事主稱呢位男藝人未開場時已經用非常唔友善的眼神「睥」住佢朋友，到之後開場後佢食薯片，男藝人就用極差語氣同佢講：「你細聲點！」
自以為天王巨星的TVB男藝人
事主強調自己只係食薯片，絕無製造不必要的聲音，無傾偈亦無睇電話等行為，更寸爆叫呢位男藝人「自己包個戲院睇啦嘛，咁咪冇聲囉。」文章末段事主仍然氣憤難平，表示當日坐喺場內該範圍的都係行內人，「你要覺得自己有幾紅先會用咁冇禮貌嘅語氣同人講嘢？」
袁偉豪發文回應
該位宣傳人員雖然無開名，不過涉事男藝人之後主動喺FB發文講番件事，原來係袁偉豪！袁偉豪首先表示歉意，但強調冇用不友善眼神望人，而且解釋因為旁邊有人食nachos(玉米片)時包裝發出聲響，所以先輕聲喺其耳邊講句「唔好意思，可否細聲一點？」事主話食薯片，袁偉豪就話佢食玉米片… 不過唔係重點啦！
兩人版本唔同？
袁偉豪繼續講，指完場後旁邊一行人對佢連番指罵，似乎仲講晒粗口話佢「咁x巴閉」，又話一定會將件事擺上網云云。最後袁偉豪強調唔係唔俾人食嘢，不過希望觀眾可以為他人設想，食嘢時細聲一點！
DJ阿檸做證人
正當大家以為事件就此完結，日前有另一位在場人士爆料，佢當時仲坐喺該位「薯片先生」正前方，原來係另一位行內人、商台DJ阿檸呀！阿檸稱開場不久己經俾人拍膊頭叫佢坐番低，之後睇戲時難免肉緊，個頭突高咗少少，又即時俾後面位人兄叫佢坐低！阿檸無奈心諗：「喂我本身已經坐低左㗎啦，你嘅要求唔係要我坐低，你要我跣低嚟睇呀！但係你對眼生得矮，我都冇計嫁？」
「你好騷擾咁大大聲問候人又點計？」
之後講到袁偉豪事件，阿檸指完場等彩蛋時薯片先生又嘈過，不禁話「大明星問你少少嘢又講晒唔好意思又剩都係一種冒犯，套戲都未完場大家等緊彩蛋嘅時候，你係咁喺度話識人老鼠，又好騷擾咁大大聲問候人又點計？」仲寸爆佢責任細所以能力細～ 照咁睇，似乎主角薯片先生先係騷擾人又冇禮貌嗰位喎？
黃翠如力撐好友
昨日黃翠如出席彩妝品牌活動，提到老友袁偉豪的「薯片風波」，翠如就話袁偉豪係一個好有態度、好直接的人，有嗰句講嗰句，仲不時會替其他演員發聲！咁袁偉豪係咪真係擺天王巨星架子？翠如就指對方其實幾貼地，去大陸拍劇時袁偉豪曾經同工作人員行6公里去書城，會坐喺地下飲嘢，又打書釘等等，巨星點會係咁！
