陳小春

袋近半億 陳小春 應采兒 賣仔搵命博

最新娛聞

廣告

放暑假可以話係小朋友最開心期待嘅日子,不過,陳小春應采兒寶貝仔Jasper(陳胤捷),5歲人仔就連續兩年暑假要開工搵錢,認真慘慘豬;上年做完《爸爸去哪兒5》Jasper火速爆紅,今季《爸爸6》更破天荒再搵小春父子檔冧莊,酬勞更有指加碼至3,500萬人仔,可愛Jasper再為爸爸媽媽賺近半億收入,超級威威!

不過為搵錢Jasper吃盡苦頭,上次已經攰到經常瞌眼瞓兼爆喊,日前小春帶住兒子去到稻城縣青藏海拔高原拍攝,Jasper就一度捱唔住缺氧要狂吸氧氣治療,辛苦搵命博,網民大嘆睇見都心噏!

撰文:東方新地|圖片:新傳媒圖片庫、應采兒IG、官方圖片、網上截圖

陳小春 被人仔打動

四歲之前一直將兒子收收埋埋,上年陳小春應采兒首度讓兒子Jasper萌樣曝光,參演內地親子真人騷《爸爸去哪兒5》,有指兩人被高達2500萬人仔酬勞打動,就連應采兒在拍攝初期,亦表示好擔心老公小春唔識同兒子相處;幸好,小小年紀的Jasper表現淡定,暖男形象極速俘虜大批觀眾心,成為新一代熱爆明星仔,拍攝尾聲觀眾都紛紛表示唔捨得,不過眼見兒子辛苦捱足三個月,應采兒已落閘表示拍完最後一集《爸爸5》,會讓兒子休息專心學業,點知言猶在耳,今季《爸爸6》開錄,小春又再帶著兒子Jasper加入真人騷,雖然有唔少觀眾大表驚喜,不過亦有反對聲音,不少網民留言質疑話:「唔係話過唔再做咩!」

首位藝人冧莊

一度有傳周杰倫會帶同兒子上陣參與《爸爸去哪兒6》,但最終周董冇影,一班爸爸陣容更是歷年最弱一次,湖南衞視為加強吸引力,開出天價引小春父子檔回歸助陣,更成首位藝人可以冧莊再拍。據知情者透露:「見之前個仔上山下海咁辛苦,本來丁丁(應釆兒)講過唔再畀Jasper演出,想個仔過番小朋友簡單嘅生活,不過《爸爸6》嗰邊開到天價畀小春,嚿錢真係好吸引,加上拍完《爸爸5》,丁丁覺得個仔學識咗獨立,小春父子感情更加好,係一次好難得嘅經驗,佢覺得再拍個仔都可以應付,就趁Jasper上小學前再畀佢拍多一次。」

 

差點暈倒

不過,日前拍攝第二站,就去到青藏高原東南部海拔3,753公尺的稻城拍攝,位處高海拔隨時會有高山反應,大人都未必捱得住,何況是5歲的Jasper,拍攝途中Jasper一度缺氧差點暈倒,好彩吸完氧氣休息一陣就冇事,可以繼續進行拍攝。唔知係咪開心得太早,日前應采兒就在社交網晒出小春同Jasper吸氧氣照片,還留言:「爸爸去哪兒第六季第二站稻城順利結束,海拔比較高、小孩子適應力比較強!」一心諗住大讚寶貝仔,點知引發網民激烈反應,紛紛留言鬧爆兩公婆為賺錢要兒子受苦,又鬧佢哋冇常識,高山反應因人而異,隨時有生命危險,紛紛替Jasper的安危擔心。應采兒為平息民憤火速將照片刪除。

派父母幫手

事實上從相片所見Jasper明顯已經體力透支,加上位處高原而缺氧,辛苦到要挨住外婆閉目狂吸氧氣治療,難免令一眾愛錫Jasper網民擔心。但其實媽媽應釆兒對兒子接受考驗都好緊張,當得知今季要去高原拍攝,已經好擔心兒子捱唔住。據知情者透露:「因為丁丁呢排要趕戲行唔開,佢又擔心小春一個人照顧唔到Jasper,已經叫埋父母過去幫手,不過始終天氣早晚溫差大,加上拍攝時間長,大人都未必頂得順,其實Jasper好多時都唔係咁舒服,成日要爸爸小春抱住行,唔似得上一季咁活潑!」

拍一季就賺一間豪宅,酬勞的確好吸引,不過,依家先去到第二站已經咁辛苦,真怕5歲Jasper會捱壞身體,到時真係多多錢都補唔番!

氹外公外婆

Jasper性格可愛又識氹人,拍攝期間就同外公外婆扮打麻雀,逗得兩老眉開眼笑。

捱唔住扭抱

青藏高原空氣稀薄,平日活潑蹦蹦跳的Jasper亦攰到不時要小春抱住行,看來行程相當辛苦!

賭王仔都拍

今季《爸爸去哪兒6》除了有陳小春父子回歸,還有楊爍帶著兒子,包貝爾帶著兒餃子,此外仲有賭王兒子何猷君(黑衣), 成為實習爸爸頂替范丞丞亮相節目。

留港開工

應采兒在港趕拍電影《掃毒2》未能同行照顧兒子,就安排父母同行幫手湊孫,可見她亦擔心兒子去到高原會捱不住。

上季拍到喊

小春子在《爸爸5》首曝光,贏盡民心人人讚可愛,不過,拍攝初期Jasper就試過辛苦到扭計狂喊,又經常攰到喺車度瞓著,拍攝對當時僅得4歲的Jasper來說明顯好吃力!

不過自《爸爸去哪兒5》播出後,Jasper即成為風頭躉,俘虜眾多少女心!除了他的懵呆樣子讓人感覺十分治癒,小小春在節目裡亦表現出他的可愛性格,成功吸納不同年齡層的粉絲!

話過唔再拍

拍完《爸爸5》,小春夫婦再安排兒子拍攝《爸爸5》賀年特別版,當時應采兒就在IG留言表示:「真的是最後一次。」

幸福爆燈

應采兒降服火爆小春成好老公兼好爸爸,兒子Jasper更係小暖男,35歲應采兒生日有老公兒子陪慶生幸福攞滿分。

畢業表演

除了夠精靈乖巧,Jasper更非常有音樂天份,早前在幼稚園畢業禮上表演拉小提琴。

扮Mario慶生

今年7月Jasper5歲生日,應采兒搞了個Mario Party幫兒子慶生,更一家三口Cosplay扮Mario!

應釆兒(@yingcaier)分享的貼文 張貼

小春應采兒跟圈中好友Chilam靚靚、蔡一智、關心姸不時相約飯敍,不過,相比其他小朋友,已經連續兩年冇暑假放要工作賺錢的Jasper,比同齡小孩的童年生活更豐富。

應釆兒(@yingcaier)分享的貼文 張貼

帶挈父母

Jasper拍《爸爸5》爆紅成萬人迷,更帶挈父母成搶手貨,年初小春應采兒又拍了真人騷《三個院子》。

應采兒近日又收過百萬成化妝品牌代言人。

可大可小

由於在高原地帶空氣稀薄,如果疲勞過度或身體虛弱容易引發高山症,嚴重者更會休克,情況可大可小。

許冠傑:

八五年許冠傑遠赴尼泊爾拍攝電影《衛斯理傳奇》,於8,000尺高地拍外景,因缺氧患上高山症及肺炎,返港休息治療接近一個月。

陳法蓉:

一六年陳法蓉在西藏拉薩拍攝內地電影《駐藏大臣》,由於西藏位於高原,Monica曾出現高山反應和休克。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!