黃子華腦力爆煲 完騷避世 快斬1億收咪
雖然賺到盤滿缽滿，但原來笑匠背後有苦自己知，今次閉關度橋更大壓力到吃不消，其實早於03年他接受訪問時已經透露：「成日覺得自己只剩3、4年命。」思想極度悲觀，全因每次為棟篤笑度橋都幾乎榨乾腦力、壓力爆煲，今次才忍痛下決定收咪。
幸好悲觀論反令子華更注重健康，即使已全面閉關度橋，仍爭取時間出外透氣，日前就見他一個人在大潭拖狗跑山，努力增磅上台應付長達接近一個月的演出，當日所見子華的確漸見成績， 相信體力上要撐足26場，都毫無難度。
撰文：東方新地｜圖片：新傳媒圖片庫、黃子華FB
黃子華收咪騷 史上最難撲飛
黃子華宣布做完七月棟篤笑《金盆𠺘口》，便正式收咪唔做，消息傳出震驚娛樂圈，令今次告別作成史上最難撲飛一次，尾場門票更被炒高至萬五元一張，身為主角的子華亦表示冇飛喺手，嬲爆呼籲大家唔好買黃牛飛。據知情人士透露：「因為係最後一次，子華想畀真正支持佢嘅人買到飛入場睇，但好多朋友同佢講買唔到飛，搞到佢好忟憎，最後決定加開9場，同將大部分飛都推晒出去賣，但係都被黃牛搶購，令子華好激心，未開騷已經勞心勞力。」
怕頂唔住爆煲
多年來，子華開棟篤笑都自己包辦製作，今次亦不例外，26場棟篤笑就合共容納33萬觀眾，最高票價880 元，保守估計一場已穩袋6百萬收入，唔使一個月就快斬1億落袋，「神級」子華錢會自己湧埋身，地位超然的確唔羨慕得咁多。但賺錢賺到笑的子華神，其實有苦自己知。據知情者透露：「每次搞棟篤笑，子華都係孤獨創作，一個人收埋自己默默度橋，過程其實好辛苦同自閉，佢係完美主義者，攞出嚟嘅嘢一定係最好嘅，佢話就算開騷冇人睇，佢都會覺得自己嘅嘢係最『正』！就因為咁，好多橋佢度完又再度，個腦根本冇得停，瞓覺都諗住，精神好繃緊，自己都怕會頂唔住爆煲。」
最痛苦的四個月
02年，子華就曾因為演出內地劇集《溥儀和他的五個女人》，太過投入角色而患上抑鬱，雖然最後成功康復過來，但經此一役，他更加愛惜健康，他在2010年《娛樂圈血肉史2》棟篤騷上，就這樣形容當時自己：「我為咗投入溥儀呢個角色，去感受嗰種個人面對歷史巨輪，了解嗰種渺小，從而產生一種不能自拔嘅史詩式沮喪。嗰時係我一生中最痛苦嘅四個月，第一次嘗到咩叫做精神崩潰。」
其實早於03年舉行棟篤笑《冇炭用》，子華已經有封咪念頭。當時更諗定收咪作叫《金盆𠺘口》，算是一個終結，再讓生命重新，但最後發現，原來自己唔捨得才打消念頭，當時他說：「發現自己真係唔捨得，唔想強迫下半世自己心癮唔發作。」直至14年做完《唔黐線唔正常》，子華已開始鋪路收咪。據知情者透露：「嗰次佢為咗個show閉關絞盡腦汁度橋，完全同外界隔絕，感覺係好悲涼，好似跌咗落深淵咁，所以呢四年嚟，唔少人問佢幾時再開，佢都一路逃避，就係唔想面對嗰份壓力。」
還清人情債
還有三年就「登六」，子華終於明白要放下壓力包袱重新過新生活，決定做完今個騷就隱居避世。據子華好友透露：「佢想過啲寧靜嘅隱世生活，知道自己將來都未必會再上台，以前有唔少圈中好友搵佢合作或者做嘉賓，佢都會推，反而呢半年佢係咁幫盡好友，就係想還晒人情債先過新生活。」
租500呎屋住
其實子華價值觀從不建基於物質，當時他曾經講過快樂同住屋大小冇關係，更曾租住500呎單位生活了一年。子華話過當時他做完溥儀返香港，便在旺角租了間500呎屋居住了一年，每日三餐都是食快餐，但生活得好開心，那次經歷令他體會到，住屋大小唔重要，最緊要生活開心！
開騷在即，閉關密密創作的他，亦爭取時間做運動操fit，日前就一個人拖狗行去大潭郊野公園跑山放狗。只見戴著漁夫帽的他戴埋earphone慢行解悶，行吓跑吓個多兩個小時，子華連水都冇飲，耐力和體能都keep得極fit，近傍晚六時，他拖住狗行返北角寓所，還輕鬆和保安打招呼才返上樓，唔操到咁fit，26場棟篤笑點頂？！
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
