黃子華含淚重提初衷 星光熠熠捧最後棟篤笑尾場
廣告
黃子華嘅棟篤笑「封咪作」《金盆𠺘口》昨晚已經圓滿結束，最後一場全場爆滿，更有唔少圈中人前來捧場！嚟到尾場，除咗一班粉絲觀眾不捨之餘，其實子華神自己都不禁動容眼濕濕，臨完場同觀眾鞠躬時更拿出紙巾抹眼淚、擤鼻涕，更提起當年點解會搞咗第一場棟篤笑！
撰文：東方新地 ｜ 圖片：黃子華 – 子華本部Facebook、Instagram
黃子華《金盆𠺘口》尾場 星光熠熠
尾場當晚，紅館場內真係星光熠熠！唔少圈中人都同伴侶或好朋友齊齊出席捧場，包括黃秋生、吳君如、陳可辛、黃偉文、容祖兒、古巨基、周慧敏、倪震、吳鎮宇、張達明、準夫婦苟芸慧同陸漢洋等，另外有早前同子華一齊主演電影《棟篤特工》嘅佘詩曼同一班好姊妹湯盈盈、文頌嫻等。最驚喜嘅當然係Do姐都捱眼瞓同農夫一齊嚟撐場！
黃子華與Do姐18年前主演嘅《男親女愛》，至今仍被奉為經典，昨晚網民見到呢張合照都瘋狂讚好！大家都知道Do姐生活有規律，向來早睡早起，不過每次子華開騷佢都例必捧場，果然係真心摰友！
尾場動容 重提初衷
去到尾聲，講完節目內容嘅子華逐一對四面台鞠躬，當下忍唔住眼濕濕，然後攞出紙巾印去淚水，最後拎起今次棟篤笑嘅「回水杯」，向全場觀眾敬咗一杯！飲完水，子華仲送埋隻杯俾一位台下粉絲。按照慣例，子華完場前都會開金口唱粵曲，但當晚除咗唱粵曲，子華仲難得提起當年搞首場棟篤笑嘅原因。
原因有13個？
子華表示當年第一次搞棟篤笑嗰陣其實有出一本小冊子，入面寫咗13個點解要辦棟篤笑嘅原因。
原因各式各樣，包括「有朋友得了腎病」、「失眠」。
「做咗一個唔係喜劇嘅個人表演，卻引來不少笑聲。」
「下班後不想回家，回家後不想上班。」
最後一點係因為就30歲。
唱完粵曲，子華雙手合十，走返後台嘅時候有向觀眾揮手，而返到後台後，子華再轉向觀眾，鞠躬答謝，顯得十分不捨。
基仔古巨基完騷之後亦上傳合照，話希望子華神可以「金盤反口」！子華神，諗下佢啦！！！
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
