神之馬壯黎諾懿 《BB來了》飾新手爸爸夠傳神
撰文：東方新地｜圖片：TVB、網絡截圖、新傳媒圖片庫、黎諾懿IG
BB來了｜李佳芯演女強人
《BB來了》中李佳芯(Ali)飾演一位名牌買手，平日食好著好兼經常出入高級場所，加上備受公司重用，故準備到巴黎受訓一年後，就可以平步青雲晉身管理層。
但點都諗唔到，當事業正值高峰期卻意外懷孕，並因為一個小生命的來臨，而需放棄一直所追求的一切，Ali在面對生理同心理極大轉變上，完美演繹出女強人忽然做媽媽忐忑不安心情！
｜黎諾懿演新手爸爸
而神之馬壯黎諾懿就飾演Ali劇中嘅老公葉致廷（Elvis），係一名35歲嘅高級餐廳與酒吧經理，但因為老婆突然懷孕，睇怕都要遠離夜夜笙歌嘅品味人生喇～
劇中黎諾懿嘅角色同台詞都幾生鬼抵死，有啲對白其實都令小編諗起《愛 回家》入面好耐冇見嘅神之馬壯⋯⋯
《BB來了》入面，黎諾懿聽到老婆要加入媽媽谷，可能同現實中唔少男士的反應一樣，就係一臉嫌棄咁拒絕，夠哂傳神，唔少網民都笑說老公覺得呢啲Group好似邪教一樣！
公屋出身 冇父幹
不過，神之子一開始都只係個凡人嚟。人地話成功需要父幹，但就算冇父幹，有後天努力一樣可以打出個名堂。喺公屋出身嘅黎諾懿，細個時爸爸因病離世，媽媽獨力養大佢哋兄弟三人。
因12年嘅處境劇《愛·回家》中擔正男主角之一，飾演馬壯一角大獲好評。自此，一講「神之馬壯」，就係人都知係邊個。
2014年，佢與家族資產近5億嘅李潔瑩結婚，3年後囝囝出世，而家相信黎諾懿都係有仔萬事足，為做個好爸爸同好老公而努力不懈！
黎諾懿一啲都唔吝嗇喺社交平台開心Share囝囝小春雞嘅照片同影片，一睇就覺得佢呢個新手爸爸都做得好開心！
唔少網民都由小春雞出世嗰時開始留意佢，囝囝模樣精靈，又好動，真係好得人鍾意！
雖然黎諾懿為拍劇時間顛倒，但都唔會錯過囝囝每個成長階段，由學爬、餵食mum mum、仲有剪頭髮等，佢都會親自出手，真係阿仔大過天呀﹗
唔覺唔覺，小春雞都已經咁大個仔啦！見佢個樣咁趣緻，唔單止黎諾懿會唔記得哂啲辛苦嘢，小編都充滿力量啦！
深知囝囝受廣大網民嘅喜愛，黎諾懿仲用小春雞個趣緻樣嚟宣傳新劇，不得不佩服神之子嘅頭腦啦～
話都冇咁快，黎諾懿都由當年嘅「奧運六星」，變咗做依家嘅人父啦！大家又鍾唔鍾意佢新劇入面嘅表現呢？
