那些年《珠光寶氣》性感靚太現已為亞洲爆紅女DJ

早前一集《珠光寶氣》講到蔡少芬同李司棋去買車，遇到黃泆潼飾演的闊太陳太，話說劇中黃泆潼其實家境開始中落，但仲喺人前同老公扮親熱，場面搞笑！講起黃泆潼，大家應該都會有啲印象，諗起嗰位那些年經常性感演出的女星！

黃泆潼被星探發掘入行

1978年出世的黃泆潼今年40歲，佢係透過多年前仲流行的星探發掘入行，16歲開始就展開模特兒生涯。去到1999年，21歲的黃泆潼參選香港小姐競選，雖然未有得到任何獎項，但仍然獲得TVB的賞識，開始參與演出。當年仲有傳黃泆潼爸爸同曾志偉份屬好友，所以佢有機會做譚詠麟MV女主角！

雖然成為TVB藝人後開始拍劇，但黃泆潼代表作唔多，大家有冇印象佢拍過咩劇？

遊戲節目常客

《龍咁威》客串比堅尼女郎

黃泆潼亦有參與電影演出，當中包括《新紥師妹》、《絕種好男人》及《江湖》等，其中喺《龍咁威2003》客串演出比堅尼女郎，大家記唔記得呢幕？

踏上DJ之路

其實黃泆潼自2005年起已向音樂路發展，除了跟獨立樂隊「4pm」合唱了歌曲《女殺手》，之後甚至以「Miss Yellow」之名當上DJ！當年唔少香港的夜場都會邀請佢做打碟DJ，漸漸打響名堂，有更多大牌子的活動也邀請佢。厲害！

近年黃泆潼開始世界巡迴打碟，去到內地甚至歐洲各國打碟。2016年時，黃泆潼獲澳門邀請為「仲夏池畔派對」做DJ嘉賓，當時更打著「亞洲最HOT人氣女DJ Miss Yellow」的名號，同唔少世界級巨星同場獻技，包括搖滾勁旅Imagine Dragons！

升呢人妻

現已為亞洲知名DJ的黃泆潼，早年與獨立電子音樂人Kavemura拉埋天窗，升呢人妻。

去年黃泆潼與老公去意大利旅行，影咗唔少索爆泳衣靚相，身材完全冇走樣！

巴黎艱苦打拼林莉終成國際模特兒

早前一集《珠光寶氣》講到林保怡因鼻敏感幾乎冇命，幸好及時趕到醫院治理，不過佢一出院就返屋企同成班女伴玩！幾個女伴當中，就以著黃衫的林莉最搶眼，佢個角色叫Stephy～

2005年港姐林莉

1980年出世的林莉今年38歲，2005年時參選港姐獲得季軍，之後加入TVB。林莉參選港姐時有「香港林志玲」的外號，身高178cm令其在眾佳麗中鶴立雞群，更是史上第二高的三甲佳麗(僅次於張舒雅) 。林莉加入大台僅僅兩年，期間雖有客串劇集及主持節目等，不過都佢印象都係唔深。

巴黎艱苦打拼終成國際模特兒

早年離開大台的林莉朝著模特兒事業進發，當年佢隻身去到法國巴黎發展，只能住喺一間百多呎的閣樓屋，每次去市區都要一個幾鐘頭車程，慳食慳住。而為了喺巴黎重新出發，林莉決定棄用本來的英文名「Carrie」，改用英文拼音Lin Li，並四圍向品牌叩門求機會。試過由朝企到晚做「人肉Dummy」、又行過大大小小的騷後，終於積累了點點名氣！

林莉的努力並沒有白費，隨著知名度慢慢增加，成功令國際品牌注意到佢，近年已一躍成為國際模特兒，曾在巴黎高級訂造服時裝周(高訂騷)行天橋，參與呢項雲集一流超模的盛事，可算為港人爭光！

關鍵詞

DJ 珠光寶氣

那些年《珠光寶氣》性感靚太現已為亞洲爆紅女DJ