婚禮嘉賓陣容媲美台慶！ 林子善：識做人好過識字
撰文：東方新地｜圖片：新傳媒圖片庫、林子善IG
林子善 情慾新聞無損婚姻
訪問開始，講到林子善嘅婚宴，賓客誇張過台慶，證明佢相識滿天下，林子善就謙稱：「唔好咁講，我好驚請漏人，其實我都請漏好多人，因為擺唔到咁多圍，有啲因為係前輩、長輩，禮貌上要請，唔請唔得，點知個個都嚟齊，結果擺咗八十六圍，徐哥 (徐榮)、煒哥 (陳煒) 著住戲服嚟，坐一坐就要走，好多謝佢哋畀面。我覺得任何行業都係識做人好過識字，不斷生活嘅時候，仲學習緊點去做人，好似我三哥黃嘉樂，佢架車壞咗我仲緊張過佢，我就係咁嘅人。」
問佢同太太拍拖幾耐結婚？林子善答：「拍咗七年，有段時間分咗手幾個月，之後再一齊番。其實拍咗無幾耐都覺得呢個係結婚對象，但係有好多嘢好大壓力，我覺得自己未係一個可以擔起一頭家嘅男人，同埋呢行真係好天斬埋落雨柴，唔穩定、好驚，佢好鍾意小朋友，所以好多壓力，令到有一段時間停咗一輪，最後尾都一齊番。」
林子善續說：「之前我諗大家都睇過一啲花邊新聞 (林子善在分手真空期與女藝人L小姐的情慾對話流出)，嗰啲只係好短暫，同埋我一早已經同我太太講咗，依家感情仲更加深厚咗，因為經歷過嗰件唔好嘅新聞，依家照顧住一個大Baby (指太太)，嚟緊努力跑山搵首期，籌備迎接一個細Baby。」
置業落太太名
講到林子善捱出兩層樓，據聞仲好照顧屋企，佢笑言：「無報道講到咁神，父母、哥哥對我好好，因為父母教導我哋要照顧老人家，到我入TVB環境好番啲，我又有做DJ搵外快，我阿爸阿媽鬼鬼祟祟幫我零首期置業，我供樓，供到層樓畀父母住。至於第二間屋，其實係我出個名幫阿哥抽，唔屬於我，所以希望嚟緊自己置業，但都唔係我名，會落太太名，我覺得有咗名份，我嘅嘢即係你嘅嘢，層樓寫邊個名無乜所謂，同埋我太太好好、對錢銀唔care。」
問到林子善口才了得，女性緣應該好好？日後點杜絕女性緣？有無好多狂蜂浪蝶埋身？佢表示：「女性緣好呢個係真，其實男性緣都好好，同埋狂蜂浪蝶係睇你點發出訊息，如果係一個好正面嘅訊息，唔會有狂蜂浪蝶。」
點解無啦啦操肌？林子善就話：「嗰時我拍完《怒火街頭》好肥，行路膝蓋痛，所以減肥，去操拳，操操吓，教練話其實你可以操吓肌吖，就咁操出嚟，呢行好多人都大隻，不過咁啱我呢個茄喱啡又肥又矮，突然間變咗咁，大家至會嘩一聲！」
訪問期間，林子善問了多次：「你有無約致豪 (原名黃長興) 做訪問？」不忘關心好友，難怪圈中人緣出名好！
林子善婚宴星光熠熠，更獲鄭嘉穎、馬國明、唐詩詠等親任兄弟團，「因為拍嘢有好深嘅感情或者良好嘅關係，所以畀面。」
說到分手後終成眷屬的太太Kary，林子善冧說：「佢好鍾意小朋友，依家我咪努力搵奶粉錢，努力維護好個屋企。」
林子善冰室生意至今開至第五間，「托賴好多朋友支持，生意尚算OK，但希望咁多位業主高抬貴手，唔好加咁多租。」
近年林子善加入操肌行列：「我一向鍾意做運動，但健身只係為身體好！」
