17歲選新秀入行 25歲許靖韻：唔想浪費青春！
也就是說，許靖韻 (Angela) 三分一的人生，都在樂壇起伏與跌蕩。
90後，聽說都缺乏耐性、都還沒搞清想要甚麼、都以為還有大把青春可以蹉跎。
可是Angela不一樣，17歲自己走去參加新秀，攞埋第二；20歲唱片成績欠佳，照她的話說，已經主動殺上唱片公司「周圍刮人」開會談解決方案；不見樣只見小背心翻唱別人的歌，靠自己殺出一條血路；今年再下一城，載歌載舞自彈自唱憑選秀節目《創造101》打進內地市場⋯⋯筆者覺得最了不起的是，即使背後有間最強的唱片／經理人公司做靠山，這個小女孩也沒有坐享其成。
「最壞的時候，唔可以對自己冇自信，需要抉擇嘅時候，唔好做個令自己有機會後悔嘅決定，我唔想浪費青春，就係咁簡單！」
大戰完《創造101》，Angela回港重新投入歌唱事業，有新歌有新碟仲有音樂會籌備中形勢大好⋯⋯但是你懂的，八年以來起跌過好幾次，再不似預期 又該怎麼辦？
Angela說：「未達到目標，就再努力過囉！」
嗯，不能浪費卻也不會怕輸，這才是青春。
撰文：東方新地｜圖片：新傳媒圖片庫、許靖韻IG
許靖韻 19，90，3097
比賽三個月，許靖韻最後排名第19。入營90天，她說她的時間除了排舞練歌，還用來讀了一本書《3097》。
不說不知道，原來真人騷訓練營嚴禁訓練生攜帶手機電腦及任何通訊用品，想打電話回家、想上網淘寶，還得每次申請，每月兩次、每次半個鐘。
「試過有人上繳電話，但係偷偷收埋咗iPad同電腦，仲要玩埋直播自己踢爆自己，結果咪搞到製作單位要搵一次大清洗，逐間房檢查沒收所有電子用品囉！開頭你會覺得『黐線㗎！唔畀篤電話，一日24小時要點過喎？』原來唔係想像中咁難。以為三個月、成百個女仔堆埋一齊，仲唔係是非多到聽見都頭痛？原來又唔係喎，當你身處嗰個環境、大家都係同一個目標，真係可以培養出感情，而唔係是非。」
「以前睇唔少真人騷、選秀節目，一個出局，其他又攬又喊，我都覺得有乜可能？點會咁friend？事實原來真係可以好好感情。咁大個女，第一次悶起上嚟冇得篤電話，至知道原來人同人之間可以咁溝通、抬起頭原來身邊個人生咩樣、屋企有咩人、甚至有冇養寵物，我都知！尤甚係同屋住四個女仔，你諗吓，三個月時間，一齊瞓、一齊住、一齊錄影、一齊練歌練舞，真係可以好感情到一個點，怕第二日有人會出局，結果成班女仔擔心到瞓唔著。
成班訓練生係由全國二萬幾人海選最後留低，有啲係本科生、有啲係dancer，有啲本來已經係唱片公司練習生，你見到人哋咁叻都進取到一日瞓得三個鐘甚至更少都要練多陣舞，嗰種環境，點到我畀自己偷懶、畀自己唔去進步？」
「無疑，呢一次參賽經驗幫我增加唔少知名度、又再幫我開個好頭，返嚟香港再起步，但係咁多年經驗話畀我知，做歌手好被動、呢一切並唔代表從此以後就平步青雲。我唔怕再跌、唔怕再失望，只想提醒自己，以後無論遇到咩情況，都要保持住當時入營參加《創造101》嗰團火。
話就話101，其實第一集已經out咗大半，剩番54個女仔，我就係第54名。嗰一刻我話畀自己聽，許靖韻，你冇得再退後喇，因為你已經係最後包尾嗰個，同呢一行一樣，冇退路，就只可以向上爬。一定要話畀人知，我可以更好、值得留低！」
美少女轉身變
《創造101》的女生裡，不少都是內地唱片公司的練習生。入營錄影節目就話要沒收電話艱苦受訓隨時做好準備被淘汰，原來在唱片公司受訓時，練習生們本來就冇收入、冇假放、沒收電話兼且要全日受訓。聽過待遇，Angela說覺得身為香港樂壇歌手真心幸運得多⋯⋯真的幸運嗎？Angela忘了頭幾年，她也艱苦過、信心被嚴重打沉過。
「嗰年參加新秀，我只得17歲，一入行就贏咗第二、比賽完即刻簽咗英皇，喂！我咁唱得、又簽咗咁大間唱片公司、公司有祖兒姐姐喎！今次仲唔掂硬、仲唔係好快就做到大明星？⋯⋯嗰一下真係信心爆棚！
點知第一年冇自己歌，只係幫人唱demo。第二年，又係冇自己歌，都係只可以幫人唱demo。」
「入去錄音室錄demo，仲要畀人指出好多問題，話我咬字唔清、話我一味得個大聲、根本識放唔識收，一啲感情都冇。第三年，終於開始幫自己歌錄demo。因為渴咗太耐、因為等咗呢個機會太耐，公司畀乜我就唱乜，從來冇諗過首歌係唔係適合我、呢個歌唱路線係唔係自己想要⋯⋯結果第一、二隻EP成績都麻麻，出面最大反響就係『呢個女仔咁似泳兒嘅？』
第四年、第五年，工作愈嚟愈少，甚至試過成年冇工開、冇收入，連以前錄demo嘅機會都冇埋。我唔係嗰啲坐喺屋企等運到嘅人，真係試過主動返公司、周圍刮人問。我想搞清楚我唔掂，到底唔掂喺邊，我嘅青春唔可以攞嚟虛度。」
「好多人以為我屋企有錢，其實唔係，我住新界大嘅、爸爸媽媽都係普通人家、打緊份普通不過嘅工。屋企唔等我開飯、爸爸同妹妹一味盲撐⋯⋯都冇用㗎，時間一日一日咁過，媽咪都提議我不如好似其他同學咁，讀金融、做金融，起碼入行搵到錢，唔似得依家零收入。
有時最低潮嘅日子捱過咗，望番轉頭，原來低潮都可以係轉機。就係冇工開嗰一年，我識咗好多音樂人、周圍問人可唔可以合作同寫歌畀我、我多咗時間提升自己音樂造詣，亦都係嗰陣時開始，我上網翻唱別人的歌，開始化身『小背心』。」
「我大學喺浸會讀金融，好多同學畢業入行、收入一年比一年多⋯⋯我覺得唔係咁計嘅。如果當初好似大家一樣入行，十年後搵到再多錢，我知道自己都一定會後悔，點解當初唔去唱歌、點解當年冇堅持落去。我就係嗰種人，哪怕有一絲會後悔嘅機會，我都唔會畀自己咁做。」
更好的，值得等
可能真的是事業與愛情無法兼顧，去年尾「小背心」開騷揭開真面目、許靖韻攀上第一個事業高峰之際，正是她宣布和相戀三年男友羅啟聰甩拖之時。這個月Angela將會推出新歌、舉辦個人音樂會，Angela說重新起步的第一首原創主打歌，說的正是失戀。
「首歌好慘情吓，demo首詞都係我自己憑感覺寫⋯⋯哈哈，不過公司用咗我首歌、嫌我首詞唔夠成熟。最後寫詞呢part都係留番畀專業人士，不過我寫呢首歌想表達啲乜，佢哋完全知。」
「我曾經試過有第三者介入、試過被男朋友背叛，大受打擊幾年都唔敢再拍拖，不過呢次唔係因為咁⋯⋯我同佢 (羅啟聰) 性格相近、愛好一致，就係因為太似、大家都係太衝動太火爆，於是擺埋一齊就會出事。
有陣時我都會檢討自己，係唔係我唔夠遷就呢？係唔係自己太直、識放唔識收呢？幾個月過去，我諗通咗，唔係咁⋯⋯愛情唔應該要戰戰兢兢，為咗對方忽略同收埋自己，一年半年好未？最終又可以頂得順幾耐？」
「我信呢個世界有個soulmate，唔知幾耐以後、唔知喺邊個地方，但係我總有一日會遇到佢。真正嘅愛應該係可以舒舒服服做自己。好似喺呢行一樣啫嘛，遇到容易，維持難。一鳴驚人起個好頭容易，但係點樣喺呢個行業繼續進步而唔被淘汰先至最難。我份人由細到大都好樂觀，畀啲信心自己、唔好忘記要努力，對的人一定會出現。我信下次遇到嗰個一定會更好，一定值得我等待！」
後記：學嘢啦！
意料之外，24歲的Angela，談吐思想一點都不像24歲。
忘了多少年，沒有對甚麼樂壇新人有期待，第一次對談Angela，卻是刮目相看。
「唱片公司大間、後盾強、打造同出品歌手係佢哋擅長啫，但係唔代表我哋就應該坐喺度等佢哋input、然後再幫我哋output。相反，我覺得我哋係藝人，冇理由照單全收，應該由我哋創造，再交畀公司output。我覺得人需要浸、路需要行，如果畀我第一年出道就爆出，就唔會有今日嘅我、就唔會想進步，同我喺《101》嘅心態一樣。諗番轉頭我唔會覺得有邊一步係冤枉路，放眼將來，我都唔怕再失望再遇上低潮，因為有過經驗嘅日子我會更識得利用。」
小背心以外，原來亮眼的還有很多。
一出道就攞新秀亞軍又簽約英皇，Angela話以為公司夠大、又有得做「祖兒姐姐」嘅師妹，曾以為下個巨星就是自己。
年初，與歌手前男友分手後不久就北上參與選秀節目《創造101》，Angela說少了牽掛和感情起伏，心態更專注更有火。
本來以為100個女仔，聽是非都聽到頭痛，結果卻和女孩們朝夕相對成了真正閨密。Angela最終在節目中獲得第19名的佳績。
17歲那年，一個人膽粗粗參選英皇新秀大賽，結果因為聲靚又彈得一手好琴，勇奪亞軍，還在比賽時就儲埋大班忠實fans。
入行後起起伏伏好幾年，Angela說爸爸和妹妹屬於盲撐一族，不過媽媽就理智得多：「佢想我學以致用做番金融，但係我唔想咁容易放棄自己。」
三年前與歌手羅啟聰發展地下戀，戀情因為男方赤膊攬Angela愛犬而意外曝光，不過曝光不久後，亦都因為了解而分開。
連唱三年demo苦等一個出碟機會、真正出道結果亦不似預期，成年冇工開冇收入的低潮期，許靖韻於是靠唱別人的歌化身小背心殺出一條血路。
憑小背心之名吸引三萬多歌迷追蹤、話題不斷，去年月以蒙面小背心身份開了首個個人音樂會。
