岩巉落選港姐張盈悅搶閘簽無綫拍《愛回家》 剃腳毛玩血崩出位 最想拍視帝王浩信
變身「島大」學生
22歲的張盈悅現身處境劇《愛回家》，成為「島大」學生「秀貞」，在日前「溫柔鄉的背後」一集中首度亮相的張盈悅，飾演阿壯（焦浩軒飾）的傾慕者，同學還有同屆落選港姐、謝嘉怡表妹源菲然以及麥詩晴，一行三最初對阿壯好嗒糖，表示仰慕﹗原來是利用他，最後三個齊齊現形，大反差好惹笑。
點知，轉頭原來張盈悅等三位島大生真實一面係惡死、麻甩又邋遢，更點到阿壯暈陀陀，阿壯到宿舍搵三女，張盈悅竟在剃腳毛，又點阿壯去為三女攞免費M巾，阿壯嚇到大叫：「唔得﹗我有M巾恐懼症﹗」呢個時候張盈悅突然咆哮：「你唔幫我攞，你信唔信我血崩畀你睇吖﹗」
張盈悅答非所問最經典
張盈悅與謝嘉怡兩位海外佳麗因新冠肺炎疫情影響，回港後隔離十四天才參與港姐選舉各項目。張盈悅2013年到美國讀書，去年才返港，首次會見傳媒為應無綫要求到髮型屋「執靚」，當時穿著碎花裙戴上棗紅色口罩， 而且慣性縮膊兼寒背，一副阿毛格印象令人甚為深刻，網民均唔睇好。當時張盈悅被問到為何山長水遠回港選美，她以周星馳經典對白回答：「兩樣溝埋做瀨尿牛丸啦！」令人一頭煙她再解畫：「我真的好愛香港，想回來見朋友，又想面對番香港觀眾，拍多些廣東話劇。」
張盈悅填補無綫花旦不足
雖然未能晉身港姐12強，但卻是這屆港姐中首個被無綫睇中而簽約成旗下藝人的落選港姐，全因近年無綫花旦小花買少見少，嫁的嫁；離巢的離巢，有指無綫認為張盈悅科班出身，受過專業演藝訓練，足以應付藝人工作。張盈悅畢業於美國音樂及戲劇學院(The American Musical And Dramatic Academy)，本有指她與「蟻俠」保羅路德(Paul Rudd)及金像女星安妮夏菲維(Anne Hathaway)為校友，後張盈悅澄清大家所讀的為不同分校，並非校友，不過她擁有豐富舞台劇經驗，更曾在全球最大專營萬勝節活動的公司擔當「驚嚇演員」，演出經驗豐富，她亦曾表示最想和視帝王浩信和實力派演員智叔廖啟智合作。
