feat_1156_20-21

直擊!60歲吳岱融榮升「半億隱形樓王」 踢拖𥄫中複式豪宅

演技超晒班的吳岱融於15年回歸無綫,憑《巨輪 II》大反派高天鷲一角入晒屋兼人氣持續高企,劇接劇未停過,早前播完的《牛下女高音》被指演出有喜感,在本周一(20號)出街的《大醬園》繼續做大老爺, 無論正邪角色都難佢唔到。努力搵錢的同時,其實吳岱融與太太鍾淑慧 (Lily)亦投資有道,二人有錢即四圍買磚頭,唔止國內有物業、就連東南亞及香港都有樓揸手,保守估計手揸半億物業,絕對是圈中隱形樓王。日前本刊記者直擊吳岱融前往九龍城睇樓,大客仔駕到,地產經紀當然落足嘴頭,據知今次吳岱融睇了多個該區新建的豪宅樓盤,其中一個更是6千多萬的複式單位,吳岱融笑言自己有鋪睇樓癮,不過扑槌就交老婆話事,愛妻號吳岱融以行動證明錫老婆真係會發達㗎!

撰文、圖片:東方新地

吳岱融愈撈愈掂 榮升半億隱形樓王

60歲的吳岱融一頭灰白髮已成為個人標記,愈老愈型的他鏡頭前擅演一手遮天的有錢佬角色,現實生活中原來都是隱形富豪。過去幾年吳岱融愈撈愈掂,拍劇又拍電影,商演亦不絕,而其太太鍾淑慧(Lily)更是人如其名, 是個不可多得,賢淑又聰慧的老婆,早年她走 遍國內登台搵人仔,夫婦二人獨具慧眼,早年已投資買磚頭,之前鍾淑慧見時機成熟,把國內五個物業套現逾千萬,而他們現在仍持有的物業亦分布東南亞各地。

一頭白灰髮加花花恤衫,已經成為吳岱融的個人風格,愈老愈型的他,過馬路都有氣勢過人。
一頭白灰髮加花花恤衫,已經成為吳岱融的個人風格,愈老愈型的他,過馬路都有氣勢過人。

住慣大單位 買樓唔會揀窩居

據知情者透露:「岱融同Lily好多年前已經洞悉先機,佢哋鍾意喺外地生活,加上早年喺大陸搵到錢,所以物業都集中喺大陸同東南亞,不過近年岱融主要喺香港拍劇,留港時間多咗,呢幾年佢一直都係租屋住,見最近樓市好似有啲回落,所以有機會都想吼吓香港樓,不過佢哋喺大馬住慣幾千呎大屋,幾百呎唔會睇得上眼,如果買香港樓都要揀啲大單位,或者獨立屋。」在港忙於拍電影的吳岱融,日前與助手現身九龍城,本刊記者見他在地產舖前駐足近十分鐘,指住櫥窗內的樓盤招紙,與助手研究了一輪,有大明星駕臨,當然機不可失,店內兩名經紀即行出店外搭訕,未幾眾人即起行到附近的豪宅睇樓。

這日吳岱融經過九龍城一間地產舖,駐足超過十分鐘。
除了對出售的樓盤廣告手指指,還除眼鏡睇清楚。
一男一女地產經紀見吳岱融對樓盤甚有興趣,即走出來介紹,分分鐘係幾千萬樓大生意,當然不容怠慢。

踢拖睇中複式豪宅 全權交老婆話事

本刊記者見吳岱融上了一個低層單位,單位望九龍城寨公園景,他跟隨經紀走出露台望景,不過望了兩望就返入 屋,看來這個單位並非吳岱融杯茶,之後未見他即時離開,未知是否繼續睇其他單位。約45分鐘左右,吳岱融徐徐步出,邊行邊興高采烈地與助手討論,莫非已經睇啱心水豪宅?

經紀帶吳岱融到九龍城一個近年落成的豪宅睇現成單位。
本刊記者見他走出露台望了兩眼,不過可能該單位屬低層,景觀一般,吳岱融很快就返回屋內。
吳岱融睇完樓步出豪宅,而女經紀則繼續在其身旁雞啄唔斷。
之後他親自駕駛其七人車離開。

對於有意在港買磚頭,本刊記者致電吳岱融,他笑言老婆鍾淑慧不在港,絕對不敢輕舉妄動,「我唔係買樓,係睇樓咋!有時間咪睇吓囉,我不嬲有鋪睇樓癮,周圍睇,唔同地區都睇吓,時機啱同價錢啱先會入貨,不過咁大件事始終都要睇老婆頭,佢呢排唔喺香港,要等佢喺香港先再同我一齊去睇,我話唔到事㗎!」原來吳岱融當日還睇了一個叫價6千幾萬的複式單位,問他是否滿意,都係嗰句:「我滿意冇用,都要我太太鍾意啱佢心水。」

要睇老婆頭!(真實對白)

鼠年繼續旺 做馬明父親演喜劇一樣得

至於鼠年的工作安排,吳岱融將會繼續當旺工作不斷,他說:「今年有劇拍亦會接電影,不過我好希望今年喺音樂方面可以有更多發展,好想開自己嘅個人音樂會。」據知吳岱融下個月便會為無綫新劇《 BB來了 2 》開工,今次飾演男主角馬國明父親,唔使做奸角演喜劇一樣得,再加上拍住出爐視帝一定有運行啦!

吳岱融唔止有演技,仲係唱得之人,早前他於 「面包台有您共鳴頒獎典禮」中獲頒「共鳴新歌 手獎」,以及憑歌曲〈 我的朋友不簡單〉獲得 「共鳴金曲獎」,之前他為這首歌拍 ,碌盡人 情卡特別邀請張兆輝、歐陽震華、陶大宇等好友助陣㖭!
排忙於拍電影《老友情歲月》的吳岱融,片 中女主角是香香岑麗香,而他更首次演神 父,非常破格。
早前吳岱融在 《牛下女高音》 的演出令人刮目相看,他飾演的 「大爆」 是一位小男人,經常同劇中老婆龔慈恩打情罵俏發生趣事,而插曲 〈你比我重要〉更是由他主唱。
做完小男人,吳岱融在新劇 《大醬園》 演的是大老爺,不同的角色性格他都可以駕馭。

與鍾淑慧甜蜜廿四載

有指吳岱融從來都不管錢,他把所賺的錢全部拱手給太太 鍾淑慧,讓她手握財政大權把錢愈滾愈大,而他們幾乎所有的物業,都寫在鍾淑慧名下,今時今日夫婦二人已是衣食無憂,工作以外可周圍飛享受生活。雖然吳岱融與鍾淑慧近年多在大馬生活,但吳岱融一家三口是新加坡籍,而他們的22歲乖仔Justin亦在新加坡大學修讀電影動畫,今年的農曆新年,吳岱融一家亦會在新加坡暖笠笠過節。

吳岱融與鍾淑慧育有一兒子,22歲的囝囝Justin在新加坡讀大學,一家三口長時間分隔兩地,今個農曆新年終於一家團聚,齊齊整整在新加坡過年。
吳岱融與老婆鍾淑慧經常孖住開騷搵銀,日前他更聯同《牛下》兄弟歐瑞偉、鄭敬基及蔣志光一齊在大馬舉行慈善演唱會,多位阿嫂亦現身撐場。
89年拍拖, 95 年結婚,吳岱融與鍾淑慧經歷廿四年的婚姻,感情亦曾有過高低起伏,不過二人始終如一,近年愈愛愈甜蜜。
早年返國內頻頻登台,吳岱融與鍾淑慧早已賺到第一桶金,近年更在泰國芭堤雅買了一間向海的度假屋,一有時間就飛去享受陽光與海 灘。
吳岱融之前曾推出情歌〈回去愛你十億秒〉送給他眼中賢良淑德、默默付出的老婆鍾淑慧。
更夫妻檔拍 MV ,情到濃時咀嘴, MV 更由囝囝負責剪片。
去年鍾淑慧生日,吳岱融邀請大班朋友為她慶 生,更坐住大髀切蛋糕。