Kwan1

口花花叫「阿燕」 坤哥 收集家燕姐唇印

入行七年,緋聞對象超過一打,吳業坤因此得到「偽毒坤」之名號,食女功力絕對毋須質疑。不過高處未見高,當對住年長四十歲的家燕姐,坤哥都仲可以口花花,仲竟然傳埋緋聞,呢啲咪就係神級、超卓、頂級囉!

撰文:東方新地

圖片:新傳媒圖片庫

坤哥 恨傳緋聞

話說逢女都冧、魚翁撒網式媾女,合作親都傳緋聞,無堅不摧嘅坤哥日前再下一城,同67歲家燕姐去到台灣拍新年特備節目都竟然「撻得著」!人人叫「家燕姐」,佢叫「阿燕」,人人對前輩恭恭敬敬,佢竟然夠膽死當家燕姐係𡃁妹咁撩,爭住食家燕姐口水尾、食完話可以間接接吻、仲冧到爆話「仲有餘溫」㖭!同節目嘅王梓軒、糖妹都忍唔住爆料:「坤哥專門收集家燕姐啲唇印,一見家燕姐飲完水留低唇印就第一時間影低。」

即係咁,有觀眾都睇唔過眼話坤哥對住長輩冇禮貌,不過冧女嘅嘢你哋就真係有排都未去到坤哥境界,重點係氹到佢口中嘅「家燕」、「阿燕」好開心!坤哥,你又得咗喇!

家燕姐 坤哥
家燕姐爆坤哥直呼自己做家燕,後來直接叫阿燕,家燕姐話聽到時都O晒嘴。
坤哥 家燕姐
同家燕姐合拍節目前,坤哥已經睇準時機,講明恨傳緋聞,今次成功造就一段「緋聞」良緣。
坤哥 家燕姐
當27歲吳業坤遇上67歲嘅家燕姐,讚佢「真心cute」時,就知道偽毒坤又發功!
王梓軒 糖妹 坤哥
王梓軒和糖妹大爆坤哥有收集家燕姐唇印嘅癖好,例如家燕姐飲水後在保溫壼留下唇印,坤哥九秒九拎起手機影低。
家燕姐 坤哥
爭住食口水尾,仲話同家燕姐間接kiss,坤哥呢啲係逢女撩天性定為節目效果真係要問番本人至知。
家燕姐 坤哥
話說好多家燕姐fans聽講偶像同吳業坤傳緋聞都嚇親,好彩囡囡珊珊喺IG派定心丸,話唔會俾呢段關係繼續發展。
坤哥 家燕姐
台慶當晚坤哥負責拖住家燕姐出場,家燕姐被晚裝絆倒,全靠坤哥扶實。
坤哥 家燕姐
不用羨慕!不用妒忌!不如虛心啲向坤哥學吓嘢,對住個個女仔都咁細心,話咁易就脫到毒!