李司棋

左耳突發性耳聾 李司棋:要爭取時間休息!

李司棋今年出山再拍《溏心風暴3》,見佢在劇中狀態大勇中氣十足,但原來佢多年來深受耳鳴困擾,左耳更出現突發性耳聾 ,拍完劇實在元氣大傷!不過司棋姐一直抱堅強樂觀態度生活,表明會爭取時間休息之餘,近日更落重本打扮成潮媽,得閒約好姊妹去半島歎早餐,生活不知幾咁有質素!

李司棋 人生如坐過山車

李司棋的人生經歷如像坐過山車,佢在娛樂圈紅足幾十年,卻遇上兩次婚姻失敗,後來患上子宮頸癌,接受電療期間更出現骨枯,一度要用柺杖代步。但佢並沒有放棄自己,病癒後司棋姐重新出發,07年憑《溏心風暴》成為首位同獲「視后」、「我最喜愛的電視女角色」及「萬千光輝演藝人大獎」的女演員,攀上事業頂峰!

《溏心3》演霸氣「火姐」

台慶劇《溏心風暴3》正在熱播中,司棋姐同一眾原班人馬三度合作,今輯飾演的女強人「火姐」霸氣外露,一旦激嬲佢就會扯火鬧人,中氣十足!

拍劇後要長休

在07年至14年效力無綫期間,李司棋每年最少拍一至兩部劇集,但拍劇往往要長時間工作,亦因為患癌後身體大不如前,每次完成一部劇她都需要很長時間休養。早年司棋姐曾向傳媒呻爆:「要記幾頁紙的對白,行來行去好攰!」不過今年被監製劉家豪力邀出山,於是佢又再接拍無綫台慶劇《溏心風暴3》,劇集在內地更大受歡迎,短短一周在視頻播放量已超越2.5億次。

半島歎個靚早餐

李司棋近期專注為《溏心3》做宣傳,其餘時間不用工作,當然要讓身體好好充電。早前司棋姐獨自駕車到尖沙嘴半島酒店,相約兩位好姊妹一同歎早餐,眾人邊食邊傾,不時講到眉飛色舞,過了一個開心悠閒的早上。呢日司棋姐身穿韓國潮牌棒球外套,頭上戴上一個細夾,可愛得來增添幾分少女味道。

呢日司棋姐所穿的棒球外套非常sharp醒,原來是韓國深受後生女歡迎的潮牌Bluepops,在網上買要3千元,67歲司棋姐原來都識網購,好潮啊!

養生回春

其實司棋姐近年打扮亦突然變得青春,不時潮牌上身,今年9月時仲開始玩IG,密密上載自拍照,仲有少女味甚重的食嘢相,Kawaii呢!

拍《溏心3》時左耳已退化四成

事實上,司棋姐棋身體隱憂甚多,多年來一直受耳鳴困擾,早年開始經常頭痛,要不停食止痛藥,耳邊不時聽到很多蟬叫聲,今年情況愈趨嚴重,還多了蟲聲、風聲及洗衣機的轟轟聲。年初正在拍《溏心3》時,佢左耳已退化四成,完全聽不到任何聲音,經過醫生檢驗後,屬神經系統性退化,至今仍找不出原因,亦沒有辦法根治,現在佢在左耳戴上儀器去訓練聽覺,用音頻刺激左耳。

李司棋 患中級突發性耳聾

司棋姐早前接受本刊訪問,表示自己的情況係「中級突發性耳聾」,喺好嘈地方就會聽唔到嘢,聽唔到人講嘢時自己又會煩躁。不過依家配戴耳機後,情況大大改善,唔再怕做訪問時聽唔到對方問咩!但司棋姐表示耳朵的情況係冇藥食的,冇得醫,冇得好番!

「爭取時間休息!」

另外司棋姐又稱健康現時最為重要,自己會爭取時間休息多啲!尤其佢唔係一個好急進的人,唔會逼自己咩都要爭第一之類,唔想又太多嘢做。司棋姐受耳患困擾仍敬業樂業拍劇,希望佢好好保重身體,將來演出更多好作品啦!