張文傑

簽古天樂做打星! 爆肌張文傑:我同甄子丹唔係差好遠

自01年開始做電影、電視動作指導嘅張文傑,近年簽約古天樂旗下,轉型幕前做打星,佢對自己未來嘅事業充滿自信:「我可以靠動作出人頭地、接近到甄子丹水平,唔係同佢差好遠!」

撰文:東方新地|圖片:張文傑FB

張文傑:古生會諗辦法幫我

現年32歲嘅張文傑 (German) 近日接受傳媒訪問,透露自10歲開始就跟隨爸爸張孝慈同伯伯張存學習功夫、雜耍,佢話以前爸爸同阿伯負責度《東華》表演,吳剛搽油、肥姐踩雞蛋嗰啲都係佢爸爸諗出嚟,後來無咗《東華》就去咗新加坡訓練舞台特技演員:「佢哋試過想用拔罐吸起一個人,因為之前未做過,我唯有做白老鼠,喺背上左吸右吸都係唔得,最終表演時出咗啲法寶先順利過到關。」

張文傑過往做過替身同動作指導,更試過在鹹蛋超人嘅周年巡演上著上超人衫扮演其中一角,雖然視線范圍只得一條線、抖氣位亦只得一個小洞,但能夠知道超人死光嘅秘密,加上短短一個月已賺過萬,令佢誤以為錢真係咁好搵:「但到我90年代入行,電影市道係好低落,我試過半年無收入,要捱麵包、公仔麵,唔係一次半次而係經常性,媽媽成日都鬧我,叫我搵嘢做或者揸的士,聽完會唔開心,爸爸雖然係呢行,但亦都好現實,覺得搵唔錢就咪做。」

到近年張文傑因為自細認識「黑哥」姜皓文,獲推薦成為古天樂嘅天下一公司旗下藝人,佢話:「黑哥叫我時刻都要裝備自己,因為我係動作出身,所以一定要Keep住身手!」

古天樂旗下除咗有張文傑同姜皓文,仲有林峯、佘詩曼以及《特技人》嘅羅浩銘等,張文傑大讚古生好關心旗下嘅藝人,會喺百忙中抽時間去了解各人嘅需要:「唔可以話一定畀到機會大家,但起碼佢會諗辦法去幫,係令人好感動,亦都好願意喺佢有事時幫番佢。」

而講到未來嘅發展,張文傑就充滿自信,話紅唔紅係際遇嘅問題:「我可以靠動作出人頭地、接近到甄子丹水平,唔係同佢差好遠!」