楊明醉駕炒車後首開腔 醉駕隻字不提！莊家山頂大宅內受訪：「撞到啲政府公物深感抱歉」

撰文：東方新地 圖片：新傳媒圖片、影片截圖

曾經因為醉駕遭無綫雪藏、早前受訪時透露「試過十八個月無糧出」的楊明，今次在公司安排下即日回應，在鏡頭前戴住口罩cap帽做訪問，而背景是女友莊思明的山頂億元大宅大廳內，以下是《東張》主持容羨媛及楊明的訪問內容：

容：發生咗交通意外，依家情況係點？

楊：當時係見暈啦，咁同埋撞到盤骨不過就冇大礙嘅，係政府醫院check過腦掃描嘅，X光，骨頭係冇事嘅，聽公司講呢，都希望我去做一個詳細啲嘅腦掃描嘅。

承認斷片 「短暫冇咗記憶」

容：成件事發生經過係點？

楊：夜晚點幾鐘，我揸番架車去我工作室去睇劇本嗰陣，喺山頂道彎位嗰度，好似係搶一搶軚跟住撞埋咗個啲石𡒊度，晾一晾起咗，其實嗰時撞一撞呢已經話斷咗片嘅，可以話係短暫冇咗記憶，所以點樣撞同點樣停呢，我其實都唔係咁清楚，睇番啲報道，啲差人係扶住我啦，啲報道話我係飲咗酒，要人摻扶咁樣，報道又指我拒絕咗酒精測試，其實我當時比較暈啲，狀態唔係太清醒做唔到酒精測試，警方嗰一刻淨係想救我，因為架車晾咗喺山邊，有一定危險性，所以一定要救我出嚟，送咗我去醫院同埋繼續調查，講番今次交通意外呢，撞到政府公物，撞到啲欄杆呢，都係心感抱歉嘅，唔好意思，不幸中之大幸呢係冇傷到人，可能呢排比較忙同埋夜瞓啦，就比較就揸車分咗神，同埋搶咗一搶軚，我好記得係搶咗一下軚，就出現咗呢個意外，首先同大家講唔好意思，因為我呢件事令大家都好擔心，好多輿論喺度，我個人就冇事嘅﹗

容：家人或者女朋友有冇好擔心你呀？

楊：有呀，媽咪即刻想嚟醫院探我，我唔想佢哋咁頻撲，交通意外啫﹗至於Liza（莊思明）呢就嚇死佢啦。

表示仲未清醒「交咗畀律師」

容：依家有啲乜法律程序呢？

楊：我都交咗畀律師去搞㗎喇﹗因為我又唔係好識啲法律程序啦﹗我依家仲暈吓暈吓，朝早仲好暈吓暈吓，依家算醒番少少，咁係處理緊囉。

網友點出漏洞 直斥「不知所謂」

對於楊明的回應，就連無綫官方專頁的留言區都有大量「唔收貨」網民回應，更指控記者未有問及醉駕「迴避問題」，更指楊明「自己傻、唔好當其他人都係傻」：

樂易玲出面 無綫最新回應：「楊明醉駕受輕傷」

楊明醉駕犯法早有前科，昨晚疑因醉駕被捕，發生越線交通意外撞毁Benz，卻拒絕當場的警員要求「吹波波」，受了傷的楊明腳步浮浮被送往醫院。而無綫高層樂易玲今日回應楊明醉駕一事時，表示「可能他受了壓力」，經治療後已出院休養。對於楊明疑似醉酒炒車，被送往醫院，無綫電視助理總經理（藝員管理及發展）樂易玲回應謂：「據初步了解楊明昨晚駕車回家時發生意外，受了輕傷，幸好沒有涉及其他人。當時他可能因壓力過大、疲勞或其他狀況，汽車失控撞向路旁防撞欄和石壆，車頭毀爛。事後他被送往醫院，經治療後已出院。現時希望給予他時間休息，盡早痊癒，公司會進一步了解事情和向楊明提供所需的協助。」

楊明醉駕有前科 負聞纏身 霉足十年

05年楊明曾經因醉駕留案底的楊明，上次未有炒車，今次卻於半山豪宅區釀成越線車禍，出事後更拒絕「吹波仔（酒精測試）」，送院後被警方以涉嫌「酒後駕駛」拘捕。

一線劇《迷網》播放中 下周結局都有醉駕場面！

楊明目前仍有一線劇《迷網》播放中，由於播剩五集，相信未會腰斬，巧合是下周即將大結局的劇集亦有一樁醉駕車禍。